The Division 2 nuk do të lançohet në Steam, por në Epic Store

Edhe një tjetër fitore për Epic.

The Division 2 do ta ketë lançimin e saj në PC përmes Epic Games Store. Hyrja e dytë e Ubisoft në këtë lojë post-apokaliptike tashmë është e disponueshme për pre-order në dyqanin e ri të Epic. Ky i fundit ofron një ndarje 88/12 të fitimeve zhvilluesve, ndaj nuk është çudi që gjithmonë e më shumë lojëra po kalojnë në Epic Store.

Në një konferencë për shtyp, Epic dhe Ubisoft thanë se versionet Standart, Gold dhe Ultimate do të jenë të disponueshme dhe se do të garantojnë aksesin në betën private të lojës. Kompanitë gjithashtu shtuan se do të integrojnë elementë kyç në Uplay dhe në shërbimet online të Epic.

Ky njoftim nuk përmend asgjë për Steam, por si duket faqja e The Division 2 nuk ekziston në të. Kjo është mëse mjaftueshëm për të konfirmuar se Ubisoft po lë pas platformën e Valve, duke u zhvendosur në opsione të tjera me mundësi më të mira. Kjo është një situatë shumë e mirë për Epic Store, pasi The Division 2 është loja e parë që ka bërë një tranzicion të madh për të ardhur në të. Deri më parë vetëm disa zhvillues indie e kishin bërë këtë ndërrim.

Kur një përfaqësues i Ubisoft u pyet për këtë punë, nuk dha asnjë koment. Por një deklaratë nga Polygon, thekson se “kompania nuk ka plane për ta çuar The Division 2 në Steam.”

Ubisoft thotë se do të bashkëpunojë sërisht me Epic në të ardhmen për të sjellë lojëra të tjera në dyqanin e tij. Nuk kemi ende asnjë ide se çfarë mund të jenë këto specifikisht. Ndoshta është shumë vonë për të sjellë Far Cry: New Dawn në një dyqan të ri, por nuk do të habiteshim po të shikonim edhe ndonjë lojë tjetër të bënte të njejtin kalim si The Division 2.