Seria e lojërave F1 është rikthyer këtë vit me F1 2021. Këtë rradhë kemi disa ndryshime, pasi Codemasters u ble nga EA. Tani, është koha që të shohim se si kjo seri lojërash ka ndryshuar në këtë review nga GameON Albania.
F1 2021, ndryshe nga lojërat e deritanishme, është mjaft më e përmirësuar në shumë aspekte. Fizikat dhe A.I. janë më realistike se më parë. Me pak fjalë, Codemasters ka gjetur balancën e duhur midis dhe arcade duke e çuar F1 në një nivel tjetër.
Një prej aspekteve të reja të F1 2021 është story mode. Ai quhet Braking Point dhe të kujton deri diku historinë e Alex Hunter nga FIFA. Braking Point sjell një histori që bashkon një pilot të ri të quajtur Aiden Jackson me pilotin veteran Casper Akkerman. Në këtë histori do të gjeni gjithashtu edhe Devon Butler i cili rikthehet nga F1 2019 por si antagonist i kësaj historie. Braking Point është një pikë e mirë nisjeje nëse luani F1 2021. Ju do të mësoni makinat, settings, manovrimet, funksionet dhe më shumë.
Në Braking Point ju do të luani në dy sezone të Formula 1. Ju mund të zgjidhni në fillim makinën që dëshironi të përdorni. Historia avancon nëpërmjet cutscenes që tregojnë në detaj marrëdhënien midis dy pilotëve, ekipit të tyre dhe Devon Butler, së bashku me të gjitha ulje-ngritjet. Vetë Codemasters e ka pranuar se Braking Point është inspiruar nga Drive to Survive, prandaj dhe historia mbetet mjaft e mirë dhe e besueshme.
Përveç Braking Point, aspektet e tjera të F1 2021 janë pak a shumë të ngjashme me çfarë kemi parë deri më tani në lojërat e tjera F1. Megjithatë, të gjitha modes kanë përmirësime të vogla që e bëjnë më argëtuese eksperiencën tuaj.
Career mode rikthehet sërish me karrierën si garues dhe me My Team, ku ju mund të krijoni ekipin tuaj dhe të garoni si një ekip i ri në sezonin e tanishëm të Formula 1. Karriera është shumë e ngjashme me ato të viteve të kaluara, por këtë rradhë menuja e R&D është ndryshuar dhe është më e lehtë për t’u përdorur.
Ju gjithashtu mund ta bëni që loja të zgjedhë vetë se çfarë opsionesh bën upgrade, por nuk do jua rekomandonim ta bënit këtë gjë. Në karrierë, ju tani keni gjithashtu mundësinë të simuloni praktikën dhe kualifikimet. Prandaj, nëse s’keni kohë ose nerva, tani thjesht mund të merreni vetëm me garimin në karrierë.
Një prej veçorive të reja të shtuara këtë vit është two-player career, ku ju mund të luani si garues së bashku me një mik tuajin. Ju mund të garoni në të njëjtin ekip, por nëse doni mund të garoni edhe në ekipe të ndryshme. Aspektet e tjera të këtij mode janë njësoj me ato të karrierës normale. Do të na pëlqente shumë nëse two-player career do të vinte me split-screen, por që në kohët e sotme mungesa e kësaj veçorie nuk na surprizon.
Mode tjetër online i lojës është garimi në multiplayer, i cili shkoi pak a shumë brenda pritshmërive tona. Eksperienca varet shumë nga personat që të bien në lobby, pasi herë hasesh me tipa që garojnë në mënyrë serioze dhe herë të tjera me tipa që thjesht duan të përplasen. Nëse doni që ta merrni seriozisht multiplayerin, do ju rekomandonim të futeshit në liga private.
Normalisht që asnjë nga këto nuk ka rëndësi në qoftë se eksperienca në pistë nuk është argëtuese. F1 2021 është mjaft realistike. Grafikat nuk kanë ndonjë përmirësim shumë të madh duke marrë parasysh që është mbase një prej lojërave të fundit F1 të kësaj gjenerate. Përmirësime të mëdha shohim në audion e lojës.
Makinat kanë thuajse të njëjtën zhurmë me atë që dëgjojmë në garat në televizor. Nëse jeni të vëmendshëm, ju mund të shikoni para kohe se si moti ndryshon dhe të përgatiteni për të ndryshuar strategjinë tuaj gjatë garës. Problemet e makinave janë bërë më realisitike dhe tani ato prekin më shpesh edhe pilotët e tjerë në garë, ndryshe nga lojërat e kaluara ku të dukej sikur ti ishe i vetmi që kishe probleme me motorin ose kambion.
Ankesat që kemi për F1 2021 janë shumë të vogla, por prisnim që ato të ishin rregulluar. Pjesët kinematike të MyTeam kanë filluar ta tregojnë moshën e tyre dhe duken mjaft keq krahasuar me pjesët kinematike të Braking Point. Siç ka ndodhur me shumë lojëra të tjera sportive këto kohë, F1 2021 vjen me një Podium Pass që ju lejon të hapni më shumë cosmetics për makinën tuaj. Gjithashtu, si fansa të Ferrarit që jemi, nuk është se jemi shumë dakord me ratings të pilotave.
Si përfundim, F1 2021 është mbase një prej lojërave më të mira të kësaj serie deri më sot. Gjatë këtyre viteve të fundit, Codemasters ka përmirësuar vazhdimisht aspekte të ndryshme të lojës dhe ajo është sot në gjendjen më të mirë deri më tani. Influenca e EA duket me Braking Point dhe pass-in e lojës dhe shpresojmë që mos ta influencojnë më shumë lojën në të ardhmen.