A do të ketë League of Legends të njëjtin sukses gjatë 2020?
A do të ketë League of Legends të njëjtin sukses gjatë 2020?
League of Legends mbetet ende mbret i shikueshmërisë në esports. Sipas Esports Charts, Worlds 2019 në League of Legends u ndoq maksimalisht nga 3.9 milionë shikues gjatë gjysmë-finales midis T1 dhe G2 Esports. Kjo eklipsoi finalen e Fortnite World Cup, që pati shikueshmërinë e dytë më të lartë me 2.3 milionë. Free Fire World Series në Rio De Janeiro ishte në vendin e tretë me 2 milionë shikues.
Në bazë të orëve të ndjekura, Worlds 2019 ishte gjithashtu në krye. Ky turnament pati një rritje me 66% nga viti i kaluar, duke shkuar nga 83 milionë orë në plot 137 milionë orë të ndjekura. The International 9 ishte në vendin e dytë me 88 milionë orë, ndërkohë që IEM Katowice Major në CS:GO kishte 53 milionë orë të ndjekura.
E vetmja kategori ku League of Legends nuk ishte në krye ishte shikueshmëria mesatare, ku fituese ishte Free Fire World Series. Turnamenti në mobile pati mesatarisht 1.2 milionë shikues, duke mposhtur Fortnite World Cup me 1.1 milionë dhe Worlds 2019 me 1 milionë shikues.
Ky vit duket se do të jetë një vit tjetër i madh për League of Legends, me organizata të mëdha që kanë bërë ndryshime të shumta në ekipet e tyre, gjë e cila mund të ndryshojë balancën e ekipeve në renditje. Ka shumë histori që duhen ndjekur në të gjitha rajonet, prandaj nuk do të qe aspak surprizë që League of Legends të thyente të tjera rekorde në 2020.