CD Projekt synon të sjellë Cyberpunk 2077 në shtator, pavarësisht pandemisë

Vonesat për lançimin e disa prej lojërave më të shumëpritura janë duke ndodhur për shkak të pandemisë së COVID-19 dhe ka shumë gjasa që do të vazhdojnë. Gjithsesi planet e CD Projekt RED mbi lançimin e Cyberpunk 2077 në shtator nuk kanë ndryshuar.

“Planet tona nuk kanë ndryshuar,” ka thënë CEO i CD Projekt Asam Kiciński në raportin e fundit financiar të kompanisë. “Së pari kemi si qëllim të sjellim Cyberpunk 2077 në shtator. Ndjehemi të motivuar dhe kemi mjetet e nevojshme në dispozicion për ta plotësuar këtë qëllim. Gjithashtu besojmë se strategjia jonë për të shmangur borxhet dhe për të mbledhur sa më shumë rezerva parash, na bën më të përgatitur për tu përballur me situata të vështira.”

Cyberpunk 2077 u vonua këtë vit nga data 16 prill që ishte caktuar për lançim, në 17 shtator. Në atë kohë zhvilluesit thanë se loja ishte gati dhe e luajtshme, por se ende kishte punë për të bërë. Shumica e lojërave si The Last of Us Part II, tashmë janë futur në periudhën e papërcaktuar të shtyrjes së datës së lançimit, për shkak të pandemisë së COVID-19.

Mbetet të shohim se si do të ecë kjo situatë në muajt e ardhshëm, por duket se Cyberpunk 2077 është e bindur për të ardhur në kohën e premtuar.