Mbështesni GameON Albania duke përdorur kodin support-a-creator: GAMEONALBANIA
Po kerkoni për diamante në Free Fire Falas?! Klikoni këtu për të marrë pjesë në Giveaway për Free Fire Diamonds
Megjithatë, të gjithë lojtarët e Juventus do të jenë gjithsesi në FIFA 20
Rivaliteti midis PES dhe FIFA është ndër më të mëdhenjtë në botën e videlojërave. Të dyja lojërat e futbollit janë çdo vit në konkurrencë të fortë për të parë se cila është loja më e mirë e këtij zhanri. Gjatë viteve të fundit, ka qënë FIFA ajo që ka mbizotëruar, me anë të veçorive si The Journey dhe Ultimate Team, por dhe nëpërmjet licensave zyrtare të ligave dhe skuadrave. Megjithatë, duket se ky hendek midis dy lojërave sa vjen e po ngushtohet, me PES që tanimë duket se po fiton vërtet terren, duke marrë licensat zyrtare të disa skuadrave të mëdha.
Pasi u prezantua me Barcelonën si ekipin e parë zyrtar të lojës dhe zyrtarizoi Messi-n dhe Ronaldinho-n në cover-in e lojës, PES 2020 gjithashtu arriti të marrë licensat e Bayern Munchen, Arsenal e Manchester United ndër ekipe të tjera. Megjithatë, PES gjithashtu vjen me një goditje tjetër të madhe, duke zyrtarizuar Juventus si partner ekskluziv të lojës.
Ditën e djeshme, Juventus lajmëroi një bashkëpunim ekskluziv me Konami dhe siguroi se PES 2020 do të jetë e vetmja lojë ku do të gjejmë logon, emrin dhe bluzën e ekipit. Kjo do të thotë se ekipi nuk do të jetë aspak pjesë e FIFA 20. Për këtë arsye, EA ka zbuluar Piemonte Calcio, ekipin zëvendësues të Juventus.
Edhe pse FIFA nuk do të ketë ekipin, ajo do të ketë gjithsesi futbollistët, pasi ata nuk janë ndikuar nga marrëveshja me PES. Pra, emra popullorë për lojtarët e Ultimate Team si Cristiano Ronaldo dhe Paulo Dybala do të jenë ende pjesë e lojës në FIFA 20, edhe pse Juventus thotë në deklaratën zyrtare se lojtarët në PES kanë kaluar një skanim të plotë 3D të trupit, për t’i rikrijuar ata në mënyrë sa më të saktë brenda lojës.
Piemonte Calcio thjesht do të zejë vendin e Juventus në FIFA 20 dhe sipas EA do të funksionojë normalisht si çdo ekip tjetër. Lojtarët e ekipit nuk do të kenë asnjë problem me Chemistry në Ultimate Team, Overall i tyre në lojë do të ndryshojë në varësi të performancës së tyre në botën reale dhe ekipi mund të luhet si normalisht në Career Mode.
PES ka qenë zakonisht në hijen e FIFA këto vite, sidomos për sa i përket licensimit zyrtar të ekipeve dhe ligave të ndryshme. Megjithatë, një bashkëpunim ekskluziv me një emër të madh të fubotllit padyshim që do i bëjë lojtarët t’i hedhin një sy lojës.
Duke patur parasysh se Barcelona është ekipi i parë i zyrtarizuar i PES dhe se Messi do të jetë në cover-in e lojës e ndërkohë Juventus ka një bashkëpunim ekskluziv me Konami, çka do e ndalojë Cristiano Ronaldo të jetë në cover-in e FIFA 20 si vitin e kaluar, cila do të jetë zgjidhja e FIFA? Cilët lojtarë do të zgjedhë EA për të zëvendësuar dy yjet e futbollit botëror si imazh i lojës?
FIFA 20 do të vijë në 27 shtator. PES 2020 do të vijë pak më herët, në 10 shtator, ndërkohë që një demo e lojës do të lançohet në 30 korrik.
