League of Legends Origins mund të shihet në Netflix

Ky dokumentar tregon fillimet dhe rritjen e League of Legends

I titulluar League of Legends: Origins, ky dokumentar tregon se si League of Legends u bë një prej lojërave më popullore në botë. Ai u zbulua si pjesë e festimeve të 10-vjetorit të League of Legends, ku Riot zbuloi një shumëllojshmëri projektesh të reja, përfshirë këtu një lojë FPS dhe një lojë me letra.

Me regji të Leslie Iwerks, e nominuar për çmim Oscar për Recycled Life dhe për çmim Emmy për The Pixar Story, Origins tregon rritjen e League of Legends si një lojë dhe si një esport.

Duke filluar nga krijimi i lojës që do të kthehej në League of Legends dhe themelimi i Riot Games, dokumentari zbulon fillesat e zhvillimit si dhe disa vendime kyç që patën një rëndësi të madhe në të ardhmen e lojës, përfshirë këtu bërjen e lojsë free-to-play.

Përveç rritjes së lojës, Origins gjithashtu tregon dhe zhvillimin e League of Legends si një esport, duke filluar nga Season One Championship, që më pas u kthye në World Championship dhe duke kaluar tek krijimi dhe zhvillimi i LCS, ligës së parë të lojës.

Përveç intervistave me pjesëtarë të Riot, dokumentari merr dhe mendime dhe komente nga njerëz të ndryshëm, jetët e të cilëve janë influencuar nga League of Legends, duke nisur nga komentatori i LCS Joshua ‘Jatt’ Leesman tek pronari i G2 Esports Carlos ‘ocelote’ Rodriguez dhe duke kaluar tek streamer-ja popullore Imane ‘Pokimane’ Anys.

League of Legends: Origins zgjat 1 orë e 17 minuta dhe mund të shikohet në Netflix.