Kina limiton orarin e gaming për minorenët në 1 orë në ditë

Qeveria kineze ka nxjerrë një ligj të ri në lidhje me lojërat e minorenëve dhe është një nga më të ashprit deri më tani. Ndërsa industria e lojërave ne Kinë është ne një rritje drastike gjatë dy viteve të fundit, ka pasur një debat nëse lojtarët minoren duhet të kontrollohen më rreptësisht përsa i përket mënyrës se si e kalojnë kohën e tyre të lirë.

Qeveria kineze, ose, më saktë, Administrata Kombëtare e Shtypit dhe Publikimit (NPPA), organi kryesor rregullator i Kinës për të gjitha llojet e mediave, përfshirë video lojërat, ka nxjerrë një sërë rregullash që po forcojnë rregullat tashmë kufizuese nga viti 2019, në lidhje me lojërat e fëmijëve dhe adoleshentëve (nën 18 vjeç). Rregulloret e mëparshme përcaktuan se të miturit nuk lejohen të luajnë lojëra online për më shumë se 90 minuta në ditë ose 3 orë në pushimet e ligjshme. Me rregullat e reja, lojtarët e rinj në Kinë janë praktikisht të ndaluar nga bota e lojërave online, pasi tani do të lejohen të luajnë lojëra vetëm gjatë fundjavave dhe vetëm një orë në ditë.

Sipas ligjit të ri, lojtarët nën moshën 18 vjeç e kanë lojën e tyre të kufizuar në mes të orës 20:00 dhe 21:00 dhe vetëm të Premteve, të Shtunave, të Dielave dhe festave kombëtare, që do të thotë se ata janë të kufizuar për të luajtur lojëra video vetëm 3 orë në javë.

Zhvilluesit më të mëdhenj kinezë të lojërave, Tencent, NetEase dhe Bilibili, të gjithë kanë sisteme të ndryshme që mund të kontrollojnë kohën e lojërave të të miturve, por të gjithë theksojnë se kjo nuk do të ndikojë negativisht në biznesin e tyre, pasi të miturit përfshijnë një pjesë të papërfillshme të klientëve të tyre. Tencent deklaroi se lojtarët nën 16 vjeç përbëjnë vetëm 2.6% të numrit të tyre të përgjithshëm të lojtarëve në Kinë, ndërsa Bilibili pohoi se lojtarët nën 18 vjeç kontribuojnë më pak se 1% të të ardhurave të tyre të përgjithshme të lojërave.