Sony po përpiqet të blejë platformën më të madhe streaming anime

Platforma e famshme streaming anime Crunchyroll mund të blihet së shpejti nga Sony

Anime është një prej industrive që po rritet ndjeshëm kohët e fundit dhe që po tërheq vëmendjen e shumë personave. Kjo gjë ka berë që kohët e fundit shumë kompanive të mëdha si Netflix, Hulu dhe shumë të tjera të fillojnë të fokusojnë vëmendjen e tyre në ketë fushë.

Lajmi më i fundit nga kjo industri vjen nga Sony dhe Crunchyroll, ku Sony është i gatshëm të blejë platfromën streaming për anime Crunchyroll për një vlerë prej afërsisht një miliardë dollarë amerikanë. Momentalisht Sony është e vetmja kompani e cila ka ofruar një shumë të tillë dhe që është e interesuar të blejë Crunchyroll.

Sony tashmë ka në pronësi platformën streaming anime Funimation e cila ka më shumë se një milion abonentë por që është mundur nga Crunchyroll i cili ka tre milion abonentë me pagesë dhe mbi 70 milion të tjerë pa pagesë.

Kohët e fundit investimi në industrinë e animacionit është një prej investimeve më të mira që mund të bësh pasi është më e lirë për t’u prodhuar në krahasim me filmat ose seritë live-action të cilat kanë problemet e tyre gjatë pandemisë. Gjithashtu edhe interesi i madh i njerëzve në anime është një prej faktorëve kyç.

Edhe pse kjo vlerë arrin një shifër prej një miliardë dollarësh amerikanë, përsëri nuk mund të krahasohet me Microsoft i cili arriti të blinte Bethesda për një shifër prej 7.5 miliardë dollarësh amerikanë.