ghost of tsushima
Gaming Lajm i Fundit PS4 PS5 Reviews

Ghost of Tsushima: Director’s Cut Review

Mbështesni GameON Albania duke përdorur kodin support-a-creator: GAMEONALBANIA
Po kerkoni për diamante në Free Fire Falas?! Klikoni këtu për të marrë pjesë në Giveaway për Free Fire Diamonds

Ghost of Tsushima ishte padyshim një prej lojërave më të papritura dhe më të mira të lançuara në verën e 2020 për PlayStation 4. Loja solli më në fund një eksperiencë epike me samurai të cilën gamers e kishin kërkuar prej vitesh. Loja sjell një formulë që e kemi parë shumë herë më parë dhe nuk ka diçka inovative që të bën të thuash uau. Megjithatë, elementët e lojës janë kombinuar në një mënyrë të tillë që ti si lojtar e ke shumë të vështirë që ta lësh pas dore.

Pasi panë suksesin e versionit për PlayStation 4, Sony dhe Sucker Punch vendosën të sjellin lojën edhe për PS5 nëpërmjet Ghost of Tsushima: Director’s Cut. Ky expansion sjell një ishull të ri të quajtur Iki dhe një histori tërësisht të re, e cila është një eksperiencë që padyshim ja vlen të provohet nga gamers që nuk e kanë luajtur më parë Ghost of Tsushima.

Në Ghost of Tsushima, ju luani si Jin Sakai, një prej luftëtarëve të fundit samurai që i kanë mbijetuar pushtimit mongol të ishullit Tsushima. Detyra juja është të mblidhni të gjithë trupat e fundit dhe të mundoheni të bëni rezistencë ndaj mongolëve. Megjithatë, egërsia dhe agresiviteti i tyre e detyron Jin të vendosë në diskutim betimin e tij për kodin e nderit të samuraive. Kjo e çon Jin drejt një rruge të errët, ndërkohë që ai përpiqet të arrijë më të mirën për popullin e tij.

ghost of tsushima

Historia prek disa tematike që i kemi parë edhe më parë në lojëra të tjera. Kur bëhet fjalë për mbijetesë, a është më mirë të vdesësh me nder apo të bësh çdo gjë që ke në dorë për të arritur fitoren. Është dilema klasike që a duhet të kthehesh në përbindësh kur lufton me përbindësha. Në Ghost of Tsushima, historia bën çmos për të mbrojtur të dyja pikëpamjet.

Sucker Punch mundej që fare thjeshtë të krijonte një sistem morali dhe juve t’ju duhej të balanconit sjelljet e Jin midis të qënurit një samurai ose një ghost. Megjithatë, ata zgjodhën që ta sjellin këtë dilemë nëpërmjet evolucionit të Jin si personazh. Nëse loja do të kishte një sistem moralesh, mbase lojtarët do të kishin më shumë shtysë për ta riluajtur atë, por kështu historia nuk do të arrinte të njëjtin nivel që ka arritur momentalisht. Ghost of Tsushima rrotullohet rreth udhëtimit dhe evolucionit të Jin dhe se çfarë efektesh ka kjo gjë për samurait, ishullin e Tsushima dhe të gjithë kundërshtarët. Kjo histori dhe zhvillimi i Jin si personazh janë ato që ju mbajnë juve kuriozë dhe ju shtyjnë ta luani më shumë Ghost of Tsushima.

Kur vjen puna tek gameplay, formula e Ghost of Tsushima është shumë e ngjashme me lojëra të tjera open world dhe sidomos me ato të Ubisoft. Ju mund të shkatërroni kampe mongolësh, të mblidhni objekte të ndryshme, të bëni upgrade armët dhe armaturat tuaja, si dhe të plotësoni një sërë misionesh me shpërblime të ndryshme. Shpesh herë, të duket sikur ke shumë gjëra për të bërë dhe kur sheh hartën mund të trembesh, por gjithsesi kurioziteti dhe mënyra se si ndërthuret gameplay të bën të përpiqesh edhe më shumë për të plotësuar çdo gjë që gjendet në hartë.

