Janë të rralla lojërat të cilat flasin për vikingët dhe kësaj here Ubisoft sjell Assassin’s Creed Valhalla e cila është loja e parë e kësaj serie që tregon për vikingët dhe jetën e tyre gjatë asaj kohe. Për ne Valhalla është një nga lojërat më të mira nga seria e Assassin’s Creed dhe nëse dëshironi ta zbuloni pse, na ndiqni.
Në fillim të kësaj historie, ju do të jeni pjesë e një darke vikingësh ku do të shikoni se si vikingët festojnë. Gjatë këtij festimi, klani juaj do të sulmohet nga një klan tjetër armik ku drejtuesi i këtij klani detyron të atin e Eivor të sakrifikojë veten në mënyrë që të shpëtojë klanin e tij. Pasi Eivor shpëtohet, ai merret në kujdes nga Styrbjorn i cili është një mik i të atit të Eivor dhe bëhet vëlla me Sigurd, i cili e shpëtoi.
Pasi ju shpëtoni, do t’iu jepet mundësia për të zgjedhur gjininë e Eivor ose mund ta lini atë të zgjidhet automatikisht nga loja. Por mos u shqetësoni nëse zgjidhnin njërën prej gjinive dhe më pas doni të ndryshoni pasi Assassin’s Creed Valhalla iu ofron mundësinë për ta ndryshuar atë në cdo moment të lojës.
Loja fillon në Norvegji ku do të luani si Eivor i cili është në kërkim të hakmarrjes. Pas kësaj ngjarje ju do të përfshiheni në një situatë politikë. Eivor dhe Sigurd nuk bien dakord me mbretin e tanishëm dhe mënyrën se si ai do që të qeverisë. Kjo bën që ata të rekrutojnë shokët e tyre dhe të lundrojnë drejt Anglisë.
Pasi arrini në Angli, qëllimi juaj kryesor tani është të ringrini përsëri klanin tuaj duke formuar aleanca të ndryshme me klanet e tjera vikinge. Këto alenca do t’iu ndihmojnë të pushtoni më shumë territore dhe të rrisni ndikimin tuaj në këto zona. Gjithashtu do t’ju duhet të ndërtoni bazën tuaj duke shtuar dhe përmirësuar ferma të ndryshme, blacksmith, shtëpi edhe shumë të tjera.
Gjithashtu gjatë kësaj kohe ju do të njiheni me dy assassins me të cilët ju keni qëllime të përbashkëta. Gjatë historisë suaj me ata, këta dy vrasës do t’iu dhurojnë një hidden blade dhe këtu ju do të tregoni se cfarë do të thotë të jesh një viking i vërtetë. Kjo tregon se Valhalla kësaj here ju ka sjellë historinë e një personi i cili është më shumë viking sesa assassin.
Ngjarjet e historisë zhvillohen shumë bukur duke rrëfyer jetën e vikingut Eivor dhe marrëdhëniet e tij me njerëzit dhe klanet e tjera . Kjo gjë iu largon nga ajo ndjesia e vjetër si Assassin duke iu bërë të futeni në një botë vikingësh pothuajse ndryshe nga lojërat e tjera Assassin’s Creed. Kjo bën që ju të lidheni më shumë me personazhin kryesor duke u futur në botën e tij.
Inventory është i organizuar mirë, duke iu dhënë mundësinë të bëni upgrade shumë gjëra dhe gjithashtu të keni në kontroll çdo gjë. Ju mund të zgjidhni veshje të ndryshme të cilat gjithashtu mund të përmirësohen duke iu dhënë avantazhe të ndryshme në lojë në varësi të mënyrës si luani.
Sistemi i skills është i ngjashëm me atë të dy lojërave paraardhëse. Skills bëhen unlock duke avancuar në lojë duke iu ofruar aftësi dhe perks të ndryshëm. Ju mund të zgjidhni midis skills të ndryshëm që iu ofrohet. Kur ju përmirësoni skills tuaj, gjithashtu kemi edhe trait të ndryshëm që janë Raven, Wolf dhe Bear të cilët iu ndihmojë të bëni më të fuqishëm gear dhe armët tuaja, duke i kombinuar ato.
