Ish-pronari i Echo Fox jep mendimin e tij mbi të ardhmen e League of Legends Esports
Ish-pronari i Echo Fox jep mendimin e tij mbi të ardhmen e League of Legends Esports
Padyshim që LoL Esports po rritet vit pas viti. Vetëm duke krahasuar World Championship 2019 me të njëjtin event vitin e kaluar, shohim se shifrat e shikuesëve mesatarë dhe maksimalë janë rritur.
Finalja midis FunPlus Phoenix dhe G2 Esports madje theu rekordin e Twitch, i cili ishte vendosur më parë nga eventi The End në Fortnite, ndërkohë që finalja luhej në Europë në një orar të keq për shikuesit amerikanë.
Finalja e 2019 arriti të mblidhte 107.7 milionë shikues në mbarë botën, ndërkohë që mediat kineze raportonin se kishte pasur maksimalisht rreth 200 milionë shikues në të njëjtën kohë.
Ndërkohë që audienca perëndimore sjell vetëm disa miliona shikues në Worlds, loja mbetet shumë popullore. Rick Fox tha në një intervistë se shtrirja globale është ajo që do e bëjë League of Legends të pavdekshme.
Sipas themeluesit të Echo Fox, i cili ka qënë në krye të organizatës në Amerikën e Veriut gjatë 8 sezoneve të kaluara përpara tërheqjes në 2020, League of Legends është shumë pranë eklipsimit të eventit më të madhë të NFL.
“Sado që e duam futbollin amerikan, loja nuk është në të njëjtin nivel ndërkombëtar si gaming,” – tha ish-ylli i NBA. “League of Legends është një event i madh botëror.”
Një tjetër faktor i cili do e ndihmojë League of Legends të kalojë Super Bowl dhe evente të tjera sportive në SHBA është fakti se turnamentet janë evente gjigande, por që nuk kanë shumë nevojë për shpenzime.
Për shkak se ka vetëm 5 lojtarë përballë 5 lojtarëve dhe ata mund të luajnë ndeshje online ose në arena të vogla dhe shikuesit janë kryesisht online, Riot ka më pak kufizime se sportet e zakonshme, të cilat duhet të mbahen në stadiume gjigande.
“Çdo gjë është online tani, teknologjia i ka dhënë mundësive njerëzve nga të gjitha anët e botës të lidhen me njëri-tjetrin,” – shtoi Fox. “Që tani, shifrat janë shumë pranë atyre të Super Bowl dhe ende do të vazhdojnë të rriten“.
Rick Fox nuk është i vetmi që e ndan këtë mendim, me FaZe Banks që gjithashtu ka thënë se eventet e esports mund t’ja kalojnë çdo gjëje, përfshirë këtu Super Bowl, kur vjen puna tek audienca.
“Do të jetë çmenduri,” – tha Banks. “Mendoj se do të jetë më e çmendur online se në botën reale. Do të jetë shumë e madhe. Super Bowl? Më e madhe, shumë më e madhe.”
Për fansat e League of Legends, kjo është diçka e mirë. Për fansat e NFL, mbase nuk është diçka e keqe, duke qënë se edhe nëse esports ja kalojnë sporteve tradicionale, ato kanë një audiencë tërësisht të ndryshme.
Ndërkohë që LoL, Fortnite dhe esports të tjera si CS:GO dhe Dota 2 vazhdojnë të rriten në të ardhmen, do të jetë interesante të shohim nëse shikueshmëria do të arrijë pritshmëritë e Rick Fox dhe FaZe Banks.