CD Projekt Red do të zhvillojë më shumë lojëra Witcher dhe Cyberpunk

Zhvilluesi po ndjek një model të ri me 2 seri kryesore

Tashmë që po vjen fundi i zhvillimit të Cyberpunk 2077, CD Projekt Red duket se do të përdorë një model me 2 seri kryesore. Kjo konfirmon si për investitorët ashtu edhe për fansat se më shumë lojëra The Witcher dhe Cyberpunk pritet të vijnë së shpejti. Ky drejtim i ri u zbulua me krenari në raportin financiar të CD Projekt Capital Group që mbulonte gjysmën e parë të 2019.

“Të menaxosh dy seri të veçanta, së bashku me disa studio të pavarura zhvillimi, i lejon kompanisë të punojë paralelisht në disa projekte dhe të lançojë më lehtë lojëra në të ardhmen,” – tha kompania. “Ky migrim drejt një modeli me 2 seri kryesore të mbështetura nga disa produkte të tjera të pavarura gjithashtu e lejon organizatën të optimizojë prodhimin dhe aktivitetet financiare, ul risqet e saj dhe e bën më të lehtë arritjen e qëllimeve të kompanisë.”

Në terma më të thjeshtë, duke punuar vetëm në dy seri shumë të mira, CD Projekt Red nuk do të ketë më probleme me organizimin e punës dhe me fitimet e tyre si kompani, gjë që padyshim është një lajm i mirë për të gjithë.

Informacione të tjera interesante përfshijnë faktin që shitjet e The Witcher 3: Wild Hunt janë në rritje në krahasim me vitin e kaluar. Kjo do të thotë se seria vazhdon të sjellë fitimet kryesore të kompanisë. CD Projekt Red thotë se kjo rritje ka ardhur për shkak të konsumatorëve të rinj që kanë zbuluar projektet e mëparshme të kompanisë për shkak të promovimit të Cyberpunk 2077. Këto fitime kanë bërë më të lehtë zhvillimin e të gjithë projekteve të kompanisë. Një prej shpenzimeve të tyre kryesore pas Cyberpunk 2077 është sjellja e Gwent: The Witcher Card Game në mobile.

Cyberpunk 2077 pritet të dalë në 16 prill 2020 në Playstation 4, Windows PC, Xbox One dhe Google Stadia. Megjithatë, ne ende nuk e dimë se cili është projekti i ardhshëm i studios, por ende ka kohë për të menduar për këtë.