Ky analist thotë se PS5 mund të mbyllë luftën e konsolave

Shitjet e PS5 parashikohet të kalojnë 200 deri në 300 milionë brenda 5-6 viteve, me konsolën që ka potencialin të shesë mbi 600-700 milionë njësi në të ardhmen.

Të paktën kjo është ajo që po thotë analisti japonez nga Rakuten Securities Economic Research Institute, Norio Imanaka. Muajin e shkuar ai sugjeroi se konsola do të shesë afërsisht 200 milionë njësi gjatë ciklit të tij të jetës, por Imanaka parashikon numra më të mëdhenj, që edhe mund të mbyllin luftën e konsolave.

Sipas mendimit optimist të analistit, konsola e gjeneratës së ardhshme e Sony mund të dominojë skenën e eSports, me konsolën që do të përdoret si zëvendësuese për PC, duke e zgjeruar kështu edhe më tej ciklin e saj të jetesës. Imanaka shkruan se ashtu si fansat e NBA duan këpucë nga Nike, fansat e eSports do të duan PS5.

Sado që nëse arrin të shesë 200 deri në 300 milionë njësi të PS5, do të ishte një arritje mëse e madhe për Sony, analisti i çon gjërat më tej duke parashikuar një total shitjesh prej 600-700 njësi.

Sipas tij kjo mund t’i japë fund përgjithmonë luftës së konsolave me Sony, Microsoft dhe Nintendo.

Numra tepër masivë po ta mendosh. Gjithsesi, kurrë nuk i dihet se si ecin punët.

PS5 do të lançohet në 12 nëntor në SHBA, Japoni, Kanada, Meksikë, Australi, Zelandën e Re dhe Korenë e Jugut. Në pjesën tjetër të botës do të vijë në 19 nëntor.