Londra e mbushur me ushtarë të cilët shtypin lirinë e njerëzve, drona të cilët monitorojnë çdo lëvizje, krim e korrupsion dhe njerëz të maskuar të cilët protestojnë për të drejtat e tyre është ajo çfarë do të na sjellë seria e Watch Dogs kësaj here.
Watch Dogs Legion sjell historinë e kryeqytetit të Anglisë gjatë një të ardhmeve të errët post-Brexit ku Londra “është pushtuar” nga një ushtri private, korporata të cilat duan të përfitojnë dhe kriminelë të ndryshëm të cilët kanë marrë në dorë kontrollin e qeverisë. Pas disa sulmeve terroriste në Londër, faji i hidhet DedSec që është një organizatë hacker-ash që lufton krimin dhe që e kemi hasur më përpara gjatë Watch Dogs 1 në qytetin e Çikagos dhe Watch Dogs 2 në qytetin e San Françisko.
Historia nis me Dalton Wolfie i cili ka qenë një agjent i vjetër i shërbimeve sekrete angleze dhe që po bashkëpunon me DedSec për të çaktivizuar disa bomba të cilat janë vendosur nëpër vende të ndryshme të Londrës. Pasi ky mision dështon, bombat e vendosura nëpër Londër shpërthejnë, Dalton qëllohet nga dronët dhe i gjithë faji i hidhet DedSec. Tashmë DedSec duhet të rekrutojë njerëz në organizatën e saj për të pastruar emrin e tyre dhe të luftojnë krimin dhe korrupsionin që ka pushtuar Londrën.
Gjatë historisë do të përballeni me 5 antagonistë të cilët kontrollojnë aspekte të ndryshme të qytetit të Londrës duke filluar nga ushtria private në rrugë dhe deri tek dronët që fluturojnë në qiell ose tek trafiku i organeve njerëzore. Të pestë këta antagonistë kanë një histori speciale dhe do t’iu duhet t’i luftoni ata njëri pas tjetrit.
Banorët e Londrës janë të nxehur nga këto lloj ngjarjesh dhe janë gati për t’u kryengritur. Kjo gjë iu bën ju personin i cili do të lëvizi ingranazhet e kësaj historie. Nëpërmjet sistemit të ri, All Playable Characters, do të mundeni të rekrutoni çdo person që shikoni nëpër rrugët e Londrës. Secili prej këtyre personave ka nga një talent ose aftësi dhe nëse e shikoni të arsyeshme ju mund t’i rekrutoni ata në mënyrë që mund t’iu ndihmojnë gjatë misioneve tuaja.
Disa prej tyre ju mund t’i rekrutoni direkt kurse disa të tjerë duhet ti rekrutoni duke iu ardhur në ndihmë nëpërmjet një misioni të vecantë që ata kanë. Gjithashtu do të hasni edhe persona të cilët nuk mund t’i rekrutoni. Këta persona do t’iu raportojnë direkt që në momentin që vënë re se një pjestar i DedSec është në lëvizje.
Historia është vërtet tërheqëse edhe pse ndonjëherë mund të kishte klishe të ndryshme. Një ndër problemet që hasëm gjatë kësaj historie ishte se përdorimi i shumë karaktereve iu bën të mos krijoni një lidhje me personazhin duke bërë që historia ta humb pak vlerën e saj. Gjithashtu gjatë lojës do të takoheni me fytyra të njohura dhe një ndër ta është rreperi londinez, Stormzy, të cilin do ta shikoni të performojë brenda në lojë.
Në shumicën e lojërat e tjera ju fokusoheni në vetëm një personazh por në Watch Dogs Legion ju do të keni mundësinë të përdorni një prej mijëra karaktereve që iu pëlqejnë.
Pas mbarimit të një prej historive dhe kalimit tek historia tjetër mund të ndodh që ju të ndryshoni karakter. Nëse ky karakter është bërë pjesë pas përfundmit të atij aspektit të historisë, do t’iu duket e çuditshme dhe do t’iu shkëpus nga rrjedha e ngjarjeve kur ky personazh do të flasë nëpër skena të ndryshme sikur ka qenë protagonist i historisë që prej fillimit.
