I frymëzuar nga filmi Alien dhe shumë filma të tjerë fantashkencë, Metroid Dread rikthehet përsëri me një lojë të re në Switch e cila gjithashtu është një sequel i Metroid Fusion. Metroid Dread kësaj here sjell përsëri aventurat e gjuetares së thesareve, Samus, e cila niset në një mision për të zbuluar disa të vërteta misterioze në planet ZDR.
Por çfarë do të na sjellë Metroid kësaj here me lojën e tyre më të fundit, Metroid Dread dhe a ia vlen të luhet?
Menjëherë sa nisni lojën, ju do të njiheni me historinë e protagonistit kryesor të serisë, Samus, e cila është një njeri i modifikuar gjenetikisht dhe vesh një armaturë të vecantë. Kësaj here asaj i është caktuar një mision special, ku i duhet të udhëtojë drejt planetit të panjohur ZDR në kërkim të një paraziti i cili mund të shndërrohet në këdo që infekton dhe përbën një kërcënim të madh.
Por pas arritjes së saj në planetin ZDR, Samus përballet me një armik duke u mundur nga ai dhe gjithashtu duke i marrë të gjithë aftësitë e saj. Tashmë ajo e gjen veten thellë nën sipërfaqen e planetit ZDR dhe ku i duhet që të gjejë një rrugë për shpëtim teksa krijesa të ndryshme aliene dhe robotike e ndjekin për ta vrarë.
Gjatë avancimit në histori ju do të prezantoheni me kontrollet e ndryshme të lojës(të cilat ishin pak të vështira në fillim por më pas ua morëm dorën) dhe aftësitë e reja që Samus fitonte. Ato variojnë nga gjuatjet me missiles(predha) dhe lazer deri tek aftësitë e ndryshme si kamuflimi si i padukshëm. Aftësitë dhe mekanikat e reja fatmirësisht vinin në kohën e duhur duke mos e bërë shumë të mërzitshme lojën.
Metroid Dread sjell një botë të madhe jo lineare e mbushur me puzzle të vegjël dhe gjithashtu kundërshtarë të ndryshëm. Ju do të eksloroni rajone të ndryshme si Artaria e mbushur me ujëvara nëntokësore, Cataris plot me llavë, Burenia e cila ndodhet në një oqean nëntokësor mbushur plot me krijesa të rrezikshme dhe më shumë.
Grafikat dhe stili 2D i lojës përshtateshin shumë bukur duke ruajtur traditën e lojërave Metroid.
Gjatë eksplorimit do të haseni me një formë të re armiku të quajtur E.M.M.I i cili sjell një risi në serinë Metroid. E.M.M.I janë robotë të fuqishëm të cilët iu ndjekin këmba këmbës, kanë një arsenal të madh pajisjesh dhe Samus nuk mund t’i mposht dot. E vetmja mënyrë është që t’iu fshihet, largohet ose t’i mund nëpërmjet metodave të tjera. Në momente të caktuara të historisë, Samus bën upgrade përkohësisht armët e saj duke ju lejuar të ktheni avantazhin kundrejt E.M.M.I.
Por përsëri duhet të bëni kujdes pasi E.M.M.I janë zakonisht të mbushur me surpriza.
Përballja me bosses ishte një emocion më vete duke na sfiduar shpesh here ku shumicën e rasteve përfundonte me vdekjen tonë dhe në ekran të shfaqej “Game Over”. Fatmirësisht lëvizjet e tyre ishin të parashikueshme duke na e bërë më të lehtë herë pas here. Shpesh herë na acaronin por pasi i mundnim ndiheshim të kënaqur me këtë përballje.
Dhe për ta përmbledhur, Metroid Dread sjell përsëri Samus teksa ajo përpiqet të shpëtojë nga nëntoka e mbushur me plot rreziqet dhe misteret e planetit ZDR. Loja sjell përmirësime të mëdha si tek mekanikat e lojës po ashtu edhe ana grafike dhe më shumë. Bosses janë të organizuar mirë duke na bërë të acarohemi herë pas here.
Edhe pse Metroid Dread ndjek një formulë të zakonshme Nintendo, ajo përpiqet të sjellë ndryshime në të, sado të vogla ato janë duke na ofruar një lojë tërheqëse dhe interesante.