Sipas Marc Merrill, Riot Games duhet të përballet me disa pengesa përpara se të publikojë një lojë MMORPG bazuar në League of Legends
Sipas Marc Merrill, Riot Games duhet të përballet me disa pengesa përpara se të publikojë një lojë MMORPG bazuar në League of Legends
Deri para pak kohësh, emri i Riot Games ishte bërë meme në komunitetin e gaming, pasi loja kishte publikuar vetëm një lojë, League of Legends, duke e bërë shkronjën “S” në fund të emrit pa kuptim.
Megjithatë, kjo gjë ndryshoi për 10 vjetorin e kompanisë, ku Riot Games zbuloi lojëra të shumëta, përfshirë këtu një lojë FPS Project A, lojën me letra Legends of Runeterra dhe versionin për mobile dhe konsola të League of Legends, Wild Rift.
Por kjo nuk ishte e gjitha. Riot Games gjithashtu zbuloi një lojë fighting të quajtur Project L, si dhe zbuloi në The Game Awards 2 lojëra, Ruined King dhe CONV/RGENCE.
Në total, Riot Games ka arritur në 11 lojëra dhe tani emri i kompanisë ka vërtet kuptim. Gjithsesi, fansat duket se janë shumë të interesuar për lojën MMORPG të vendosur në Runeterra.
Gjatë 10 vjetorit të kompanisë u zbulua një lojë aksion-RPG e quajtur Project F, për të cilën themeluesi i Riot Games, Marc Merill, tha se nuk ishte një MMO.
Sipas tij, do të ishte shumë e vështirë që Riot të krijonte menjëherë një MMORPG të suksesshme. Ai llogarit se kostoja e këtij projekti mund të shkojë deri në $100 milionë dhe se do të duhej shumë kohë për të lançuar diçka.
“Unë do të doja shumë të krijonim një MMO, por për të qënë të sinqertë me lojtarët, do të duhej shumë kohë përpara se ajo të lançohej,” – tha Merrill.
“Këto lloj lojërash janë shumë të vështira dhe kushdo që ka krijuar një MMO meriton një medalje. Është si të bësh një raketë. Ka shumë punë dhe do të donim të lançonim diçka të mirë dhe kjo nuk është e lehtë.”
Pra, fatkeqësisht duket se nuk do të kemi një lojë si World of Warcraft ose Destiny 2 të bazuar në League of Legends, të paktën në të ardhmen e afërt. Megjithatë, gjithsesi do të kemi mundësi të eksplorojmë Runeterra fare lehtë, duke parë katalogun e lojërave që Riot Games ka gati të lançojë në vitet e ardhshme.