Mbështesni GameON Albania duke përdorur kodin support-a-creator: GAMEONALBANIA
Po kerkoni për diamante në Free Fire Falas?! Klikoni këtu për të marrë pjesë në Giveaway për Free Fire Diamonds
Pas shitjeve të suksesshme të Crash Bandicoot N. Sane Trilogy, një ribërje e klasikes së PS1 Spyro the Dragon ishte e pashmangshme. Activision e njoftoi Spyro: Reignited Trilogy më herët këtë vit, duke i prezantuar fansat me një pamje fantastike dhe të re të platformës. Prej një kontradite që lindi mes shitjeve fizike dhe vonesave të lojës, një pjesë e fansave menduan se ndoshta nuk do e portretizonin lojën siç duhej, por ne mund t’ju themi se aventurat e Spyros janë po aq të mira sa ishin para dy dekadash.
Spyro: Reignited Trilogy prezanton gameplay identik me lojërat origjinale. Nivelet organizohen njëlloj dhe gems do jenë aty ku lojtarët e vjetër i mbajnë mend në fillim. Gjithsesi çdo gjë ka marrë një ndryshim masiv në anën grafike me animime mbreslënëse dhe të larmishme që e bëjnë lojën vërtet të këndshme për syrin, madje ndër lojërat të kompozuara më mirë vizualisht gjatë gjithë vitit.
Lojtarët kanë mundësinë të zgjedhin cilëndo lojë brenda trilogjisë që dëshirojnë kur fillojnë, por më e mira është që të filloni me të parën, pasi të tjerat thjesht vijnë dhe komplikohen me kohën. E para vjen Spyro the Dragon. Nuk klasifikohet si ndonjë vështirësi ose sfidë e madhe dhe mund të plotësohet lehtësisht për afërsisht pesë orë. Këtu bëhet fjalë për gjetjen e të gjithë gurëve të çmuar, të shpëtuarit të të gjithë dragonjve dhe marrjen e të gjithë arritjeve dhe Skill Points.
Skill Points janë prezantuar fillimisht si pjesë e Spyro 2: Ripto’s Rage!, por Spyro: Reignited Trilogy i shton ato që në lojën e parë, duke u dhënë njëkohësisht disa sfida shtesë edhe lojtarëve që e kanë ndjekur lojën që në hapat e saj të parë. Skill Points janë sfida të veçanta që lojtarët duhet të plotësojnë për të përfituar “concept art” në Spyro: Reignited Trilogy.
Përveç këtij ndryshimi, Spyro the Dragon është fiks si në kohët e vjetra, por me një shtresë të re rikonstriktimi përsipër. Në pjesën e nivelit të vështrësisë dhe dialogut të pandryshuar, loja e tregon moshën e saj të vërtetë, por prapëseprapë është shumë gallatë ta luash. Është e garantuar t’ja kaloni mirë me këtë lojë edhe nëse po e luani për herë të parë edhe nëse po e luani nga nostalgjia.
Spyro 2: Ripto’s Rage! nga ana tjetër është pjesa më e realizuar e gjithë trilogjisë. Përmban gameplay-in e lojës së parë, por shton tipare të reja për ta bërë eksperiencën më përfshirëse dhe sfiduese. Bosses sjellin zënka më të forta dhe gems mund të përdoren për të blerë aftësi të reja për Spyron. E gjitha kjo e bën mjedisin rrethues më argëtues.
Spyro 2 zgjerohet jo vetëm në aspektet e gameplay-it dhe përmirësimeve. Personazhe të reja gjejnë hyrjen në lojë dhe historia thellohet më shumë se sa thjesht gjetja e dragonjve. E vetmja gjë pak acaruese te Spyro 2 është kamera. Ky problem në fakt e gjen shtrirjen në treja lojërat e trilogjisë. Ka disa momente të caktuara ku Spyro duhet të lëvizi shpejt dhe kamera e ka pak vështirë ta ndjekë siç duhet. Kjo sjell një çoroditje të lehtë për syrin.
Spyro: Year of the Dragon është e treta e trilogjisë dhe i ndreq disi problemet me kamerën. Gjithsesi është loja më pak mbreslënëse nga të treja. Sjell disa tipare të reja me qëllim për ti ngjyrosur pak gjërat, por këto të fundit janë relativisht zhgënjyese. Çdo nivel është i mbushur me mini-lojëra dhe shpërqëndrime që nuk janë shumë argëtuese, por të nevojshme për të vazhduar progresin në lojë.
Year of the Dragon gjithashtu i vendos lojtarët në vendin e personazheve të reja, si një kangur, zog ose majmun. Këto kafshë kanë aftësi të ndryshme dhe rrjedhimisht sjellin një gameplay më të larmishëm nga ai që mund të shihet në dy rastet e mëparëshme. Edhe pse kjo lojë klasifikohet si më e dobëta nga të treja, ajo prapë mbetet e mirë dhe një nga aventurat më të gjata që do të eksploroni gjatë trilogjisë.
Disa nga idete dhe tiparet e prezantuara në Year of the Dragon edhe mund të trajtohen në një lojë më vete të Spyro the Dragon. Do të ishte shumë interesante të shikonim se çfarë mund të bënte zhvilluesi Toys for Bob me një projekt të tillë.
Konkluzion
Spyro: Reignited Trilogy mund të mos jetë loja më fantastike, por padyshim që garanton doza të larta argëtimi dhe nostalgjie. Trilogjia normalisht që kishte nevojë për diçka më shumë se thjesht një ridizajn për t’ja dalë në tregun e sotëm. Toys For Bob ia ka dalë mbanë më së miri atij misioni. Qofshi fansa të vjetër ose thjesht gamera në kërkim të lojës së rradhës, Spyro: Reignited Trilogy nuk do ju zhgënjejë.
