Pas Chapter 2, cila është e ardhmja e Fortnite?

Nga vrimat e zeza tek një matchmaking funksional, ky ka qënë një vit i çuditshëm për lojën battle royale të Epic Games

Ky ka qënë një vit mjaft i çuditshëm për një prej lojërave më popullore, Fortnite. Me lançimin e Fortnite Chapter 2 që solli ndryshime të mëdha në lojë, ka qënë e lehtë të harroje disa prej çmendurive që ka sjellë 2019 për fansat e Fortnite. Nga vrima e zezë që u bë virale në internet e deri tek sistemi i ri kompetitiv i matchmaking, sot Fortnite është shumë më ndryshe nga loja që keni luajtur më herët këtë vit.

Ndërkohë që loja ka ndryshuar shumë, edhe aspekti kompetitiv ka ndryshuar, por jo për mirë. Mbase pasoja më e papëlqyer për lojtarët kompetitivë dhe esports ka qënë skill-based matchmaking, i cili sipas lojtarëve profesionistë ka sjellë lojëra të lodhshme.

Një tjetër problem i madh për lojtarët kompetitivë është mungesa e patch notes nga Epic, e cila krijon konfuzion të panevojshëm. Në vend që të bëjë publike ndryshimet, lojtarët duhet të zbulojnë vetë gjithçka. Edhe pse kjo nuk është ndonjë problem për lojtarët e thjeshtë, shumë lojtarë kompetitivë ndikohen shumë nga këto detaje.

Kjo dhe shumë të tjera kanë ndikuar për ta bërë Fortnite një lojë tërësisht të ndryshme në fund të 2019 në krahasim me fillimin e vitit. Megjithatë, përpara se të thellohemi më shumë, le t’i hedhim një sy eventit që nisi gjithçka.

Nuk është e pazakontë që Epic të sjellë një event të madh në lojë për të mbyllur sezonin, por asnjë nuk e priti atë që ndodhi në fund të Season 10. Si fillim, një meteor gjigand ra në hartën e Fortnite, duke shkatërruar çdo gjë. Më pas, gjërat u bënë të çuditshme. E gjithë harta u shkatërrua dhe u zhduk. Ajo që mbeti pas ishte vetëm një vrimë e zezë.

Ndërkohë që serverat e Fortnite ishin mbyllur, llogaria zyrtare në Twitter u fshi dhe një vrimë e zezë misterioze u transmetua në livestream – Fortnite kishte vdekur. Shumica menduan se kjo do të zgjaste vetëm disa orë, por pas 48 orësh, fansat u shqetësuan, pasi mendonin se Fortnite mund të kishte vdekur përgjithmonë.

Por, siç e dini, Fortnite nuk vdiq atë natë, por rilindi. Por, gjatë asaj periudhe 48 orëshe qetësie, interneti u çmend. Eventi solli një total prej 7 milionë shikuesish njëherësh në platforma të ndryshme streaming, duke thyer rekorde shikueshmërie në Twitch dhe Twitter.

Gjatë atyre 48 orëve që nuk dukej sikur do të mbaronin, interneti u dominua nga Fortnite. Disa e përgëzuan këtë event si një sukses marketingu, ndërkohë që të tjerë kritikuan Epic sepse qëndruan të qetë për shumë gjatë. Thuajse kushdo ishte duke folur për Fortnite, deri në ardhjen e Fortnite Chapter 2.

I sjellë së bashku me lançimin e Fortnite Chapter 2, skill-based matchmaking system kishte si qëllim të ndryshonte mënyrën se si krijoheshin ndeshjet, duke vendosur përballë njëri-tjetrit lojtarët me të njëjtën aftësi dhe eksperiencë. Kjo mund të jetë shumë e mirë për shumicën e lojtarëve, por jo për streamers.

Një prej kundërshtarëve më të mëdhenj të skill-based matchmaking në Fortnite ishte vetë Tyler ‘Ninja’ Blevins. Në një intervistë, Ninja tha se kjo po i bënte lojërat “sweatier“. Ai thotë: “skill-based matchmaking tani për tani thjesht zgjat pritjen, ju bën të luani ndaj lojtarëve më të mirë nëse jeni i mirë dhe po e kthen Team Rumble në Arena pa Siphon“.

