Më në fund Capcom ka sjellë lojën e saj të re nga seria e Resident Evil e quajtur Village. Resident Evil njihet për serinë e famshme të filmave dhe lojërave dhe këtu lind pyetja: A do të jetë Resident Evil Village në nivelin e duhur si shumica e serisë së lojërave Resident Evil? Dhe a do të jetë po aq e frikshme sa thuhet? Kjo ngelet për t’u parë prandaj sigurohuni që të ndiqni këtë review të Village nga GameON Albania.
Ndryshimet e mekanikave dhe pjesës më të madhe të konceptit në Resident Evil 7 ishte një nga lëvizjet më të rrezikshme që kompania zhvilluese, Capcom, ka kryer ndaj serisë së Resident Evil por e cila fatmirësisht doli e suksesshme dhe ia vlejti.
Resident Evil Village ndjek pothuajse të njëjtin stil të RE7 në perspektivën first-person dhe duke treguar historinë e Ethan Winters në një ambient krejt të ri gotik.
Historia nis me Ethan dhe Mia Winters të cilët jetojnë të qetë në Europë bashkë me vajzën e tyre bebe të quajtur Rose. Edhe pse gjithçka po ecën mirë, Ethan ka akoma probleme dhe makthe nga kompleksi Baker.
Papritmas një natë Chris Redfield shfaqet gjatë një darke dhe rrëmben Ethan bashkë me vajzën e tyre Rose. Fatmirësisht planet e Chris nuk shkojnë siç duhet dhe Ethan zgjohet në një fshat i mbushur plot me njerëz-ujq, vampirë, përbindësha deti dhe shumë krijesa të tjera të frikshme që do t’iu kallin datën gjatë zhvillimit të historisë. Ethan akoma i konfuzuar nga e gjithë kjo gjë, arrin të mbledh veten dhe t’i vendos synim vetes që të shpëtojë vajzën e tij.
Me pak fjalë mund të themi që Resident Evil Village nis bukur duke përfshirë mister, karaktere të ndryshëm dhe tension në të. Historia nuk mund të jetë perfekte, por që ka për t’iu kënaqur në mënyra të tjera gjatë rrugëtimit në lojë.
Bota e Village është e ndërtuar bukur dhe mund të themi që mjediset që do t’iu rrethojnë janë të mbushura me detaje nga më të ndryshmet. Në të mund të gjeni vende të cilat variojnë nga kështjella Dimitrescu dhe deri tek ndërtesat e fshatit të mbuluara në dëborë. Çdo zonë është dhe ndihet unike në mënyrën e vet.
Pas ngjarjeve të ndryshme ju do të keni skena kinematike ku tregohen shumë bukur vështirësitë që Ethan po heq, emocionet e tij dhe më shumë.
Diçka e cila nuk është se na pëlqeu shumë ishte fakti që fshati do të shërbejë më së shumti si një “kanal/lidhje” për të lidhur vendndodhjet kyçe të lojës dhe nuk do të kemi shumë ngjarje ose evente të zhvilluara në të. Por që të themi të drejtën, ky fshat e bën punën më së miri në këtë aspekt.
Resident Evil Village është e ndarë në katër zona në një mënyrë pothuajse perfekte falë lidhjeve që krijon fshati. Secila prej këtyre zonave ka liderin e vet ku mund të përmendim Lady Dimitrescu, Puppeteer(krijuese kukullash) Doona Beneviento, përbindëshin Salvatore Moreau dhe Werewolf Karl Heinsenberg. Secila zonë do t’iu falë një atmosferë të veçantë të mbushur plot me ndjesi nga më të ndryshmet.
Edhe pse loja mund të jetë first-person, ajo nuk është komplet shooter ku do t’iu duhet që të luftoni me krijesa të frikshme pafund. Në shumë raste do t’iu duhet të përdorni trurin që të manovroni me Ethan ngadalë në mënyrë që të mos dalloheni nga shumica e armiqve tuaj ose të zgjidhni puzzle/mistere.
Një aspekt tjetër që është prezent në lojë, është sistemi crafting i cili iu lejon që të bëni craft gjëra të ndryshme si municione për armët, ilaçe dhe më shumë. Gjithashtu në lojë ju do të gjeni edhe një dyqan i quajtur The Duke sipas personit që e drejton atë. Aty do të gjeni një arsenal të madh armësh dhe të cilat mund t’i përmirësoni. Dhe mos harroni të mblidhni sa më shumë materiale të cilat mund t’ia jepni The Duke i cili do t’iu krijoj disa receta që do t’iu ndihmojnë të përmirësoni shumë nga aftësitë tuaja.
Një ndër problemet kryesore që hasëm ishte që vetë “loja” të shtynte ndonjëherë që t’i bëni gjërat shpejt dhe që të kaloje tek faza tjetër.
Për sa i përket aspektit të audios, gjatë çdo skenë dhe ngjarjeje, ju do të keni një kolonë zanore ose muzikë të veçantë e cila do t’ua shtojë më shumë emocionet që do të ndjeni gjatë lojës dhe shpesh herë atë të frikës.
Ne lojën e luajtëm në PC dhe nuk është se hasëm ndonjë bug tepër të madh në të. Lojën mund ta mbaroni për 12-16 orë në varësi të mënyrës si e luani dhe zgjedhjeve që bëni dhe po ashtu sa të zotë jeni në lojë.
Për ta përmbledhur, mund të themi që Capcom ia ka dalë mbanë që të sjellë një tjetër lojë të suksesshme nga seria Resident Evil në mënyrën më të mirë të mundshme. Në të do të gjeni një botë të ndërtuar këndshëm, personazhe nga më të frikshmit dhe plot gjëra të reja. Brenda asaj kohe që keni për ta luajtur është e sigurt që keni për t’u kënaqur pa masë.