Funimation zyrtarisht do të blejë Crunchyroll

Pas një kohe të gjatë bisedimesh midis dy palëve, më në fund arrihet një marrëveshje

Para pak kohësh, Sony, kompania mëmë e Funimation, bëri publike se ishte në bisedime me platformën streaming Crunchyroll për ta blerë atë. Së fundmi, të dyja platformat streaming Funimation dhe Crunchyroll kanë konfirmuar se të dyja palët kanë arritur në një marrëveshje.

Crunchyroll është një platformë streaming e cila transmeton anime në pothuajse të gjithë botën dhe ka rreth tre milion abonentë me pagesë, 90 milion abonentë pa pagesë dhe mbi 50 milion ndjekës në rrjetet sociale. Kjo gjë ka bërë që platforma streaming të jetë nën radarin e Funimation.

Pas një kohe të gjatë bisedimesh, më në fund të dyja platformat arritën në një marrëveshje ku Crunchyroll do të shitet tek kompania mëmë e Funimation, Sony, për një shumë prej 1.175 miliardë dollarësh amerikanë. Mund të themi që kjo gjë ishte një surprizë e madhe për fansat e anime.

Kjo gjë është konfirmuar nga të dyja platformat nëpërmjet disa postimeve në rrjetet sociale dhe në website e tyre. Akoma nuk është bërë publike se çfarë do të ndodh me këto dy platforma ose me mënyrën se si do të funksionojnë në të ardhmen.

Gjithashtu blerja e Crunchyroll nga ana e Sony tregon një monopolizim të industrisë së anime, diçka të cilën po e bën edhe platforma streaming Netflix.