fbpx
PS5 Reviews

Spider-Man: Miles Morales Review

Mbështesni GameON Albania duke përdorur kodin support-a-creator: GAMEONALBANIA
Po kerkoni për diamante në Free Fire Falas?! Klikoni këtu për të marrë pjesë në Giveaway për Free Fire Diamonds

E bukur por e shkurtër

Seria e lojërave Spider-Man gjithmonë ka patur vlerësime të përziera. Për ne, loja Spider-Man i vitit 2018 ishte një ndër lojërat më të bukura të serisë dhe e realizuar mjaf mirë. Por a do të arrijë Spider-Man Miles Morales po në të njëjtin nivel ose më lartë? Për ta zbuluar, ndiqni këtë review.

Historia nis disa muaj pas përfundimit të aventurës kryesore të Spider-Man të vitit 2018, në qytetin e New York. Gjatë kësaj kohe, Peter Parker ka stërvitur Miles Morales i cili tashmë i duhet të mbrojë qytetin e New York vetëm, pasi Peter është me pushime jashtë shtetit.

Rastësisht gjatë këtij largimi, Roxxon fillon të shpërndajë Nuform energy në të gjithë qytetin duke ofruar energji të pastër dhe duke fituar në të njëjtin moment një rritje të madhe. Në të njëjtën kohë një grup rival i njohur si The Underground i drejtuar nga The Tinkerer po krijon trazira nëpër qytet. Ky grup kërkon të ndalojë rritjen e influencës së Roxxon dhe është i gatshëm të luftojë këdo që i del para.

Ndryshe nga Marvel’s Spider-Man i parë, personat me të cilët ju do të përballeni nuk janë të njohur që në fillim dhe kjo gjë është bërë për t’i surprizuar lojtarët.

Aventura nis me një mision në skuadër me Peter dhe Miles të cilët po punojnë bashkë për të ndaluar Rhino i cili po përpiqet të shpëtojë nga burgu. Gjithashtu gjatë këtij misioni do të takoheni me shumë fytyra të njohura. Gjatë lojës do të ndesheni me villains të ndryshëm por të cilët janë të paktë në numër.

Disa ndër problemet që ne hasëm ishte se historia ishte e shkurtër dhe kishte gjithashtu më pak antagonistë. Na u desh afërsisht rreth 8 orë për të mbaruar historinë kryesore dhe 2 deri në 3 orë për të bërë unlock pajisjet dhe kostumet e MIles Morales.

Gjithashtu më së shumti na dha ndjesinë sikur po shikonim një film pasi cutscene ishin tepër të gjata dhe të shpeshta gjatë lojës.

Shpesh gjatë eksplorimit nëpër qytet do të hasni rastësisht banda kriminelësh të cilët po kryejnë krime ose janë të armatosur dhe do t’iu duhet të luftoni kundër tyre. Fatmirësisht kjo gjë nuk do të ndodhë aq shpesh sa në Marvel’s Spider-Man e parë ku gjatë gjithë kohës do t’iu duhej të merreshit me këto gjëra.

Ne lojën e luajtëm në PS5 dhe mund të themi që performanca në të ishte fantastike. Koha për t’u bërë loading ishte tepër e shkurtër dhe akoma më e shkurtër kur bënim reload the last checkpoint ose fast travel. Në PS5 ju keni mundësinë të zgjidhni midis dy llojeve të performancës.

Fidelity Mode i cili iu ofron 30 frames per second kombinuar me veçoritë e jashtëzakonshme të ndriçimit dhe ray-tracing në rezolucionin 4K ose Performance Mode, i cili vërtet mund të ketë më pak veçori se Fidelity Mode dhe arrin t’iu ofrojë një lojë open-world në 60 frames per second.

Bota është shumë herë më ndryshe edhe pse ndodhemi në të njëjtin qytet. Qyteti është i strukturuar në mënyrën më të mirë të mundshme dhe është më i gjallë dhe i mbushur plot me njerëz të cilët “e jetojnë jetën pa shqetësime”. Ju do të vini re fytyrat plot emocion të njerëzve të ndryshëm që do të takoni. Kjo gjë iu bën ju të ndiheni sikur ju jeni një pjesë e rëndësishme e këtij qyteti.

