Zhvilluesi i Call of Duty: Modern Warfare konfirmon më shumë harta 6v6

Call of Duty: Modern Warfare ka tërhequr një numër mbresëlënës lojtarësh që prej lançimit tre muaj më parë, por komuniteti nuk ka parë shumë nëse flasim për harta të reja. Kjo do të ndryshojë nëse bazohemi në një status në Twitter nga një zhvillues i Infinity Ward.

Infinity Ward ka shtuar katër harta 6v6 që prej lëshimit të lojës në Tetor 2019, por reagimi i lojtarëve deri më tani ka qenë i përzier. Shoot House në përgjithësi është pranuar mirë, por Shipment, Vacant dhe Crash janë të gjithë hartat e vjetra të Call of Duty 4 që thjesht janë rivendosur, dhe fansat duan diçka ndryshe për t’i shkundur nga monotonia e hartave të zakonshme.

Infinity Ward i kupton zhgënjimet e komunitetit, dhe Joel Emslie, drejtori i artit në studio, ka konfirmuar në Twitter se ekipi po vazhdon të punojë për sjelljen e hartave të reja 6v6 “sa më shpejt të jetë e mundur.”

Duke pasur parasysh që shumë nga hartat në lançimin e lojës ishin të drejtuara drejt mode-eve 10v10, hartat e reja 6v6 do të jenë një shtesë e mirëpritur për atë çka kemi tashmë.

Është e paqartë se kur do të shtohen në lojë hartat e reja. Megjithatë, me një sezon që përfundon më vonë gjatë këtij muaji, nuk ka gjasa që ekipi i zhvillimit të jetë në gjendje t’i përfundojë ato dhe të lëshohen në kohë për përfundimin e tij.