10 lojërat më të mira të kësaj dekade

Këto janë, sipas nesh, lojërat më të mira të dekadës që po lëmë pas

Dekada që sapo kaluam pa dyshim që ishte një periudhë shumë e rëndësishme për industrinë e videolojërave. Duke marrë parasysh shumëllojshmërinë e lojërave, sidomos open-world, dhe ardhjen e gjeneratës së fundit të konsolave që u prezantua në 2013, le të shohim se cilat janë (sipas GameOn Albania) 10 lojërat më të mira të kësaj dekade.

10. Portal 2

Portal 2 është pasardhësi i lojës së vitit 2007, Portal. Ai mori elementët që e bënë të parën një titulll të suskseshëm (pazëllat intrigues, historia e thjeshtë, mekanizmat interesante të portaleve) dhe i përmirsoi në mënyrë drastike.  Portal 2 arriti të ishte e  suksesshme duke shtuar akoma më shumë pazëlla, duke sjellë një histori mjaft interesante dhe personazhe komikë e gjithashtu duke shtuar opsionin për të luajtur me miqtë në co-op.

9. The Last of Us

The Last of Us e Naughty Dog ishte një tjetër arritje e madhe për botën e gaming. Me grafika të cilat arritën në limitet e PlayStation 3 dhe me një histori e performancë që rivalizonte edhe serialet televizive hollivudiane, nuk është e habitshme që The Last of Us u zgjodh loja e vitit të 2013. Aventurat e Joel me partneren e tij të vogël por mjaft të fortë Ellie kanë ngelur në zemrat e gamerave edhe sot e kësaj dite pas plot 6 viteve. Kjo lojë mori temën e një campaign cliche me zombi dhe e transformoi në një udhëtim që preku pothuajse gjithkënd. Arsyeja e vetme se pse kjo lojë e mrekullueshme është vetëm në vend të 9 është se lojërat më sipër janë tej mase të vlerësueshme dhe sikur të kishim mundësi do ta vendosnim më sipër në listë pa diskutim.

8. Grand Theft Auto V

Loja që mori botën e gaming me një vrull të paparashikuar, do të jetë pa diskutim në çdo listë top 10 të kësaj dekade. GTA 5 sjell një frymë të re në serinë e Grand Theft Auto, ku për herë të parë ndjek historinë e jo një, por tre protagonistëve të ndryshëm. Është e padiskutueshme që ti do të lidhesh ngushtë dhe do të duash të paktën njërin nga këto personazhe kryesore: Michael, një ish-kriminel i cili, i dalë në pension kërkon të lërë pas jetën e tij kriminale e cila vazhdon dhe e tërheq mbrapsht; Franklin, një ish-gangster nga Grove Street, i kthyer tashmë në një kriminel të kalibrit të lartë, duke ndjekur hapat e Michael; Trevor, një psikopat i paparashikueshëm, i cili i përshtatet më mirë se të gjithë metodës se si lojtarët luajnë Grand Theft Auto. Në 2013, loja e vitit u zgjodh The Last of Us, por arsyeja se pse unë e vendosa GTA V në një pozicion më sipër në listë është nga jetëgjatësia e kësaj loje edhe pas vitit 2013.

7. Dark Souls

Dark Souls në sipërfaqe mund të njihet thjesht si një lojë e vështirë, që kërkon mund për t’u plotësuar, por të jeni të sigurt që është shumë më shumë se aq. Kjo lojë risolli në krye të vëmendjes faktin që lojërat moderne i ndihmonin shumë gamer-at. Shumë tituj të tjerë të suksesshëm e bënin të vështirë që të humbisje gjatë kohës që luaje, sepse kërkohej që të arrihej një ndjesi kinematografike dhe një eksperiencë sa më e gjatë dhe e kënaqshme. Por gjatë kohës kur shumica e këtyre lojërave i mbanin dorën lojtarit dhe e ndihmonin në cdo hap, Dark Souls i ndëshkonte lojtarët e ngathët. Një lojë e pamëshirshme, në të cilin qëllimi kryesor ishte që të humbisje, të mësoje nga gabimet e tua dhe të riktheheshe më i zoti se më parë. Kjo formulë që arriti sukses u adoptua edhe më pas nga tituj të tjerë të famshëm. Dark Souls pa dyshim kishte një impakt të madh në botën e gaming.

6. God of War

Kratos, Fantazma e Spartës, Zoti i Luftës dhe vrasësi i të pavdekshmëve u bë një ndër ikonat kryesore të PlayStation kur loja e parë God of War u lançua në 22 mars të 2005. Prandaj fansat kërkuan më shumë kur God of War 3 i la me gojë hapur, pasi Kratos vret zotat grek dhe veten. Kjo pritje u shua kur në E3 të 2016, pas një heshtjeje të gjatë u paraqit God of War në një demo surprizë. Duhet të themi që paraqitja e Kratos pas shumë vitesh në ekranin e madh të E3 krijoi disa nga reagimet më fantastike që kemi parë ndonjëherë. Dhe për fat të mirë, kur loja u nxorr në 2018 nuk zhgënjeu aspak. Me një histori komplet të re dhe fantastike por që nuk braktiste historitë e vjetra dhe me një sistem luftimi të rimodeluar, God of War u ngjit me sukses në vend të 6 në listën e 10 lojërave më të mira të dekadës.