Diçka tjetër që e ndihmon shumë Ghost of Tsushima: Director’s Cut është fakti që ajo duket dhe luhet në mënyrë fenomenale. Ishulli i Tsushima me bimësinë e pasur dhe të gjallë, motin e trazuar dhe panoramat fantastike është mbase një prej botëve më të bukura dhe më tërheqëse që kemi parë në lojëra sandbox open world. Madje, do të shkonim aq larg sa do e quanim një luks faktin që kjo botë ekziston. Shpesh herë, ndodh që thjesht fiksohesh me Photo Mode ose thjesht eksploron ishullin për të parë sa më shumë, pa luftuar aspak me kundërshtarë.

ghost of tsushima

Një botë kaq e bukur dhe një histori kaq tërheqëse duhet të shoqërohet patjetër me luftime argëtuese. Ghost of Tsushima kryesisht arrin të përziejë në mënyrë brilante dy mënyra luftimi me njëra tjetrën, duke i dhënë mundësi vetë lojtarit të zgjedhë. Luftimet me shpata janë të thjeshta si ide, por në fakt kur luani janë mjaft sfiduese. Ju keni katër stances: stone, water, wind dhe moon. Secila prej tyre është më efektive në varësi të armëve që kanë kundërshtarët tuaj. Në fillim do të vdisni shpesh derisa të mësoheni me mënyrën e luftimit, por kur arrini pikën që të ndryshoni stances pa vështirësi në varësi të kundërshtarëve dhe të përdorni çdo armë që keni, luftimet me shpatë bëhen një vallëzim fantastik vdekjeprurës.

Luftimet me shpatë janë të ndërthurura njëkohësisht edhe me luftimet tuaja si Ghost ndërkohë që rrini të fshehur. Edhe pse ky aspekt nuk është aq i përsosur sa luftimet ballë për ballë, ju gjithsesi do të argëtoheni shumë duke u futur nga një ndërtesë në tjetrën dhe duke u fshehur në bar dhe duke pritur kundërshtarët tuaj që t’i vrisni pa bërë zhurmë. Megjithatë, loja jua tregon shumë vonë potencialin e plotë që Jin ka si Ghost dhe ju e merrni shumë vonë armaturën e cila e bën stealth të jetë vërtet shumë argëtues.

Gjatë gjithë kohës që luani, ju bëni upgrade armaturat tuaja për të dyja stilet e gameplay-t. Megjithatë, stealth është aspekti që përfiton më shumë nga upgrades, me chain assassinations që janë fantastike për t’u parë, por që njëkohësisht ju ndihmojnë shumë. Luftimet me shpatë dhe ato të fshehura fillimisht duken shumë të thjeshta, por me kalimin e kohës ju dhe armiqtë tuaj do të keni një shumëllojshmëri mjetesh që mund të përdorni për të luftuar. Ka shpesh raste kur luftimet bëhen midis ushtrive shumë të mëdha dhe shumë gjëra ndodhin njëherësh dhe juve ju duhet të përdorni gjithçka keni për të mbijetuar.

ghost of tsushima

Nëse luani për herë të parë Ghost of Tsushima me versionin Director’s Cut, ju do të impresionoheni shumë. Megjithatë, lojtarët veteranë mbase nuk do të jenë aq të interesuar duke qënë se ky version i ri nuk sjell shumë ndryshime. Megjithatë, versioni për PS5 i Ghost of Tsushima sjell shumë përmirësime teknike. Loading times tani janë shumë të shkurtra dhe ju mund të udhëtoni nga një cep i hartës në tjetrën në pak sekonda. Kjo ju shtyn më shumë që ta eksploroni hartën plotësisht dhe të shkoni në çdo vend që ajo ofron.

