Loja e njohur me gara nga seria Mario, Mario Kart 8 Deluxe, ka njoftuar se do të sjellë një update të madh së shpejti. Ky update synon që të sjellë 48 harta remastered nga lojërat e kaluara të kësaj serie.
Sipas njoftimit të kryer, hartat e reja do të vijnë gjatë 6 update ku secili update do të sjellë 8 harta. Kjo pritet që të ndodh gjatë dy viteve të ardhshme. Duke marrë parasysh që Mario Kart 8 Deluxe ka 48 harta momentalisht, pritet që pas dy vitesh ky numër të dyfishohet.
Update i parë pritet të vijë më 18 mars i cili do të sjellë Coconut Mall nga Mario Kart Wii, Choco Mountain nga Mario Kart 64 dhe Tokyo Blur nga Mario Kart Tour. Ju mund t’i merrni të gjitha këto harta duke blerë Booster Course DLC i cili kushton 24.99 dollarë ose të blini Nintendo Switch Online Expansion Pack i cili kushton 50 dollarë në vit.
Fansat prisnin një lojë të re Mario Kart pasi Mario Kart 8 është lançuar në fillim për Wii U në 2014. Por duke marrë parasysh popullaritetin e madh që Mario Kart 8 ka në versionin Switch, Nintendo ka vendosur që të sjellë update dhe DLC ekstra për të.