Nvidia lançon zyrtarisht shërbimin e tyre të streaming GeForce NOW

Ata duket se do të konkurrojnë me Google dhe Microsoft në cloud gaming

Google dhe Microsoft nuk janë të vetmet kompani që e shohin cloud gaming si të ardhmen e videolojërave. Nvidia gjithashtu është futur në këtë treg duke sjellë shërbimin e tyre GeForce NOW. Platforma e Nvidia është tani zyrtarisht në beta dhe ofron shërbim të ngjashëm me Google Stadia dhe Project xCloud, që është ende në fazën e preview. Kushdo që përdor këtë shërbim mund të luajë lojëra pa pengesë në PC, Mac, Android dhe televizor duke përdorur Nvidia Shield.

Ka 2 lloj antarësimesh në GeForce NOW, Free dhe Founders, të cilat lejojnë të dyja streaming në 1080p 60FPS. Nvidia thotë se ka si qëllim të suportojë edhe 4K dhe 1440p në të ardhmen, por ende do të duhet kohë.

Versioni falas i GeForce NOW i limiton anëtarët, pasi ata duhet të presin në rradhë dhe mund të luajnë vetëm një orë, pas së cilës loja mbyllet dhe lojtarët duhet të bëjnë sërish log-in. Nuk ka një limit se sa herë një person mund të luajë dhe menaxheri i PR për Nvidia GeForce NOW dhe Nvidia Shield Jordan Dodge tha se lojërat zakonisht zgjasnin më pak se një orë gjatë testimeve beta. Megjithatë, padyshim që nëse loja mbyllet në mes të ndeshjes së Forntite, padyshim që do të ishte diçka acaruese. Ndërkohë, GeForce NOW Founders do të mund të luajnë deri në 6 orë, si dhe të përfitojnë nga RTX ray-tracing. Kjo kushton $4.99 në muaj dhe do të konvertohet në GeForce NOW Premium pas një viti. Kjo ofertë është vetëm për një kohë të limituar, pra çmimi pritet të rritet në të ardhmen.

Një avantazh që GeForce NOW ka mbi Google Stadia është se ju mund të luani të gjitha lojërat që keni në Steam, GOG dhe Epic, për sa kohë ato suportohen nga GeForce NOW. Pra, ju nuk do të keni nevojë t’i bleni ato sërisht si me rastin e Stadia. Nvidia thotë se tani suporton më shumë se 1000 lojëra, përfshirë këtu edhe 30 lojëra free-to-play.