Mbase loja vërtet nuk do të vijë kurrë
Mbase loja vërtet nuk do të vijë kurrë
Ka kohë që flitet se një pasardhëse e lojës së 2006 nga Rockstar Games Bully (ose Canis Canem Edit në Europë), po vjen së shpejti, pasi është një lojë mjaft e dashur si për zhvilluesit ashtu edhe për lojtarët. Pavarësisht teaser-ave dhe leaks-ave të kohëve të fundit, duket se Bully 2 ende do të mbetet një ëndërr për ne.
Një raport nga VideoGamesChronicle sugjeron se Bully 2 ishte në zhvillim midis majit të 2010 dhe fundit të 2013, por puna ndaloi me kalimin e kohës, sipas disa burimeve që kishin njohuri mbi zhvillimin e lojës.
Sipas këtyre burimeve, bashkëthemeluesi i Rockstar Dan Houser dhe disa zhvillues të tjerë kishin krijuar një skenar për Bully 2 pak pas lançimit të lojës së parë, me Jimmy, portagonistin që do të rikthehej. Megjithatë, një prej problemeve kryesore ishte se ku do ta çone historia Jimmy-n.
Edhe pse Bully 2 do të niste në shtëpinë e njerkut të Jimmy, studio nuk ishte e sigurt se ku ajo do të vazhdonte më pas, në një shkollë tjetër, universitet apo diku tjetër. Sipas raportit, ekipi i Rockstar New England shpenzoi rreth 12-18 muaj për të krijuar Bully 2, por pa sukses.
Mesa duket ekzistonte një pjesë shumë e vogël e Bully 2 që ishte krijuar në RAGE Engine, që përdoret gjithashtu për GTA 4 dhe 5. Ajo kishte një gameplay të thjeshtë open-world. “Ekzistonte, mund të luhej, por ishte turp që kurrë nuk erdhi,” – tha burimi.
Edhe pse gjithsesi këto mbeten vetëm zëra pas nuk e dimë me saktësi se kush janë këto burime, ajo që duhet të marrim është se ende nuk ka asnjë shenjë mbi Bully 2, 13 vite pas lançimit të lojës së parë dhe pas ardhjes së Red Dead Redemption 2 në PC. A do të jetë Bully 2 loja e ardhshme e Rockstar? Kjo mbetet në dorën e tyre.