Zbulohet posteri i parë për filmin Sonic the Hedgehog

Sonic the Hedgehog do të dalë në 15 nëntor të 2019s

Është zbuluar një poster për filmin Sonic the Hedgehog, që tregon iriqin blu me disa ndryshime nga pamja e tij e zakonshme.

Ky poster, siç mund ta shihni edhe më poshtë u zbulua nga IGN. Në të Sonic duket pak më ndryshe nga çfarë jemi mësuar ta shohim nëpër video-lojëra, seri të animuara ose comics. Ai duket shumë më realistik, mbi të gjitha kur fokusohesh te këpucët dhe gjymtyrët e tij.

Sipas skuadrës që po punon me filmin, pamja e Sonic është ndryshuar sepse personazhi duhej të përshtatej me aspektet live-action të filmit. Edhe filmi Detective Pikachu ka ecur në të njejtën linjë. Një pjesë e këtyre ndryshimeve përfshijnë një gëzof të ri, i cili sipas Tim Miller ishte e planifikuar që në fillim.

“Do të ishte e çuditshme ta linim siç ishte. Do dukej sikur po vinte vërdallë nudo. Gëzofi e ndihmon atë të integrohet me botën reale.” Ka thënë ai në një intevistë me IGN.

Edhe këpucët kanë ndryshuar në krahasim me ato të personazhit origjinal. Zakonisht ai i ka mbajtur të kuqe me një vizë të bardhë. Tani ato duken më shumë si atlete të kuqe me lidhëse të bardha.

“Ne pamë të gjitha llojet e këpucëve që ka veshur personazhi përgjatë të gjitha paraqitjeve të tij dhe vendosëm për ato këpucë që Sonic mund të vishte në ditët e sotme,” tha producenti Neal Moritz në IGN.

Një pjesë e anëtarëve të kastit të filmit Sonic the Hedgehog janë zbuluar. Ben Schwartz do të bëjë zërin e Sonic ndërsa Jim Carrey atë të antagonistit. Filmi është planifikuar të dalë në kinema në 15 nëntor të 2019s.