Apple tregon se si Facebook mund t’ju gjurmojë

Apple së fundmi ka shpërndarë një dokument të ri të quajtur “A Day in the Life of Your Data” i cili tregon sesi kompanitë gjurmojnë të dhënat tuaja nëpër aplikacione ose website të ndryshme.

Apple tregon se aplikacionet mobile nga kompanitë third-party kanë të përfshira gjashtë gjurmues në mënyrë që të mbledhin të dhëna të ndryshme. Kjo gjë iu siguron atyre afërsisht 230 miliardë dollarë në vit.

Gjithashtu Apple tregon se çfarë të dhënash kompani të ndryshme mbledhin dhe gjurmojnë. Nëse ju keni të instaluar një aplikacion për të bërë foto dhe për t’i modifikuar ato, ky aplikacion ka akses gjithashtu në të gjitha fotot që ju keni në celularin tuaj. Kjo gjë bën që ky aplikacion të mbledhë të dhënat rreth çdo fotoje. Dhe nëse ju e postoni atë në media sociale, ky aplikacion fillon të gjurmojë edhe se çfarë ju bëni në rrjetet sociale.

Me ketë dokument, Apple gjithashtu arrin të tregojë veçori të ndryshme që iPhone ka. Një ndër to është App Tracking Transparency e cila i kërkon përdoruesit akses që ky aplikacion të gjurmojë ose të mbledhë të dhënat e tij.

Gjithashtu Apple ka premtuar se do të sjellë më shumë veçori në të ardhmen duke shkaktuar probleme për shumë kompani të cilat mblidhnin të dhënat e përdoruesve të ndryshëm. Një ndër këto kompani është Facebook i cili e ka kritikuar shumë Apple për këto ndryshime që ka bërë.