Ubisoft planifikon një “eksperiencë dixhitale” për E3 2020

Watch Dogs Legion. Gods & Monsters. Rainbow Six Quarantine. Këto janë vetëm emrat e atyre që janë njoftuar deri tani. Ubisoft ka një listë goxha të mirë lojërash për të treguar në konferencën e tij të E3 dhe tani që eventi fizik u anullua, kompania ka për ti kaluar gjërat në mënyrë dixhitale.

“Shëndeti dhe mirëqenia e ekipeve dhe lojtarëve tanë është prioriteti ynë parësor,” tha Ubisoft në një deklaratë. “Sado që jemi të zhgënjyer, e mbështesim plotësisht vendimin e ESA për të anulluar E3 2020. E3 do të vazhdojë të jetë një moment ku ne mblidhemi së bashku si një komunitet për të ndarë dashurinë tonë të lojërave. Jemi duke eksploruar opsione për një eksperiencë dixhitale, që do na lejojë të ndajmë të gjitha lajmet emocionuese që kemi planifikuar për ju.”

Ubisoft nuk është shumë konkret për atë që ka në mendje, por i bashkohet Microsoft në sugjerimin e tij për të marrë versione dixhitale të konferencave të E3. ESA, grupi që organizon E3, gjithashtu është shprehur se është ende duke eksploruar opsione për ti realizuar gjërat në mënyrë dixhitale.

Përtej lojërave që përmendëm në fillim, Ubisoft pritej që të tregonte edhe Assassin’s Creed me tematikë vikingësh dhe një lojë të re Far Cry në E3.