Modeli Lockhart i Xbox Scarlett ende po zhvillohet nga Microsoft

Konsola pritet të jetë më e lirë dhe të ketë fuqinë e një PS4 Pro

Duket se planet e Microsoft për Xbox Scarlett kanë ndryshuar sërish, ose më saktë, nuk kanë ndryshuar fare, edhe pse menduam se ndryshuan. Përpara se Microsoft të konfirmonte zyrtarisht Xbox Scarlett, zërat po qarkullonin se Microsoft po punonte në dy modele, një sistem më të fortë të quajtur Anaconda dhe një opsion tjetër të quajtur Lockhart. Thënë më thjeshtë, Anaconda do të ishte Xbox One X i gjeneratës së ardhshme, ndërsa Lockhart do të ishte Xbox One S. Por më pas, kur Scarlett u konfirmua, nuk u përmend askund fakti që do të kishte 2 konsola dhe raportohej që Lockhart nuk do të zhvillohej.

Sipas gazetarit të Kotaku Jason Schreier, ende po punohet për modelin Lockhart. Sipas një zhvilluesi anonim që po punon në platformën e gjeneratës së ardhshme të Microsoft, Lockhart do të ketë thuajse të njëjtën fuqi me një PS4 Pro, me zhvilluesit që presin që konsola të përballojë 1440p në 60 fps, ndërkohë që Anaconda do të përballojë 4K në 60 fps. Lockhart do të ketë disa përmirësime në krahasim me konsolat e sotme, pasi do të ketë një CPU më të shpejtë dhe një SSD, por ende do të jetë më e dobët se Anaconda. Gjithashtu raportohet se të gjitha lojërat e Anaconda do të mund të luhen edhe në Lockhart.

Mesa duket, Lockhart nuk do të ketë vend për disqe dhe do të jetë kryesisht një konsolë për streaming me Xbox Game Pass dhe xCloud. Kjo është mjaft interesante, pasi ka pasur zëra se Microsoft po punonte për një konsolë streaming shumë të lirë (më pak se $100) për Game Pass/xCloud. Ka mundësi që planet e Microsoft të kenë ndryshuar dhe ata të kenë ringjallur Lockhart për ta kombinuar me këtë konsolë.

Asgjë ende nuk është konfirmuar, por Schreier është i njohur për saktësinë e tij. Ndërkohë, Microsoft ka dhënë një koment standart, duke thënë se “nuk komenton rreth zërave dhe spekulimeve“.