Një tjetër streamer i cili shprehu mendimin e tij ishte Nicholas ‘Thiefs’ Smorto, pjesëtar i FaZe Clan. Thiefs iu drejtua Twitter për t’u ankuar për matchmaking në Fortnite, madje duke thënë se po e shkatërronte lojën. “Ju po shkatërroni vetë lojën tuaj,” – tha Thiefs. “Skill-based matchmaking nuk është argëtues dhe as i mirë për lojën. Lojtarët duan të luajnë për qef, por loja nuk është më qef“.

Alastair ‘Ali-A’ Aiken, një YouTuber për Fortnite mbi 5 milionë subscribers, gjithashtu iu drejtua Twitter, duke thënë se “skill-based matchmaking është gjëja më e keqe që është shtuar në Fortnite“. Ai e mbylli mendimin e tij duke thënë: “është një rreth vicioz i lojërave sweaty në Fortnite dhe nuk më pëlqen kjo gjë“.

Megjithatë, jo të gjithë janë dakord me mendimin e streamers për këtë situatë, madje duke thënë se ata thjesht duan të marrin vrasje të lehta.

Një përdorues në Twitter madje i përgjigjet Ali-A duke i thënë se po e shijojnë lojën më shumë se kurrë falë sistemit të ri të matchmaking. Gjithashtu, ai thotë se shumica e lojtarëve e pëlqejnë SBMM (skill-based matchmaking).

Ali-A thotë se e kupton, por gjithashtu thotë gjithashtu thotë se është diçka shumë e keqe për lojtarët më të mirë të cilët kanë kohë që luajnë për t’u përmirësuar, por përfundojnë gjithmonë në ndeshje të mbushura.

Duket se të dyja palët kanë një farë të drejte. Për lojtarët e rëndomtë, është mirë të luash ndeshje pa vdekur menjëherë nga lojtarët më të mirë. Ndërkohë, lojtarët me eksperiencë po luajnë çdo lojë me kundërshtarë të fortë, duke e bërë të pamundur të luash ndeshje për qef.

Pavarësisht nëse e pëlqeni sistemin e ri të matchmaking ose jo, duket se ai do të qëndrojë. Deri më tani, Epic nuk ka thënë asgjë që të bën të mendosh se ata do ta heqin skill-based matchmaking.

Përtej debateve rreth matchmaking, një gjë për të cilën i gjithë komuniteti bie dakort është mungesa e patch notes në Fortnite që prej lançimit të Fortnite Chapter 2. Nëse nuk e dini se çfarë po ndodh, në sezonet e mëparshme Epic postonte çdo javë patch notes në website për t’i treguar ndryshimet që po vinin në lojë, diçka shumë standarte.

Megjithatë, që prej lançimit të Chapter 2, zhvilluesit kanë qënë të heshtur kur vjen puna tek ndryshimet e fundit. Për shëmbull, zhvilluesit shtuan Harpoon Gun në Fortnite, të cilin lojtarët kishin kohë që e kërkonin. Megjithatë, Epic nuk tha asgjë dhe një lojtar e gjeti rastësisht armën në lojë.

Për disa, mund të jetë interesante që të hapësh lojën dhe të mos dish se çfarë të presësh. Megjithatë, për komunitetin e streamers dhe lojtarët kompetitivë, detajet kanë rëndësi. Për shëmbull, të dish nëse stats të një arme kanë ndryshuar është diçka mjaft thelbësore për lojtarët kompetitivë dhe ta zbulosh këtë gjë në mes të një turnamenti mund ta ngatërrojë shumë situatën.

Duket se Epic e ka vënë re këtë gjë dhe ka postuar disa patch notes për disa prej update-ve të fundit, por ka ende shumë gjëra që po ndodhin të cilat komuniteti do të donte t’i dinte.

Tani për tani, e ardhmja e Fortnite mbetet e paqartë. Në të shkuarën, mund të thonim me siguri se Fortnite do të sillte sezonin e ri me skin-e dhe shpërblime të reja, por loja do të mbetej e njëjtë. Tani, ky nuk është më një supozim i sigurt.

Epic e ka bërë të qartë se në Fortnite Chapter 2, kurrë nuk e di se çfarë të presësh. Sezoni i parë i Chapter 2 pritet të zgjasë deri në shkurt të 2020 dhe gjërat do të mbeten të qeta deri atëherë. Megjithatë, askush nuk e di se çfarë do të bëjë Epic kur Chapter 2: Season 1 t’i afrohet fundit dhe të nisë sezoni i ri.

Megjithatë, dimë që arena kompetitive do të vazhdojë të ekzistojë për shkak të kreativitetit të vazhdueshëm që sjellin patch-et dhe veçoritë e reja në lojë.