mortal-kombat-11-review
Reviews

Mortal Kombat 11 Review

Që prej lançimit të series plot 27 vite më pare, Mortal Kombat gjithmonë është njohur nga gamers si ajo loja ku mund ta vrasësh kundërshtarin në 1000 mënyra të ndryshme, njëra më brutale se tjetra. E njohur më shumë për dhunën sesa për vetë gameplay-n, duket se gjërat kanë ndryshuar këto vitet e fundit, me Mortal Kombat 9 dhe Mortal Kombat X që kanë rritur kualitetin e gameplay-t të tyre duke arritur të njëjtin nivel me atë të dhunës. Ky trend duket se ka vazhduar edhe në lojën më të fundit të serive, Mortal Kombat 11, e cila është loja më e mirë e serisë Mortal Kombat derimë tani dhe mbase loja më e mirë e NetherRealm në tërësi. Mortal Kombat 11 është mbase loja më e kompletuar fighting derimë sot duke i ofruar si lojtarëve të thjeshtë e të rëndomtë, por edhe atyre profesionistë e veteranë të kësaj serie argëtim për një kohë të gjatë.

Mortal Kombat 11 është një lojë fighting dhe NetherRealm duket se e ka pasur më së miri këtë gjë parasysh, duke i dhënë dyluftimeve rëndësinë e duhur. Dyluftimet janë më agresive se kurrë dhe goditjet janë të forta, si në dukje por dhe në dëmin që shkaktojnë. Megjithatë, Mortal Kombat 11 nuk është një lojë fighting ku gjithçka ndodh shumë shpejt dhe në fund të duket sikur nuk kupton asgjë. Zoning (mbajtja e distancës dhe hedhja e sendeve drejt kundërshtarit) vazhdon të jetë i rëndësishëm, por luftimet pranë vazhdojnë të jenë mbizotëruese. Loja gjithashtu përfshin Fatal Blows, të cilat mund të përdoren në fund për të kthyer ndeshje të cilen duken të pamundura për t’u fituar, ose thjesht për të mundur një kundërshtar me stil. Mënyra si funksionon mbrojtja në lojë të detyron të jesh agresiv dhe lëvizjet më të pakta, pra krijimi i distancës është më i vështirë dhe je i detyruar të luftosh gjatë gjithë kohës, çka i bën luftimet në Mortal Kombat 11 gjithmonë argëtuese, pa pasur asnjë ndalesë.

Kur lexon këtë review dhe nuk ke luajtur kurrë më parë një lojë Mortal Kombat, mund të duket sikur loja ka disa koncepte të pakuptueshme dhe është shumë e ndërlikuar. Nuk e keni gabim, por mos kini frikë. Në Mortal Kombat 11 do të gjeni një prej sistemeve më të kompletuar dhe më të mirë ndonjëherë të tutorials, të cilat të shpjegojnë literalisht çdo gjë. Duke u bazuar te puna e mirë me Injustice 2, NetherRealm ka përdorur një sistem të ngjashëm dhe një seri të kompletuar në çdo aspekt i cili të mëson çdo gjë, që nga goditjet e thjeshta në teknika më të vështira si menaxhimi ritmit të një ndeshjeje në tërësi, strategji për të ndryshuar ose vazhduar luftimin në të njëjtin ritëm (daljen nga cepa të vështirë ose nga vende ku goditesh me sende vazhdimisht) dhe ndërtimi i kombove të ndryshme në varësi të situatave. Gjithashtu, mund të gjesh dhe tutorials mbi koncepte nga më të ndërlikuarat dhe që kërkojnë një nivel të lartë kompetence në lojëra të tilla, siç janë frame data dhe se si ajo funksionon në një mënyrë të qartë dhe vizive. Jo vetëm kaq, ka dhe tutorials se si të përdorësh gjithçka që ti ke mësuar gjatë këtyre tutorials në një ndeshje të vërtetë dhe në situata praktike. TutorialsMortal Kombat 11 janë një enciklopedi e tërë, e cila nuk e bën vetëm lojën më të kuptueshme, por të japin një kuptim më të gjërë dhe të saktë të mekanikave në lojërat fighting në përgjithësi. Pra, kjo lloj diturie që mësohet në Mortal Kombat 11 mund të përdoret ku ju të dëshironi.

