Mësoni si të krijoni vetë lojërat tuaja me anë të URF Academy

Riot Games ka laçuar një kurs falas për game design, me qëllim që të inspirojë zhvilluesit e së ardhmes

Riot Games ka treguar dedikimin e tyre për inspirimin dhe edukimin e dizenjuesëve të lojërave të së ardhmes duke krijuar një kurs falas online mbi dizenjimin e lojërave, për t’u përdorur kryesisht nga mësuesit e shkollave dhe gjimnazeve.

Ky kurs i ri quhet URF Academy Online. Është një kurs fillestar i cili ka si qëllim të mësojë studentët e gjimnazeve me bazat e dizenjimit të lojërave duke përdorur workshop-e interaktive të krijuara nga dizenjuesit e Riot. Kurrikula është përshtatur nga një kurrikulë universiteti e krijuar nga dizenjuesi i Diablo 3 dhe SimCity Stone Librande.

“Kurrikula jonë mbi dizenjimin e lojërave është mënyra jonë për të treguar dashurinë tonë dhe njohurinë tonë për lojërat dhe për t’ia transmetuar atë studentëve kudo,” – tha Riot. “Kursi është dizenjuar me aksesibilitetin në plan të parë, pasi çdo mësues me internet dhe printer mund të arrijë t’i mësojë studentët se si të dizenjojnë një lojë argëtuese.”

Programi është i ndarë në gjashtë module të përbëra nga projekte dhe aktivitete që studentët duhet t’i bëjnë, duke nisur nga kuptimi i bazave të dizenjimit tek dizenjimi, zhvillimi dhe testimi i një prototipi prej letre të një loje multiplayer.

Riot hapi një workshop interaktiv për dizenjimin e lojërave për studentët në gjimnaze në 2016 në qendrat e tyre në Los Angeles. Megjithat, kjo kurrikul e re do i ndihmojë mësuesit të udhëheqin dizenjuesit e ardhshëm të lojërave në rrugën e duhur.