Ndryshimet e Fortnite në Competitive shkaktojnë polemika

Epic po përpiqet të ndalojë sinjalizimet

Loja popullore battle royale e Epic Games, Fortnite, po sjell disa ndryshime të mëdha në turnamentet kompetitivë të 2020. Kompania po përpiqet të heqë hilet duke ndëshkuar lojtarët që sinjalizojnë njëri-tjetrin duke luajtur në turnamente zyrtare.

Në një postim, Epic tha se kishte zbuluar vitin e kaluar se lojtarët i dërgonin sinjale njëri-tjetrit gjatë turnamenteve. Lojtarët në ekipe të kundërta godisnin me pickaxe, përdornin një emote, hidhnin toys ose thjesht kërcenin për t’i treguar lojtarit tjetër të mos qëllonte.

Këtë vit, Epic do të ndëshkojë çdo komunikim brenda lojës. Këtu përfshihen goditjet e pickaxe, emote-t, hedhja e toys dhe kërcimi, por edhe mënyra të tjera. Lojtarët të cilet kapen do të marrin një ndëshkim për “collusion”, ndërkohë që rastet e përsëritura do të marrin ndëshkime më të rënda sipas Epic.

Epic tha se kërkon që të ruhet integriteti kompetitiv i lojës, si dhe rikujton lojtarët e Fortnite se ata mund të raportojnë sjellje të dyshimta brenda në lojë ose duke folur me ekipin e suportit të lojtarit.

Një prej lojtarëve më popullorë të Fortnite, Ninja, tha në Twitter se ai e kupton pozicionin e Epic, por ky sistem i ri ka mundësi të sjellë probleme. Ai përmendi specifikisht kërcimin si një veprim të ndëshkueshëm.

Duhet thënë se sipas Epic, lojtarët do të ndëshkohen vetëm pasi veprimet e tyre të shikohen dhe të vlerësohen. Të kërcesh pa asnjë arsye nuk pritet të sjellë probleme, por gjithsesi nuk i dihet.