Mbështesni GameON Albania duke përdorur kodin support-a-creator: GAMEONALBANIA
Po kerkoni për diamante në Free Fire Falas?! Klikoni këtu për të marrë pjesë në Giveaway për Free Fire Diamonds
Rrjeti do të ndryshojë dhe do të përmirësohet në bashkëpunim me Ericsson
Telekom Albania zhvilloi gjatë ditës së martës eventin One Vision, ku ata shpjeguan më në detaj planet për përmirësimin e mbulimit të rrjetit mobile në Shqipëri. Ata zbuluan gjithashtu bashkëpunimet me STL, Cognity dhe Ericsson.
Fillimisht, ata konfirmuan se nëpërmjet AKEP kishin arritur të përfitonin licensën për të përdorur frekuencën 800 MHz, duke i lejuar që edhe më tej të përmirësojnë infrastrukturën e rrjetit në Shqipëri duke rritur mbulimin e tyre. Në bashkëpunim me STL dhe Cognity, ata do të centralizojnë, automatizojnë dhe dixhitalizojnë operacionet e tyre në telefoni, transmetime wireless, linja tokësore dhe mobile IPTV për bizneset dhe konsumatorët. Gjithashtu, do të ketë investime të vazhdueshme nga STL në rrjetet 4G/4G+.
Më tej, ata gjithashtu zbuluan një bashkëpunim me Ericsson. Kompania suedeze do të modernizojë tërësisht rrjetin core dhe radio të Telekom Albania në harkun e 5 viteve. Ericsson ka si qëllim përmirësimin e rrjetit duke sjellë internetin e klasit Gigabit LTE më pranë konsumatorëve, si dhe duke sjellë infrastrukturën e nevojshme për ardhjen e rrjetit 5G në Shqipëri. Ky mbulim do të nisë fillimisht në Tiranë dhe Durrës, por deri në fund të vitit pritet të mbulojë 60% të Shqipërisë.
Telekom shpjegoi avantazhet që do të sillnin këto bashkëpunime tek konsumatorët. Fillimisht, këto përmirësime të infrastrukturës nga Ericsson gjithashtu do të rrisin sigurinë në rrjet. Telekom gjithashtu konfirmoi se ofron çmime kompetitive edhe ndaj dyqaneve të tjera teknologjike, si dhe do të ndryshojë dyqanet e tyre duke e sjellë kompaninë më pranë klientëve dhe konsumatorëve.
Megjithatë, avantazhi më i madh i këtij investimi do të jetë rritja e mbulimit në ambjente të mbyllura. Sipas Telekom, 70% e telefonatave kryhen në ambjente të mbyllura dhe ky përmirësim i infrastrukturës së rrjetit do të rrisë mbulimin në këto ambjente 7 herë më shumë, duke hequr nevojën për të kërkuar për sinjal. Pavarësisht nëse ndodheni në ashensor, shtëpi, garazh apo nëntokë, do të jeni gjatë gjithë kohës të lidhur me rrjetin. Për ta demonstruar këtë, Telekom tregoi një video duke testuar këtë shërbim në muzeun Bunkart 2.
