Ndryshimi i pamjes së Steam Library është vetëm pak javë larg

Një përmirësim i madh po vjen

Steam Library do të ndryshohet tërësisht dhe beta do të lançohet pas vetëm pak javësh. Kemi kohë që e presim këtë update që prej lajmërimit të tij në mars dhe kemi pasur dhe informacione të shpeshta gjatë kësaj kohe. Valve tani ka konfirmuar se do të vijë së shpejti dhe gjithashtu iu ka dhënë zhvilluesëve një tur të shpejtë.

Sipas Valve, Library “bashkon eksperiencën e lojtarëve në një lojë me përmbajtje dhe komunikata të reja nga zhvilluesit si dhe komunitetin e lojës në një faqe më të gjallë dhe më të dukshme“.

Kështu do të duket faqja e parë e Library:

Do të kemi një faqe qëndrore për koleksionin tonë të lojërave, çka duket si një version i përmirësuar dhe më i bukur i Grid View por që në njëjtën kohë të lejon të shikosh listën e lojërave në të majtë, pra është zgjidhja më e mirë. Kjo faqe do të jetë e ndryshueshme sipas preferencave, pra mund të përdorni filtra të ndryshëm për të ndryshuar se cilat lojëra shfaqen. Gjithashtu, në krye ka një banner që të tregon update-t e fundit për lojëra të ndryshme.

Ndryshime ka gjithashtu dhe për faqen e detajeve (ajo që del kur zgjedh një lojë në librari). Elemente si Steam Workshop dhe aktivitetet e fundit do të jenë ende aty, por mund të shikoni dhe abonimet tuaja ose të shikoni të gjithë mod-et që keni shkarkuar. Informacionet në lidhje me miqtë e tu dhe eventet brenda në lojë janë gjithashtu të dukshme fare lehtë. Zhvilluesit do të kenë mundësi ta ndryshojnë më lehtë këtë faqe, duke vendosur në të gjëra si logo dhe banner-a të ndryshëm.

Library momentalisht duhet thënë se është një rrëmujë e vërtetë dhe duket shumë e vjetëruar duke parë se pjesës tjetër të Steam i janë bërë ndryshime të shumta. Fakti që do të jetë më e lehtë të shohësh se çfarë po ndodh në lojërat që ke është gjithashtu mjaft i dobishëm për ata që kanë shumë lojëra në Steam.