Finalja e Worlds 2019 thyen rekordin e shikueshmërisë në Twitch

Finalja e këtij viti u ndoq nga 3.7 milionë shikues

Worlds 2019 u mbyll ditën e djeshme në Paris, por impakti që ky kampionat pati në League of Legends do të mbahet mend gjithmonë. Finalja e këtij turnamenti midis FunPlus Phoenix dhe G2 Esports solli 3.7 milionë shikues maksimalisht, duke pasur mesatarisht rreth 2.9 milionë shikues gjatë gjithë kohës.

Finalja e Worlds pati maksimalisht 1.7 milionë shikues në Twitch, duke thyer në këtë mënyrë rekordin prej 1.6 milionë shikuesish, që mbahej nga eventi The End në Fortnite.

Këto numra janë thuajse dyfishi nëse krahasohen me Worlds 2018 në Korenë e Jugut, ku Fnatic u përball me Invictus Gaming. Ajo seri u ndoq nga mesatarisht 1.6 milionë shikues, duke arritur rreth 2 milionë shikues maksimalisht. Megjithatë, shifrat e këtij viti kanë shumë kuptim kur merren parasysh rrethanat.

G2 ishin ekipi më i mirë perëndimor i League of Legends. Ata dominuan nga çdo kampionat, duke filluar nga LEC e duke kaluar tek Mid-Season Invitational. Ata gjithashtu kishin mundësinë të ishin të parët që fitonin Grand Slam në League of Legends, duke fituar në të njëjtin vit Spring Split, Summer Split, MSI dhe Worlds.

Megjithatë, FPX dukej se ishte një kundërshtar shumë i fortë. Një performancë fantastike e Gao “Tian” Tian-Liang e ndihmoi FPX të kontrollonte G2 dhe të ngrinte trofeun.

Europianët padyshim që janë të zhgënjyer pas humbjes me Kinën, por kjo humbje do e motivojë edhe më shumë G2 për 2020. Worlds vitin e ardhshëm pritet të ketë dhe më shumë shikueshmëri, duke qënë se do të zhvillohet në Shanghai dhe kampionët e FPX do të ndeshen në vendin e tyre.