Pavarësisht se ka pothuajse të njëjtat fuqi si Peter Parker, Miles Morales ndjek stilin e tij të të bërit të gjërave ndryshe duke filluar që prej mënyrës se si ai bën swing nëpër qytet dhe deri tek mënyra se si ndeshet me kundërshtarët e tij.

Të dy heronjtë tanë janë të aftë të përdorin dy stile luftimi kur ndeshen me të tjerët duke përdorur pajisje të ndryshme, hedhjen e objekteve që kanë afër, rrjetat e merimangës ose fuqinë e tyre fizike. Por Miles është i aftë të bëjë më shumë gjëra falë fuqive të tij të quajtura Venom. Mos u ngatërroni me anti-hero Venom, thjesht fuqitë e tij kanë marrë këtë emër.

Falë fuqive të tij ai është i aftë të gjuaj kundërshtarët e tij me venom blast që është një çlirim bio-electrik nga duart e tij. Gjithashtu ai mund të lëvizë më shpejtë dhe të kërcejë më shumë duke i dhënë mundësinë të krijojë stilin e vet të dyluftimit me të tjerët.

Një aftësi tjetër e tij, është ajo për t’u bërë i padukshëm dhe që quhet camouflage. Kjo aftësi i lejon atij të hyjë në zona me armiq pa u vënë re për një kohë të caktuar ose për të mundur një kundërshtar lehtësisht.

Spider-Sense funksionon njësoj. Në momentin që dikush do t’iu gjuaj ose sulmojë, Spider-Sense iu paralajmëron duke iu dhënë mundësinë të shmangeni.

Pajisjet dhe kostumet janë më të pakta në numër në krahasim me lojën paraardhëse por kjo iu lejon të zgjidhni më lehtë pajisjet që do të përdorni gjatë dyluftimit me kundërshtarët tuaj.

Ju mund të kryeni kombinime nga më të ndryshmet dhe kombinimi i të gjitha këtyre aftësive iu jep ndjesinë e plotë të superheroi gjatë përballjeve të ndryshme, duke iu falur një emocion të vecantë kombinuar me grafikat spektakolare.

Muzika ishte tërheqëse dhe i përshtatej situatave të ndryshme. zërat kombinoheshin shumë mirë me lëvizjet e personazheve shumicën e kohës. Duhet thënë gjithashtu. se gjatë lojës na ndodhi një bug i cili bënte që zërat dhe muzika të vinin me një vonesë prej 5 – 10 sekondash.

Ndërveprimi me lojën bëhej pa probleme me controller-in e ri të PS5 të quajtur DualSense. I vetmi problem ishte se loja nuk e përdortë të gjithë potencialin e madh të këtij controller-i.

Gjatë lojës hasëm bugs të ndryshëm. I pari që hasëm ishte ngecja e karakterit tonë në një vend të caktuar pasi mbaroi një cutscene. Kurse një tjetër na bëri që të ngecnim duke bërë swing në një godinë. Këto bugs na detyruan të bënim reload last checkpoint por falë performancës së lartë të PS5, këto bugs nuk do t’iu prishin eksperiencën tuaj në këtë lojë.

Fatkeqësisht pas përfundimit të historisë kryesore nuk do të keni shumë gjëra për të bërë. Ju mund të kryeni disa side missions ose gjeni collectibles; por sipas nesh kjo nuk është se mjafton dhe mund të quhet një mundësi e humbur për këtë lojë.

Konkluzioni

Për ta përmbledhur mund të themi që Spider-Man Miles Morales është vërtet një lojë e bukur por e shkurtër. Kombinuar me fuqinë e PlayStation 5, loja iu ofron grafika mahnitëse dhe një botë plot jetë. Fatkeqësisht mos-patja e ndonjë aktiviteti për të bërë pasi të përfundoni lojën, ia ul shumë potencialin kësaj loje.