Zbulohet Gamer Girl, ku ju luani si moderator i një streamer-eje

Kjo është mbase një prej videolojërave më të çuditshme të krijuara ndonjëherë

Gamer Girl, e krijuar nga Wales Interactive dhe FMV Future, ju vendos në rolin e moderatorit për një streamer-e të quajtur Abicake99. Edhe pse një prej premisave të lojës është moderimi i chat-it të saj, bërja ban e përdoruesëve acarues dhe dhënia e ideve për ta rritur atë si streamer në një platformë joreale, premisa tjetër është një histori intensive me disa degëzime, e cila përpiqet të zbulojë rrezikun që i kanoset streamer-es nga një person anonim që fshihet në chat-in e saj.

Trailer-i i lojës, të cilin mund ta shihni më poshtë, tregon se si ndryshon marrëdhënia juaj me Abicake99 ndërkohë që ajo bëhet më popullore dhe gjithashtu tregon disa prej momenteve të historisë së lojës, ku ju shiheni duke shkuar në party, duke vendosur nëse ajo duhet t’i përgjigjet telefonatave me numër privat, si dhe duke e parë atë të futet në një shtëpi të frikshme.

Wales Interactive, të cilët janë të specializuar në lojëra FMV, gjithashtu thonë se disa prej skenave reale ishin të improvizuara plotësisht nga aktorët, me të vetmen referencë që ishin mesazhet e chat-it të stream-it.

Studioja thotë se loja, e cila ka katër vite në zhvillim dhe ka patur dhjetëra streamers femra të përfshira, do të ketë një histori frymëzuese.

Në Twitter, Wales Interactive thonë se qëllimi i lojës është adresimi i disa prej problemeve kryesore në industrinë e streaming. Këto përfshijnë impaktin e komenteve të përdoruesëve në shëndetin mendor të streamers dhe toksicitetin e komunitetit.

Megjithatë, lajmërimi për lojën nuk u prit mirë. Trailer-i është hequr nga kanali zyrtar i PlayStation Europe dhe loja nuk përmendet fare në website-in e Wales Interactive.