Microsoft fajëson Fortnite për rëniet në shitje

Fitimet e Microsoft në gaming kanë rënë me 3% dhe Fortnite mendohet të jetë fajtore për këtë.

Të thuash që Fortnite është një nga lojërat më të mëdha të momentit nuk është ndonjë gjë e re. Çdo person në këtë botë ose e ka luajtur ose e di se çfarë është. Ekonomia dhe xhiroja e parasë që kalon në këtë lojë pastaj është gjithashtu është masive, ndoshta aq e madhe sa po shkakton edhe rënien e shitjeve të lojërave të tjera.

Të paktën kështu sugjerohet nga ana e Microsoft, që në fitimet e çerekut të parë të 2019s, fajësoi Fortnite për një rënie me 3% në fitime në aspektin e gaming. Kjo u krahasua me shifrat e vjetshme. Pra ose Fortnite është rritur me hapa të konsiderueshëm brenda vitit, ose Microsoft nuk kishte dhe aq shumë për t’ju ofruar njerëzve këtë vit.

Sipas statistikave në raportin financiar që publikoi Microsoft, fitimet e gaming kishin rënë përgjithësisht me 10%. Shitjet e hardware-it të Xbox pastaj me plot 48%. Gjithsesi kjo është një rënie e kuptueshme kaq pranë gjeneratës së ardhshme.

Përsa i përket shitjeve të Fortnite dhe Microsoft, ky i fundit u shpreh se: “Fitimet nga software-t dhe shërbimet kanë rënë me 3% për shkak të një lojë.” Sado që në raportim nuk përmendej emri specifik i lojës në fjalë, ishte analisti Daniel Ahman që konfirmoi në Twitter se bëhej fjalë për Fortnite.

Gjithsesi jo çdo gjë ishte keq në raportin financiar të Microsoft, pasi në të përmendej edhe suksesi në rritje i Xbox Game Pass, Xbox Live, Xbox Ultimate dhe Game Pass për PC.

Sipas CEO së Microsoft, kompania e shikon Game Pass si një model të ri biznesi dhe se Microsoft është në pozita mjaft të mira për të përfituar nga avantazhet që ky treg ka për të ofruar. Shpresat janë të larta edhe për Project xCloud. Gjithsesi nëse ndonjë nga këto dështon vitin e ardhshëm, le të shpresojmë që nuk do ja hedhin fajin Fortnite.