Për sa i përket metrit, një prej aspekteve më të rëndësishme të lojërave Mortal Kombat, Mortal Kombat 11 ka dy të tillë, një për mbrojtje dhe një për sulm. Secili prej tyre ka dy ndarje, të cilat mbushen sërish me kalimin e kohës. Disa prej lëvizjeve dhe mekanikave më interesante të lojës përdorin metrin. Pra, për të përmirësuar dhe forcuar një goditje ose për të vazhduar një kombo mund të të duhet të përdorësh një ndarje të metrit, ndërsa për të bërë një breakaway për të ndaluar një kombo duhet të përdorësh të dyja ndarjet e metrit mbrojtës. Sistemi unik i metrit në Mortal Kombat 11 është padyshim intrigues dhe mbase pak më kompleks seç duhet, por megjithatë e bën lojën edhe më strategjike, çka duhet se është rruga që NetherRealm ka dashur të ndjekë me këtë lojë. Fatal Blows janë gjithashtu mjaft interesante, duke qënë se ato mund të përdoren vetëm një herë gjatë ndeshjes. Vetëm ideja që kundërshtari yt mund të përdori një Fatal Blow nga momenti në moment të bën të jesh shumë më i kujdesshëm gjatë një luftimi. Lojrat e mendjes janë vërtet të rëndësishme në Mortal Kombat 11.

Si me çdo lojë tjetër nga NetherRealm, historia është padyshim mbresëlënëse. Duhet thënë se nuk është nga ato histori që të mallëngjejnë ose të japin një mesazh për jetën, por përkundrazi i ngjan atyre filmave që i shikon për qef. Në Story Mode NetherRealm nuk ka ofruar ndonjë inovacion të ri, por ofrohen plotë 6 orë argëtim dhe aktrim i mirë (përveç aktrimit të Sonya Blade që u luajt nga ish-luftëtarja e UFC Ronda Rousey). Megjithatë, më e rëndësishmja është se çdo personazhi të Mortal Kombat 11 i jepet rëndësia dhe vëmendja e duhur. Historia e lojës nis aty ku mbaron ajo paraardhësja dhe shpejt na prezantohet një personazh i ri, Kronika, një krijesë me fuqi të plotë mbi kohën që ka në plan të rishkruajë sërish historinë (literalisht), për shkak se Raiden ka prishur balancën ndërmjet së mirës dhe së keqes kur i preu kokën Shinnok në fillim të lojës. I gjithë ky konflikt na çon drejt një përzierje të së shkuarës me të tashmen duke na dhënë disa momente vërtet interesante ku personazhet e të tashmes takojnë versionet e tyre në të shkuarën dhe gjithashtu momente ku personazhe të të shkuarës shikojnë realitetin e hidhur që i pret ata në të ardhmen. Diskutimet dhe gallatat e Johnny Cage-it të ri dhe të vjetër, vëllazëria midis Liu Kang dhe Kung Lao dhe marrëdhëniet e ndryshme prindër fëmijë të lënë të kërkosh më shumë, por në fund të ditës historia e Mortal Kombat 11 është e balancuar në mënyrë perfekte ndërmjet qesharakes dhe argëtueses pa qënë e bezdisur.

Lista e personazheve të Mortal Kombat 11 përfshin disa prej emrave më të njohur dhe të parapëlqyer për publikun, së bashku me disa prej më të spikaturve të Mortal Kombat X si Erron Black dhe D’Vorah. Tre personazhe të rinj shtohen në lojë për ta zgjeruar këtë listë. Këta janë Geras, që ka aftësinë të kthejë mbrapa dhe manipulojë kohë, Cetrion, motra e Shinnok me aftësi të bazuara tek elementet dhe Kollector-I I tmerrshëm me gjashtë krahët e tij demonikë, të cilët i shtojnë më shumë variatet ndërmjet ninxhave magjike dhe ushtarakëve që kemi hasur deri më tani në Mortal Kombat. Në luftime, Mortal Kombat 11 ju jep mundësinë të zgjidhni midis disa lëvizjeve speciale për çdo personazh të cilat ndryshojnë mënyrën sesi ato luhen. Megjithatë, në ndeshje kompetitive online ju mund të zgjidhni vetëm ndërmjet dy sete të parapërcaktuara nga vetë loja.