Sistemi i combat në lojë është i ngjashëm me atë të Assassin’s Creed Odyssey dhe Origin ku në fillim dyluftimet do t’iu duken të thjeshta por do të vështirësohen teksa avanconi në lojë. Ju do të keni mundësinë të eksploroni një larmishmëri të madhe armësh dhe ti përmirësoni dhe kombinoni ato duke filluar që prej Sëpatave(Axe) dhe deri tek harqet dhe shigjetat. Gjithashtu ju keni mundësinë të kombinoni armët duke përdorur 2 armë në të njëjtën kohë ose një armë dhe një mburojë, sipas mënyrës suaj të dyluftimit.
Ndryshe nga lojërat e tjera të kësaj serie, Valhalla na lejonte të mos luanim në stilin stealth siç na detyronin shpesh paraardhësit e saj. Kësaj here ju mund të përballeni drejtpërsëdrejti me kundërshtarët tuaj ashtu siç do të bënte një viking i vërtetë. Gjithashtu nëse nuk iu pëlqen kjo gjë, loja ka kthyer vrasjen direkt me hidden blade e cila ka munguar gjatë dy lojërave të kaluara.
Në Assassin’s Creed Valhalla gjithashtu do të keni mundësi që të bëni lock shënjestrën kur gjuani me shigjetë. Kjo mekanikë iu ndihmon dhe iu lehtëson shumë punë në momentin që ju doni të gjuani një kundërshtar i cili është në lëvizje.
Kundërshtarët janë ndryshe nga herët e tjera dhe gjatë lojës do të përballeni me shumë kundërshtarë të ndryshëm, ku me të cilët mund të përballeni me mënyra të ndryshme si stealth, i drejtpërdrejtë ose duke përdorur shigjetat. Gjithashtu ju mund të mbroheni duke përdorur mburojën ose një prej armëve tuaja.
Bota ku ju jeni është një botë e egër, brutale dhe paqësore në të njëjtën kohë e cila ndryshon vazhdimisht me elementë grafikë që do t’iu bëjnë të flisni me vete. Shpesh na ndodhte që të harronim që po kryenim mision dhe vazhdonim të eksploronim. Tundrat e mbuluara nga bora bashkë me aurorat në qiell në Norvegji ose kodrat e mbuluara nga mjegulla ku mund të gjeje muret ikonikë prej guri në Angli, do t’iu lënë me gojë hapur dhe të mahnitur shumicën e kohës. Është e vështirë t’i përshkruash këto skena ku gjithashtu edhe kombinimi i ndriçimit dhe hijeve është perfekt. Sa më shumë eksploronim në ketë botë, aq më shumë bëheshin pjesë e saj.
Gjatë eksplorimit do të haseni me mistere të ndryshme të cilat do t’iu lejojnë të jeni pjesë e kësaj bote në një nivel tjetër. Do të ndodh që ju të ndesheni me njerëz të ndryshëm që kanë probleme ose sfida për të cilat do t’iu duhet t’i zgjidhni në mënyra të ndryshme.
Ju do të keni gjithmonë me vete një skuadër tuajën me të cilën mund të sulmoni zona të caktuara ose kundërshtarë të cilët ndodhen afër ujit dhe mund ta përdorni gjatë misioneve të ndryshme.
Për ta bërë skuadrën tuaj më të fuqishme përpiquni të merrni në ekipin tuaj njerëz të tjerë, t’i përmirësoni armët dhe veshjet e tyre ose duke përgatitur festa dhe darka të mëdha. Për të organizuar këto festa si fillim do t’iu duhet të ndërtoni ferma dhe furra në mënyrë që të prodhoni ushqimin e nevojshëm.
Gjithashtu duhet të keni kujdes pasi mund të ndodh që territoret që ju keni pushtuar të sulmohen nga klane rivale të cilat kanë për qëllim t’iu eliminojnë dhe të pushtojnë e të marrin në kontroll territoret tuaja.