Ghost of Tsushima është një tjetër lojë që e shfrytëzon në maksimum controller-in DualSense të PS5. Ju do të ndjeni çdo hap që hidhni ndryshe në varësi të terrenit ku po ecni. Gjithashtu, luftimet me shpata bëhen më të gjalla pasi ju mund t’i ndjeni përplasjet e shpatave. Ju keni dy harqe dhe ju mund ta ndjeni ndryshimin midis Half Bow dhe Longbow kur i përdorni, pasi R2 ka më shumë rezistencë kur përdorni longbow.

ghost of tsushima

Gjithsesi, shtesa më e madhe dhe më e rëndësishme e Director’s Cut është Iki Island. Ju tani keni mundësi të eksploroni një ishull tërësish të ri, i cili vjen me historinë e tij dhe armët dhe armaturat e ndryshme. Jin udhëton në vendin ku vdiq babai i tij për të luftuar ndaj Eagle Tribe, një kult mongol që rrezikon të pushtojë ishullin. Liderja e tyre, The Eagle, i jep Jin një drogë që i shkakton halucinacione dhe kjo sjell disa eksperienca mjaft trippy për lojtarët.

Helmi që The Eagle i jep Jin shërben për ti dhënë lojtarëve ndjesinë që ajo mbetet një rrezik shumë i madh, por njëkohësisht i jep atyre një mënyrë për të hyrë më thellë në mendjen e Jin Sakai, një njeriu që fajëson veten për vdekjen e babait të tij. Për të, Iki Island është një vend i mallkuar, por ai gjithsesi duhet të luftojë për të larguar mongolët. Megjithatë, nëse historia e lojës është më shumë Jin kundër mongolëve, në Iki Island historia fokusohet më shumë tek Jin kundër të shkuarës së tij.

Gameplay në Iki Island mbetet pak a shumë njësoj me atë që kemi parë në Ghost of Tsushima, përveç disa aktiviteteve të ndryshme si sanctuaries ku ju mund të luani flautin tuaj për kafshët ose archery challenges ku duhet të tregoni aftësitë tuaja me hark. Historia e Iki Island është shumë ndryshe nga ajo e lojës, por gjithçka tjetër ndjek pak a shumë të njëjtin drejtim dhe kjo nuk është diçka e keqe.

ghost of tsushima

Iki Island ofron diku tek 10 orë gameplay, por nuk jemi të sigurt nëse kaq mjafton për t’i bërë lojtarët e vjetër ta riblejnë lojën. Si DLC, ajo i drejtohet lojtarëve që e kanë mbaruar lojën, pasi ngjarjet ndodhin pas atyre në lojën kryesore. Mongolët në Iki janë më të fortë dhe më të zgjuar dhe ata gjithashtu kanë Shamanë, të cilët i bëjnë më të fortë, si dhe luftëtarë të tjerë që mund të ndryshojnë armët që po përdorin, duke ju mbajtur gjatë gjithë kohës të angazhuar në luftime.

Përveç Iki Island, Ghost of Tsushima ofron edhe Legends mode. Ky ishte një update falas që erdhi për PS4, por edhe për PS5. Ju mund të krijoni një ekip me deri në 4 lojtarë të tjerë online dhe të ndesheni me kundërshtarë demonikë. Ju zgjidhni një prej 4 klasave: samurai, hunter, assassin dhe ronin. Secila ka fuqi të ndryshme të mbinatyrshme dhe ju duhet të kombinoheni me lojtarë të tjerë për ta luajtur. Të jemi të sinqertë, Legends nuk është se është mode kryesor i Ghost of Tsushima, por gjithsesi është një shtesë mjaft e mirë dhe na bëhet shumë qejfi që është pjesë e lojës.

Në përgjithësi, Ghost of Tsushima: Director’s Cut ofron një eksperiencë fantastike në PlayStation 5. Nëse nuk e keni provuar më parë Ghost of Tsushima në PS4, ky expansion është justifikimi perfekt për ta provuar. Edhe pse nuk sjell asgjë inovative, Ghost of Tsushima kombinon në mënyrë fantastike stile të ndryshme luftimi me një histori që të përfshin shumë brenda saj. Dhe qershia mbi tortë është fakti që e gjitha kjo zhvillohet në mbase një prej botëve më të bukura që kemi parë ndonjëherë në videolojëra. Director’s Cut e ka perfeksionuar më tej lojën duke e zgjeruar edhe më shumë. Nëse e keni luajtur më parë Ghost of Tsushima mbase do të jeni pak skeptikë për ta provuar, por për këdo që nuk e ka luajtur, Ghost of Tsushima: Director’s Cut duhet të jetë patjetër në listën tuaj.