Pasi mbaroni me tutorialet dhe historinë, tashmë mund të futeni në atë çka quhet vërtet Mortal Kombat 11. Për shkak të mode-ve të ndryshme që ofron loja, fillimisht mund të ndiheni konfuzë. Gjithashtu, në këtë pikë vë re se loja ofron llojin e vet të monedhave. Mortal Kombat 11 mund dhe duhet të riluhet vazhdimisht për një arsye kryesore: për të bërë grind. Loja është kthyer në një përzierje të çudtishme midis një loje fighting dhe një RPG ku ka rëndësi farming, crafting dhe krijimi i setve për personazhe të ndryshëm. Përveçse Klassic Towers, ku ju ndesheni me kundërshtarë sipas rradhës për t’u përballur me Kronika, keni mundësi të luani Towers of Time, aty ku ndodh grind-i i vërtet i lojës. Duhet thënë se pas problemeve që loja hasi fillimisht me këtë mode i cili nuk ishte aspak i drejtë, NetherRealm ka lançuar më herët një patch i cili ka rregulluar shumicën e këtyre problemve duke e bërë Towers of Time më të balancuar dhe më argëtuese. Gjithashtu, loja ofron dhe Krypt, një mode third-person ku ju zgjidhni “puzzle” si të jetë një lojë aventurë, për të hapur edhe më shumë sende të ndryshme për personazhet. Krypt është një rikrijim i ishullit të Shang Tsung ku është zhvilluar loja e parë Mortal Kombat.

Edhe pse duket sikur loja ka plot microtransactions, duhet thënë se e vetmja gjë që mund të blehet janë Time Krystals, të cilat janë shumë të rrallë në lojë dhe mund të përdoren për të blerë skin-e, Brutalities të ndryshme, sende dhe Easy Fatality Tokens, të cilat e bëjnë më të lehtë përdorimin e Fatalities. Edhe pse duket si diçka e padrejtë, e vetmja gjë e padrejtë në Mortal Kombat 11 është koha që duhet për të bërë grind, e cila është shumë, shumë e gjatë. Duhet të luash çdo ditë dhe të jesh i vëmëndshëm ndaj sendeve në shitje dhe sfidave të ndryshme për të marrë rezultate nga loja, gjë e cila është e vështirë për disa lojtarë.

Konkluzion

Në përgjithësi, Mortal Kombat 11 nuk është vetëm një lojë për fansat e dedikuar të serisë dhe të lojërave të NetherRealm, por gjithashtu një lojë e mirë për këdo që do të futet në botën e lojërave fighting. Mekanikat e thjeshta dhe tutorial-et e shumtë e bëjnë lojën vërtet të aksesueshme dhe për ata që e luajnë për herë të parë. Historia mbresëlënëse dhe argëtuese të mban të tërhequr gjatë gjithë kohës dhe lista e personazheve ofron mjaftueshëm variatet dhe kushdo mund të gjejë të preferuarin e tyre. Nëpërmjet Krypt dhe Towers of Time mund të luhet disa herë, por për të progresuar është i nevojshëm grind-i për një kohë të gjatë. Megjithatë, kjo nuk duhet t’ju dekurajojë nga blerja e kësaj loje, e cila në vetvete është një nga lojërat më të mira fighting ndonjëherë. Nëse jeni një person që ju pëlqejn lojërat fighting, nuk duhet ta humbisni për asnjë arsye.

Kjo review është bërë në versionin për Playstation 4Mortal Kombat 11. Loja është mundësuar për review nga Albagame. Për ta blerë klikoni këtu.