Çdo territor ka wealth, mysteries dhe artifakte të ndryshëm, të cilat mund t’i gjeni duke eksploruar këtë territor dhe duke gjetur gjurmë të ndryshme të cilat do t’iu drejtojnë tek to.
Gjatë betejave dhe eksplorimit iu vjen në ndihmë edhe korbi juaj i cili iu lejon të shikoni vendin ku doni të eksploroni ose luftoni me më shumë detaje. Gjithashtu keni mundësinë që të zbusni kafshë të ndryshme si ujqër të cilët do t’iu ndihmojnë shumë në betejat tuaja.
Leap of Faith që është një prej lëvizjeve tradicionale në Assassin’s Creed vjen edhe kësaj here në Valhalla. Kësaj here shumicën e rasteve kur do t’iu duhet të bëni synchronization , do t’iu duhet të ngjiteni nëpër vende të ndryshme si shkëmbinj të lartë ose mure të vjetra të larta. Në fillimet e lojës ju do të keni mundësi të bëni hedhje të thjeshta por duke progresuar në lojë, ju do të mësoni se si të kryeni leap of faith në mënyrën e duhur.
Diçka tjetër e cila do të ndikojë në ngjarjet e lojës janë edhe zgjedhjet që ju do të bëni në të cilat duhet të tregoheni të kujdesshëm. Gjatë lojës ju do të përballeni me shumë situata në të cilat do t’iu duhet të zgjidhni dhe secila prej këtyre zgjedhjeve ka një ndikim në historinë e lojës. Duke bërë një zgjedhje të gabuar ju mund të prishni marrëdhëniet dhe aleancat ose t’i jepni fund historinë. Nëse keni dyshime dhe jeni të pasigurt për zgjedhjen tuaj, ne iu rekomandojmë që të bëni save lojën përpara se të zgjidhni.
Ne lojën e luajmë në PC me një Xbox controller dhe mund të themi që ndërveprimi me lojën ishte pothuajse perfekt duke iu lejuar ju të kryeni lehtë combo të ndryshme gjatë betejave ose të ngjisni një mal dhe të kaloni pengesa të ndryshme gjatë eksplorimeve.
Hasëm shumë bugs dhe glitches të cilat ndonjëherë bënë që të kishim crash. Fatmirësisht këto probleme u rregulluan gjatë update 1.0.2 por përsëri kishte bugs të vogla të cilat nuk do t’iu prishin eksperiencën tuaj në këtë lojë.
Zhurmat janë të kombinuara shumë bukur me natyrën që iu rrethon. Gjatë eksplorimeve do të dëgjoni zhurmat e krijuara nga kafshët përreth ose erën nëpër majat e larta të maleve. Në disa raste ndodhte që zëri i personazheve të mos ishte i sinkronizuar mirë me lëvizjet e tyre dhe ndonjëherë të mos kishin fare audio.
Pas përfundimit të lojës, loja iu ofron një shumëllojshmëri të madhe aktivitetesh dhe vendesh që mund të eksploroni. Ju mund të ngjisni dhe të eksploroni malin më të lartë, të kapni foto të vendeve të mrekullueshme që ju gjeni, të bashkoheni me klanin tuaj dhe të relaksoheni duke kënduar dhe kërcyer me ta ose mund të luani mini lojëra të ndryshme të cilat mund t’i gjeni nëpër vende të ndryshme në lojë.
Konkluzioni
Assassin’s Creed Vallhalla iu ofron eksperiencën më të mirë si viking duke iu lejuar ju të jetoni, të silleni dhe të veproni si një i tillë. Historia kombinohet shumë bukur me lojën nëpërmjet veprimeve dhe fjalëve të çdo personazhi nëse kryeni zgjedhjet e duhura por e cila kishte akoma vend për përmirësim. Mund të themi që është kombinimi më i mirë i elementëve të ndryshme nga të gjitha lojërat e serisë Assassins Creed duke iu ofruar lojën më të mirë open world adventure deri më tani duke iu dhënë arsye për të eksploruar çdo cep të kësaj bote kaq të madhe.
Dhe gjithashtu mos harroni t’i hidhni një sy review sonë të Assassin’s Creed Valhalla Siege of Paris.