Funimation dhe Crunchyroll bashkohen në një platformë të vetme

Vitin e kaluar kompania Sony (e cila ka nën zotërim Funimation) bleu vitin e kaluar platformën streaming më të madhe për anime, Crunchyroll për 1.175 miliardë dollar. Dhe tashmë të dyja platformat streaming do të bashkohen në një të vetme duke sjellë një numër të madh anime në një platformë.

Gjatë ditës së sotshme, Crunchyroll njoftoi se Funimation bashkë me disa platforma të tjera streaming si VRV dhe Wakanim do t’i bashkohen platformës së Crunchyroll. Kjo do të thotë se platformat më të mëdha anime do të bashkohen në një të vetme duke sjellë një larmishmëri anime për të gjithë fansat e anime kudo në botë.

Por ky bashkim ka sjellë goxha pyetje nga përdoruesit e platformës Funimation. Ndër më kryesoret ka qenë se çfarë do të ndodh me llogarinë e tyre të Funimation pas këtij bashkimi. Sipas njoftimit të kryer, Funimation do të sjellë akoma episodet e reja të anime që po transmetohen momentalisht.

Por nëse dëshironi që të shikoni anime e reja që do të transmetohen, atëherë do t’iu duhet që të blini një abonim në Crunchyroll. Dhe të gjithë abonuesit që janë momentalisht në Funimation, do të marrin një kupon në email që iu jep 60 ditë Crunchyroll Premium falas.

Dhe pyetje nuk janë ngritur vetëm nga përdoruesit e Funimation por gjithashtu edhe nga ata ekzistentë në Crynchyroll. Pyetja kryesore ka qenë në lidhje me çmimet e abonimeve të tyre. Deri më tani, Crunchyroll nuk ka asnjë plan për të rritur çmimin por që mund të ndodh në të ardhme.

Bashkimi i Funimation dhe Crunchyroll në një platformë të vetme është një lajm goxha i madh për fansat e anime. Ky bashkim do t’i mundësojë fansave të blejnë një abonim të vetëm ku mund të gjejnë një gamë të madhe anime ndryshe nga më përpara ku duhet të abonoheshin në platforma të ndryshme.

Funimation ka të drejta ekskluzive për anime si Tokyo Ghoul, My Hero Academia, Mushoku Tensei dhe më shumë të cilat do të jenë pjesë e Crunchyroll duke filluar që prej ditës së sotshme.