Ashtu si edhe lojërat e tjera të këtij zhanri, bota e Watch Dogs sjell një qytet të madh i cili është i mbushur plot me mijëra individë të ndryshëm ku secili prej këtyre individëve ka përditshmërinë e tij dhe një profil të detajuar. Por ndryshe nga lojërat e tjera, arma juaj kryesore nuk është një pistoletë por një smartphone. Ju mund të aksesoni drona dhe kamera sigurie, hakoni laptop dhe servera, ndryshoni ngjyrën e semaforit, të drejtoni makina ose të shikoni profilin e detajuar, talentin dhe aftësinë e çdo personi thjesht me një klikim.
Ajo që na çuditi më shumë është fakti se secili prej personazheve që takojmë ka një talent, aftësi, zë dhe pamje unike dhe të ndryshme nga të tjerët. Gjithashtu edhe dialogët që mund të keni me këta personazhe nuk do t’iu duken aspak të përsëritur. Ubisoft njihet për rikrijimin e vendeve të ndryshme nëpër lojërate e saj, por kjo është hera e parë që kjo kompani ka provuar të krijojë një simulim kaq të madh popullsie.
Ubisoft është munduar të përshtas çdo person me realitetin e Londrës pasi Londra është një prej qyteteve me njerëz me kombësi nga pothuajse e gjithë bota. Watch Dogs Legion përfshin multikultura dhe shumë gjuhë të ndryshme. Një aspekt që ndonjëherë ishte i bezdisshëm ishte përdorimi i tepër i ofendimeve.
Ndryshe nga lojërat e tjera open-world ku zakonisht lojtarët luajnë në ndonjë qytet të madh të krijuar rastësisht, Watch Dogs Legion iu sjell një qytet i cili pavarësisht ndryshimeve që ka përjetuar në ketë histori përsëri të jep të njëjtën ndjesi sikur jeni me të vërtetë në Londër. Kjo gjë fillon që prej ndërtesave të reja dhe të vjetra, njerëzit të cilët jetojnë në të dhe shiut i cili nuk i ndahet Londrës në asnjë moment.
Në vend që të krijojnë një Londër normale me disa sinjale rrugore dhe autobuza të kuq tipik, Ubisoft ka vendosur që ta fokusojë vëmendjen tek elementët kryesor që ky qytet ofron. Kur jeni në lojë do të vini re vendodhjet ose aktivitetet kryesore të Londrës si Big Ben, London Eye ose udhëtimi me metro dhe mënyrën se si njerëzit sillen bashkë me theksin e tyre. Këto elemente iu bëjnë me të vërtetë që të ndiheni sikur po banoni në Londër dhe jeni një banor i këtij qyteti.
Misionet në Watch Dogs Legion iu ofrojnë një larmishmëri të madhe mënyrash se si do t’i realizoni. Ju mund të përdorni një spiun për të hyrë fshehtazi dhe duke eliminuar këdo, mund të përdorni një hacker për të bërë një hyrje spektakolare me dron, duke hakuar pajisjet rreth e rrotull jush dhe duke mos lenë asnjë gjurmë ose mund të luftoni ballë për ballë duke përdoruar armë nga më të ndryshmet.
Gjithashtu mund të përdorni mënyra nga më të ndryshme duke përdorur aftësitë dhe talentet e karaktereve që ju keni. Ju keni mundësi të bëni upgrade pajisjet ose të përmirësoni aftësitë tuaja në hacking duke grumbulluar tech point të cilat ndodhen nëpër vende të ndryshme në hartë. Kombinimi i duhur i aftësisë ose talentit tuaj me gagdet është diçka që do t’iu ndihmojë në pjesën më të madhe të rasteve.
Një aspekt që nuk na pëlqeu dhe që i jepte misioneve një ndjesi sikur e kemi përsëritur ketë mision është përdorimi pothuajse i detyruar në çdo mision i spiderbot ose pajisjeve të tjera në mënyrë që ta plotësoni misionin.
