FIFA 20 mund të humbasë 3 legjenda të futbollit ndaj PES 2020

A po fiton PES shumë terren?

FIFA dhe Pro Evolution Soccer janë dy rivalët më të mëdhenj në lojërat e futbollit. Edhe pse FIFA ka disa vite që është në krye, duket se diferenca midis dy prej konkurrentëve të mëdhenj të botës së videolojërave sa vjen e po ulet, pas disa marrëveshjeve vërtet të mira nga ana e PES 2020.

Konami, publikuesi i PES 2020, zbuloi në Twitter tre legjenda që do të bëhen pjesë të lojës së ardhshme, të cilat janë të lidhura ngushtë me bashkëpunimet e lojës me Manchester United, Bayern Munich dhe Juventus.

David Beckham, i cili ishte gjithashtu pjesë e PES 2019 David Beckham Edition, do të përfaqësojë Djajtë e Kuq si një lojtar legjendar në PES 2020. Portier legjendar i Bayern Munich dhe Gjermanisë, Oliver Kahn, do të jetë lojtari legjendar i zgjedhur për kampionët në fuqi të Gjermanisë dhe ish-mesfushori çek i Juventus Pavel Nedved do të përfaqësojë Zonjën e Vjetër të Italisë.

Bashkëpunimet e Pro Evolution Soccer me Manchester United dhe Bayern Munich nuk janë ekskluzive me publikuesin japonez Konami, çka do të thotë se David Beckham dhe Oliver Kahn mund të shfaqen dhe në FIFA 20 Ultimate Team. E njëjta gjë nuk mund të thuhet për Pavel Nedved, pasi Juventus ka një bashkëpunim ekskluziv me PES 2020. Pra, është e sigurt që legjenda e bardhezinjve nuk do të jetë në lojën e Electronic Arts.

Vlera e Electronic Arts ra me shifra marramendëse vetëm pak orë pasi humbi të drejtën për të pasur Juventus në lojë. Ekipi do të zëvendësohet me Piemonte Calcio, që do të ketë një logo dhe uniformë të veçantë. Megjithatë, lojtarët do të qëndrojnë po të njëjtët.

PES 2020 do të lançohet në 10 shtator për Playstation 4, Xbox One dhe PC, ndërsa FIFA 20 do të lançohet rreth 2 javë më vonë, në 27 shtator për Nintendo Switch, Playstation 4, Xbox One dhe PC.