Më në fund erdhi koha që fansat e lojërave zombie shooter të marrin përsëri kontrollerin dhe ti kthehen zakonit të vjetër duke vrarë krijesat me të cilat gamerat janë mëse të familjarizuar. Zombie Army 4: Dead War vazhdon historinë e seriesë së Zombie Army dhe nuk e largon formulën e gameplay-it të Sniper Elite me të cilën të gjithë ne ramë në dashuri. Duke qenë se në fillim seria u lançua si një standalone DLC e Sniper Elite, Zombie Army dukej si një tjetër përpjekje që thjesht të fitonte popullaritet me anë të zhanrit të shumëpërsëritur të zombie shooters. Por me kalimin e kohës, ky titull arriti të marrë pëlqimin e fansave, duke u paraqitur më në fund si një lojë më vete.
Titulli i katërt i serisë e vazhdon historinë në të njëjtën kohë kur titujt origjinal mbyllen. Në këto lojëra, historia nuk ka shumë rëndësi dhe të them të drejtën personalisht kalova gjithë lojën duke mos i kushtuar vëmendje ngjarjeve që rrethonin personazhet, por kjo nuk më pengoi të kisha një eksperiencë deri diku argëtuese. Por për ata që zgjedhin të ulen dhe t’i kushtojnë vëmendje ngjarjeve që do të hasësh përgjatë lojës, ato janë të thjeshta dhe të lehta për t’u ndjekur. Ekipi yt me 4 ushtarë do të shëtisë nëpër Europë me qëllim që të shkatërrojë Hell Towers, të cilat janë shfaqur në një numër të konsiderueshëm shtetesh, duke vrarë me mijëra zombi nazistë përgjatë rrugës. Fansat e serisë do të jenë mëse të kënaqur me personazhet duke konsideruar se Boris dhe Karl do të rikthehen në titullin e katërt. Ata do të bashkohen me Shola dhe Jun, një ushtar kinez i Resistance. Secili nga këto personazhe ka avantazhe dhe disavantazhe të ndryshme, të cilat i veçojnë ata nga njëri-tjetri. Këto avantazhe përshtaten edhe me personalitetet e ndryshme të karakterëve. Për shembull Shola, e cila është një inxhiniere, është më e aftë për ndërtimin e kurtheve sesa të tjerët. Ndërkohë Karl, i cili është një sniper, është më i aftë në përdorimin e armëve dhe sulmeve speciale se të tjerët. Kjo do të thotë se ti si lojtar duhet të mendohesh para se të zgjedhësh personazhin tënd, dhe nuk duhet të bazohesh vetëm në pamjen e jashtme.
Por personazhi nuk është e vetmja zgjedhje e rëndësishme që të duhet të bësh në fillim të lojës. Ti si lojtar duhet të zgjedhësh 3 armë të çfarëdolloji dhe ato do të të shoqërojnë përgjatë aventurës tënde vrastare. E vetmja herë kur do të mund të ndryshosh armët e tua do të jetë kur të arrish checkpoint-e të caktuara. Me siguri po pyesni veten se nëse armët i përfiton falas në Zombie Army 4, atëherë për çfarë duhet të bëni grind përgjatë lojës? Duke avancuar, do të keni mundësi t’i bëni upgrade armëve tuaja, do të mund të rrisni sasinë e dëmit që arma kryen, madhësinë e karikatorit dhe më shumë. Bonuse të tjera janë elementë si plumba me elektricitet që shpërthejnë, dhe kombinime të tjera që tingëllojnë si të çuditshme dhe në fakt janë pak, por asnjëherë nuk teprohen. Edhe pse nuk teprohen, çdo lojtar do të mund të bëjë disa kombinime paksi tepër të fuqishme, si për shembull shoutgun-i me elektricitet. Të gjitha këto veti shoqërohen bashkë me një gameplay mjaft argëtues, por shumë repetitiv. Pas episodit të katërt, ke arritur të shohësh gati çdo gjë. Shumica e misioneve kanë përmbajtje si ‘’shko në këtë vënd, vrit këta zombi, mbrohu për një kohë të caktuar’’ etj. Zhvilluesit e lojës mundohen të të shpërqëndrojnë nga gameplay i përsëritshëm me elementë dytësorë dhe gjithashtu edhe miniboss-e. Për t’u treguar të sinqertë, këto miniboss-e ishin mjaft argëtues, në shumë raste të kapnin në befasi dhe gati gjithmonë do t’ju duhet të ndryshosh mënyrën se si po avancon përgjatë nivelit.
Loja në përgjithësi ka grafika të mira. Duke luajtur në një gaming PC mjaft të mirë, nuk kishte lag ose zbritje të frames. Edhe pse kjo lojë nuk është revolucionare vizualisht dhe nuk të ngulit në mendje ndonjë pamje fantastike, është mëse e pranueshme, por edhe këtu janë prezentl disa elemnetë negativë. Shpesh herë personazhet kryejnë animacione jo të plota dhe shumë robotike, duke prishur disa herë eksperiencën. Ajo që na zhgënjeu më shumë ishtë se kur ti luan përgjatë historisë me shokët e tu co-op, në shumë cutscenes tregohet vetëm njëri nga personazhet dhe jo të gjthë. Por, edhe në rastet kur tregohen më shumë se një karakter, të tjerët janë në vende të çuditshme ku nuk ka kuptim të jenë.
Në përgjithësi, Zombie Army 4: Dead War duket të jetë kulmi i përpjekjeve më të mira të zhvilluesit për t’ju shpërqendruar nga fakti se gameplay është shpesh herë i ripërsëritshëm dhe i cekët. Ka shumë elementë të shtuar për t’i bërë gjërat më interesante, por nëse gjuajtja me armë drejt një grumbulli me zombi pa e lodhur mendjen fare nuk është në listën e lojërave të tua të preferuara, atëherë Zombie Army 4: Dead War nuk është për ty. Për ne, pasi arritëm të shihnim përtej problemeve të shumta bezdisëse, Zombie Army 4: Dead War arriti të na argëtojë si një lojë e lehtë shooter me vrasje fantastike me slow motion.