Për të dhënë më shumë informacione Ubisoft ka shtuar edhe në këtë seri audio të cilat mund ti gjeni gjatë misioneve të ndryshme ose gjatë eksplorimit të hartës.
Nga ana e grafikave dhe pjesës vizuale mund të themi që Ubisoft ka kryer një punë të shkëlqyer. Detajet në çdo rrugë të Londrës, ditët e zymta ose netët me shiun tipik të Londrës dhe ndriçimi i mrekullueshëm që kjo lojë ka është perfekte. Gjithashtu lojën e provuam me RTX ON duke na dhënë një eksperiencë akoma më të mrekullueshme.
Një nga problemet që hasëm ishte se loja akoma nuk ishte e optimizuar në mënyrën e duhur për PC pasi ndodhi që të kishim disa herë Crash edhe pse loja po luhej në një High-End PC. Një problem tjetër që vumë re është sinkronizimi i keq i karaktereve në disa skena. Me shumë mundësi kjo ndodh për shkak të numrit të lartë të individëve të cilët ju mund të përdorni dhe loja është mundur t’i përshtatë të gjithë këto karaktere në çdo skenë të mundshme.
Mund të themi që Watch Dogs Legion është një prej të pakta lojëra të cilat ofrojnë një shumëllojshmëri zgjedhjesh kur vjen puna tek ndërveprimi me lojën. Në menunë settings ju mund të gjeni konfigurime nga më të ndryshmet duke filluar që prej gameplay dhe deri tek controls. Ne lojën e kemi luajtur në PC me Xbox controller dhe mund të themi që ngelëm shumë të kënaqur me pjesën e controls.
Audio ishte perfekte me zërat dhe zhurmat të sinkronizuara mirë me lëvizjet dhe veprimet e karaktereve. Gjatë driving do të keni mundësinë të dëgjoni radio ku mund të dëgjoni muzikë të zhanreve të ndryshme ose të dëgjoni podcast të ndryshme ku jepen shpjegime të ndryshme mbi ngjarjet që zhvillohen në lojë. Kjo është një ide e realizuar shumë mirë nga Ubisoft duke iu dhënë lojtarëve informacione shtesë mbi historinë e lojës.
Driving në fillim mund të duket pak i çuditshëm por kjo ndodh për shkak se Ubisoft është përpjekur ta përshtas sa më shumë lojën me realitetin. Gjatë momenteve kur i jepni makinës do të vini re rrugët e ngushta, semaforët dhe shumë gjëra të tjera tipike të Londrës. Gjithashtu ju mund të përdorni pilotin automatik nëse zgjidhni një vendodhjen në hartë por që makina juaj do të eci shumë ngadalë.
Po ashtu keni mundësinë për fast travel nëpërmjet metros së qytetit, diçka që iu kursen shumë kohë për të arritur vendodhjen që dëshironi. Në mënyrë që të përdorni fast travel do t’iu duhet të eksploroni atë pjesë të hartës. Pasi e keni eksploruar do të vini re në hartë se ju mund të bëni fast travel në ketë zonë.
Pas përfundimit të historisë kryesore ju mund të eksploroni Londrën dhe të gjeni Easter Eggs të ndryshëm ose të kryeni misione dytësore të cilat tregojnë më shumë rreth ngjarjeve që kanë ndodhur në ketë të ardhme të errët që Londra ka. Më 3 Dhjetor Ubisoft do të sjellë multiplayer online co-op ku ju do të mundeni grupoheni me shokët tuaj dhe të kryeni misione të ndryshme ose të eksploroni qytetin.
Si përfundim mund të themi që Ubisoft ka kryer një punë të shkëlqyer duke ndërtuar jo vetëm qytetin e Londrës por edhe popullsinë e saj në mënyrën më të detajuar të mundshme dhe duke iu dhënë rëndësinë e vetë secilit prej tyre. Kombinimi i këtij vendi me historinë realizohet në mënyrë pothuajse perfekte duke treguar të veçantat e të dyjave. Bashkë me ndërveprimin që keni me lojën, grafikat të cilat iu japin një ndjesi speciale të kombinuara bashkë me audion e bëjnë Watch Dogs Legion një lojë që çdokush duhet ta provojë.