Mixer trefishon orët e bëra stream në platformën e tij

Numri i orëve të bëra stream në Mixer është trefishuar në tremujorin e fundit, nga korriku deri në shtator, edhe pse sasia e orëve të para në platformë ka rënë me 10%. Sasia e orëve që shihen në Twitch gjithsesi, është rritur, sado që në këtë rast ka patur rënie të orëve të bëra stream. Ironike apo jo?

Këto statistika sugjerojnë se kalimi i Tyler ‘Ninja‘ Blevins në Mixer, nuk ishte i mjaftueshëm që të kalonte superioritetin e Twitch, pavarësisht se për platformën e Microsoft kishte përfitimet e saja.

Gjithsesi duket se shumë më shumë streamers janë duke marrë frymëzim nga streamer-i i Fortnite, duke synuar që ta çojnë përmbajtien e tyre kreative diku tjetër. Qoftë kjo YouTube, Mixer ose Facebook Gaming, ideja është të gjeturit e një baze të re fansash në një platformë jo aq potente sa Twitch.

Sipas Streamlabs, streamers që përdorin Facebook Gaming janë rritur me 236% që nga çereku i parë i 2018s, duke arritur një rekord prej 153,000 streamerash aktivë këtë vit. Platforma gjithashtu duket të jetë shumë popullore në APAC, Amerikën Latine dhe Europë.

Sado që Facebook Gaming nuk është edhe aq i rëndësishëm në luftën mes platformave të streaming, rritja e përdoruesve të tij është provë që streamers nuk kanë frikë të qarkullojnë për të gjetur audiencën e tyre të përshtatshme.

Në terma të lojërave pastaj, World of Warcraft kryesoi për tremujorin në fjalë. Nuk është ndonjë çudi e madhe kjo, kur merr parasysh që ajo periudhë përkon me lançimin e WoW: Classic gjatë këtij viti. Fortnite përjetoi një rënie të dukshme me vetëm 223 milion orë të para, në krahasim me 379.8 milion të vitit të kaluar. Gjithsesi për tremujorin e fundit të tetor-dhjetorit, këto statistika do të ndryshojnë, pasi do të përllogarisin edhe eventin e vrimës së zezë dhe lançimin e Season 2.

Me numrin e streamer-ave që largohen nga Twitch dita ditës, këto statistika bëhen gjithmonë e më interesante. Pyetja kryesore këtu është nëse Mixer mund të superojë Twitch?