5. The Legend of Zelda: Breath of the Wild

Një ndër ikonat më të mëdha të gaming kthehet me një nga projektet më të suksesshme të Nintendo Switch, ku Link duhet të luajë përsëri rolin e heroit në një aventurë të shkëlqyer. Çdo gamer i mirë-informuar duhet të dijë se Legend of Zelda ishte ndër lojërat e para në botë open-world, kështu që kur Nintendo lajmëroi se Breath of the Wild do të të jepte liri të plotë nëpër botën e Hyrule, të gjithë kishim besim në suksesin e këtij produkti. Bota shumëngjyrshe, mekanizmat eksplorues argëtues, përbindëshat e shumëllojshëm, dhe personazhet fantastik, i dhanë kësaj loje çmimin e padiskutueshëm si loja e vitit 2017, dhe vendin e 5-të në listën tonë.

4. The Elder Scrolls V: Skyrim

Bethesda ka treguar herë pas here se është në gjendje të krijojë klasikë të stilit open-world. Me superfuqi të gaming si Fallout: New Vegas dhe The Elder Scrolls 4: Oblivion, ishte e pashmangshme se një lojë e kësaj kompanie do të zinte vend në këtë listë. E kush tjetër mund të ishte përveç se loja e pestë e serisë së Elder Scrolls, Skyrim, e cila mund të konsiderohet edhe sot e kësaj dite si një nga lojërat më të arrira open-world. Me një hartë masive e gjitha e eksplorueshme, një histori e thellë e cila kishte arritur deri në atë pikë pas vitesh evolim, me shtete, specie dhe territore të ndryshme, profeci, komplote politike, gjithçka në lojë ndihej sikur kishte potencial të ekzistonte vërtet. Skyrim tregoi se arriti t’i rezistonte kohës, prandaj kjo lojë vazhdon edhe në ditët e sotme të suportohet nga konsolat e gjeneratës së tanishme si PS4, Xbox One, Nintendo Switch e madje edhe VR.

3. The Witcher 3: Wild Hunt

Aventurat e ujkut të bardhë Geralt nga Rivia skanë të krahasuar. Çfarë mund të themi tjetër për instalimin e tretë të kësaj serie përveç se është pothuajse perfekte. CD Projekt Red i rriti shumë pritshmëritë me The Witcher 3 për lojërat e tjera RPG open-world. Kjo lojë i kushton vëmendje detajit më të vogël. Çdo mision, edhe ato dytësoret të cilat fare lehtë mund të shmangen, janë të formuluara në mënyrë perfekte. Çdo vendim i yti ka rëndësi e madje edhe ato që mund të duken më të parëndësishmet mund të ndryshojnë në mënyrë drastike fundin e lojës, ose të paktën elementë të saj. Kjo krijon një dinamikë dhe një marrëdhënie në botën e Witcher të cilën asnjë lojë tjetër nuk arrin ta sjellë. Me ndihmën e 6 librave të cilat ndërtuan botën e pasur të kësaj serie, dhe elemntë të ndryshëm magjikë madje edhe epik, The Wild Hunt konsiderohet fare lehtë si loja më e mirë open-world RPG e kësaj dekade, duke i dhururar asaj çmimin e lojës së vitit 2015 dhe vendin e 3 në këtë listë.

2. Minecraft

I habitur? Epo sduhet të jesh. Minecraft është fare thjesht një prej lojërave më të arrira dhe me influencën më të madhe në botën e gaming në këtë dekadë. Kjo lojë e thjeshtë me kuba i ka rezistuar kohës ndër vite, duke qenë e disponueshme në çfarëdolloj platforme që mund të mendosh. Je ti, i vetëm ose me shokë, në një botë boshe ku limiti i vetëm është imagjinata….kam nevojë të them më shumë?

1. Super Mario Galaxy 2

Mario është padyshim nbreti i gaming dhe ai e ka treguar këtë fare lehtë çdo herë. Një nga ato herë është kryevepra e vitit 2010, Super Mario Galaxy 2. Me mekanizma shumë argëtues, ishte e pamundur për mua që të mërzitesha qoftë edhe një herë gjatë kohës kur luajta këtë lojë. Çdo produkt tjetër ka ndonjë pjesë të cilën me zor pret ta kalosh: misionet e ndjekjes në Assassin’s Creed; kur merr rolin e MJ në Spider-Man PS4; ndjekja me makinë në Batman Arkham Knight. Megjithatë, Super Mario Galaxy 2 i shmang këto në mënyrë spektakolare. Kjo lojë e din fare qartë se ku shkëlqen, dhe vazhdon ta bëjë këtë deri në fund pa ndërprerje. Në një kohë kur lojërat kërkojnë të jenë sa më reale dhe me histori komplekse, Super Mario Galaxy 2 thjesht kërkon të jetë argëtuese, gjë që e bën fare mirë, pasi sipas Reggie Fils-Aime, presidenti i Nintendo America: “Nëse nuk është qef, pse e vret mendjen?”

Cila ishte sipas jush loja më e mirë e kësaj dekade?