Lojërat Real Time Strategy kanë vazhduar të evoluojnë gjithmonë e më shumë duke shtuar mekanika komplekse dhe sisteme goxha të komplikuara duke iu bërë lojën lojtarëve të rinj goxha të vështirë. Fatmirësisht deri diku, studioja zhvilluese Ronix, na ka sjellë një lojë të zhanrit RTS të quajtur The Unexpected Quest, për të gjithë lojtarët e rinj në këtë zhanër duke i mësuar ata ngadalë se si ky zhanër funksionon.
Nëse jeni një fans i RTS apo doni të hyni në këtë zhanër , ky është vendi i duhur prandaj sigurohuni të na ndiqni në këtë review ku do të mësoni më shumë rreth The Unexpected Quest.
The Unexpected Quest është një përpjekje tepër e bukur e cila sjellë një aventurë minimaliste dhe që përpiqet që të kombinojë dhe balancojë mekanika jo shumë komplikuara me gameplay tërheqës. Dhe në pamje të parë mund t’iu ngjasojë dhe t’iu jap një ndjesi sikur po luani Warcraft.
Në The Unexpected Quest ju do të merrni rolin e një grupi DWarves të cilët janë në një aventurë të madhe nëpër një botë klasike fantazie të cilën ndoshta e keni hasur shpesh nëpër lojëra të ndryshme. Duke mbledhur resurse dhe duke ndihmuar një numër të madh karakteresh, duke iu plotësuar kërkesën e tyre ju do të arrini të ndërtoni qytete, rekrutoni luftëtarë dhe punëtorë të ndryshëm të cilët do t’iu ndihmojnë në ndërtimin e qytetit ose në luftimin kundër armiqëve të ndryshëm.
Ndryshe nga lojërat e tjera RTS juve nuk do t’iu duhet të mendoni shumë rreth statistikave tuaja apo të formuloni taktika tepër të komplikuara. Fokusi kryesor i kësaj loje qëndron tek gjetja dhe kombinimi të resurseve të duhura në mënyrë që të zgjidhësh problemet në radhën e saktë duke iu lejuar që të avanconi më tepër në misionin ku ju ndodheni.
Loja nuk kërkon shumë menaxhim pasi ju thjesht klikoni mbi materialin të cilin doni të mblidhni ose mbi kundërshtarin që doni të luftoni dhe gjithçka ndodh vetë. Ndërkohë ju thjesht mund të shikoni se çfarë ndodhë ose të kërkoni cepa të ndryshëm të hartës në kërkim të mbledhjes së resurseve dhe gjithashtu në kërkim të hapit tuaj të radhës.
Sistemi i combat i komplikon pak gjërat deri diku pasi do t’iu duhet të menaxhoni sulmin dhe mbrojtjen teksa kalorësi, magjistari apo shigjetari juaj sulmon. Problemi më i madh që ju do të keni është se nuk do të mund të zgjidhni se cili prej tyre do të sulmojë duke përfunduar në fitoren ose humbjen tuaj duke u penalizuar për gabimin që bëtë, i cili ju detyron të mblidhni përsëri resurset. Edhe pse ndoshta “ka benefitet e saj”, ky mekanizëm ndonjëherë mund të bëhet shumë i bezdisur dhe i mërzitshëm.
Për sa i përket grafikave, mund të themi që lënë shumë për të dëshiruar dhe gjatë skenave të ndryshme mund të shikoni kualitetin e ulët të tyre sikur të ishin tekstura të marra nga PS2. Por të themi të vërtetën pjesa vizuale e tyre ishte pak qesharake kur e sheh me vëmendje.
Diçka e cila nuk na pëlqeu ishte se loja nuk kishte voice-over por thjesht një dialog dhe disa zhurma të çuditshme nga personazhet për t’u dukur sikur “po flisnin një gjuhë tjetër”.
Ne e luajtëm lojën në Switch dhe mund të themi që aspekti i ndërveprimit me lojën ishte pak i çuditshëm duke e bërë tepër të qartë që loja është e dizajnuar për PC.
Konkluzioni
The Unexpected Quest është një lojë argëtuese deri diku e cila përpiqet vërtet që të ta bëjë lojën më të lehtë nëpërmjet mekanikave jo të vështira por e cila mund ta bëjë gameplay-in ndonjëherë të mërzitshëm ose të bezdisshëm. Gjithashtu edhe misionet ndonjëherë behën të përsëritura por puzzles dhe armiqtë e ndryshëm që do të hasni e kompensojnë këtë gjë. Lojtarët e rinj në këtë zhanër mund ta pëlqejnë goxha por nuk mund të themi të njëjtën gjë për lojtarët me eksperiencë.