Lojtarët e Mario Kart dhe Mario Tenis e kuptojnë që kur personazhet e Nintendo-s përpiqen të hyjnë në një sport, ata sjellin në të ngjarje, karaktere dhe aftësi unike. Loja e golfit është një sport i cili kërkon durim por Mario Golf: Super Rush është krejt e kundërta pasi ky version Mario i këtij sporti sjell në të aktivitete të ndryshme të cilat shpesh sjellin rezultate kaotike dhe komike.
Mekanikat kryesore të golfit shkëlqejnë në Mario Golf: Super Rush. Ju përdorni një hartë me të cilën caktoni vendin ku doni që të gjuani, një matës i cili iu ndihmon që të zgjidhni se sa fortë do të dëshironi që të gjuani topin e golfit dhe gjithashtu një linjë e cila bën të mundur që të gjuani gjuajtje të harkuara kur keni një pengesë përpara.
Të gjitha këto mekanika e bëjnë lojën tepër sfiduese por në të njëjtën kohë edhe argëtuese. Dhe gjithashtu mos harroni të llogarisni edhe vendin ku do të rrëzohet topi pasi nëse ndodh të bjerë në rërë, ju do të keni probleme të mëdha për ta nxjerrë atë prej aty.
Këto mekanika sjellin thelbin tradicional të golfit por modes e ndryshme që kjo lojë ka si Speed Golf dhe Battle Golf të cilat mund të luhet multiplayer sjellin një ndryshim total në lojë duke sjellë momente të çuditshme dhe argëtuese për të gjithë lojtarët.
Në Golf Speed, ju do të përballeni kundër një deri në tre kundërshtarë ku pasi të gjuani topin, do të merrni pjesë në një garë për të arritur atje ku topi juaj është ulur në mënyrë që të realizoni gjuajtjen e radhës. Qëllimi kryesor për secilin është që të fusni topin në vrimë por në vend që ta merrni shtruar për të gjuajtur, duhet të përpiqeni që të bëni sa më pak gjuajtje. Çdo goditje shton 30 sekonda në kohën tuaj dhe lojtari i cili ka kohën më të shkurtër merr vendin e parë.
Ndërsa vraponi drejt topit tuaj, duhet të përpiqeni të zgjidhni rrugën më të mirë duke llogaritur stamina tuaj, terrenin dhe pengesat që do të hasni gjatë rrugës suaj. Sidoqoftë, pjesa më argëtuese e këtij mode është kur gjuajtjet dhe aftësitë speciale fillojnë të përfshihen me personazhet. Teksa vraponi, ju mund të vononi lojtarët e tjerë në lojë duke i gjuajtuar ose penguar ata me aftësitë tuaja speciale. Kjo është diçka e cila krijon skena të paparashikuara dhe që do t’i bëjnë të qeshni.
Sidoqoftë, dobësia më e madhe e Speed Golf është se ky element nuk është përfshirë mirë në lojë dhe shpesh ndihet sikur është bërë pjesë vetëm për të mbushur kohën midis gjuajtjeve. Fatmirësisht, për ata që pëlqejnë elementet akoma edhe më kaotike, ekziston Battle Golf.
Battle Golf ju çon në një arenë me lojtarë të tjerë në një mode free-for-all me misionin që të fusni topin në tre vrima sa më parë. Vendndodhja është plot me kurthe mjedisore dhe armë që lojtarët t’i përdorin njëri mbi tjetrin. Shpërthimi i një rivali aty pranë me një Bob-omb teksa ata përpiqen të rreshtojnë gjuajtjen e tyre është përtej kënaqësisë.
Duke marrë parasysh që vrimat zhduken pasi lojtari i parë fut topin në të, duhet të tregoheni strategjik në lidhje me lëvizjet e radhës dhe të keni plane rezervë për çdo rast. Përveç rreziqeve si Chain-Chomps, Thwomps dhe Bob-ombs, lojtarët gjithashtu mund të përdorin aftësitë speciale kundër kundërshtarëve për të goditur lojtarët e tjerë, për t’i kthyer topat e tyre në vezë Yoshi ose për të bërë një Boo që t’i ndjek ata nga mbrapa duke i shkaktuar lojtarit në fjalë probleme. Mund të themi që Battle Golf ishte ndër të preferuarat tona.
Për fat të keq, një tjetër aspekt kryesor i Mario Golf: Super Rush nuk është në nivelin e duhur. Duke shërbyer si një tutorial dhe deri diku si një historike me elemente të lehta RPG, Golf Adventure është një vend i përshtatshëm për të filluar udhëtimin tuaj në Mario Golf nëse doni të mësoni bazat. Por shkëlqimi i këtij mode ikën shpejt pasi fillon dhe bëhet i mërzitshëm dhe monoton.
Pavarësisht nga natyra mbresëlënëse e mënyrës se si Mario Golf: Super Rush sjell mekanikat e golfit dhe shumë mode argëtuese të saj, përsëri kjo lojë ka mangësi dhe boshllëqe të shumta në të. Por që kjo nuk do të thotë që argëtimi dhe momentet komike nuk do të mungojnë.