fort-triumph-review
Nintendo PC PS4 Reviews Xbox One

Fort Triumph Review – Një turn-based RPG argëtues

Mbështesni GameON Albania duke përdorur kodin support-a-creator: GAMEONALBANIA

Pas dy vitesh në Early Access, në Steam më në fund është lançuar Fort Triumph, një hibrid strategji-RPG mjaft tërheqës. Loja ambicioze është zhvilluar nga CookieByte Entertainment, një studio izraelite e cila e zbuloi fillimisht lojën në Kickstarter. Loja është e bazuar shumë tek Dungeons & Dragons, duke ruajtur tematikën dhe dizajnin e këtij zhanri, ndërkohë që stili i thjeshtë dhe i rafinuar grafik i ngjason lojërave si World of Warcraft dhe League of Legends. Pavarësisht se ndihet si diçka që e kemi parë më parë, loja është mjaft argëtuese dhe campaign-et e saj të shumta i japin asaj shumë jetëgjatësi.

Një përzierje midis taktikave të luftimit të XCOM dhe strategjisë raund pas raundi si Heroes of Might and Magic, Fort Triumph e sjell këtë koncept në mënyrë mjaft të mirë. Katër campaigns si Humans, Goblins, Undead dhe Forest Utopians i japin lojtarit mundësi të luftojnë nga fortesat e tyre, të mbledhin resurse dhe të përballen me klanet kundërshtare që bëhen më të fuqishme gjatë historisë. Fortesat janë vendi ku lojtarët mund të ndërtojnë dhe përmirësojnë ndërtesat e tyre si dhe mund të marrin heronj me anë të Magic dhe Beetcoins, si dhe të marrin buffs të përhershme me Renown. Fortesat e lojtarëve gjenerojnë automatikisht Beetcoins çdo ditë në lojë, por ato dhe Magic gjithashtu mund të gjenden në botën e lojës. Ndërkohë, Renown mund të fitohet duke luftuar.

Ndërkohë që elementet strategjik të lojës zhvillohen në një hartë jo-shumë tërheqëse 2D, veçoria më e bukur e Fort Triumph janë padyshim luftimet 3D. Skenaret e misioneve, të cilat variojnë nga vrasja e kundërshtarëve tek kompletimi i objektivave, e marrin lojtarin nga bota e lojës dhe e fusin atë në harta të gjeneruara vazhdimisht për të luftuar në beteja të shkëlqyera strategjike. Me anë të një game të gjërë aftësish për çdo klas dhe opsionesh taktike, luftimet janë argëtuese dhe brilante, por jo të komplikuara. Duke u inspiruar nga lojëra si Into the Breach, sulmet më kreative janë ato Physics, të cilat të japin mundësi të godasësh një kundërshtar tek një tjetër dhe t’i hedhësh atyre objekte për t’i bërë damage ose stun.

As lojtarët që duan të sfidohen si në XCOM dhe as lojtarët e rinj të këtij zhanri nuk do të zhgënjehen. Fort Triumph është e balancuar mjaft mirë dhe ka disa opsione vështirësie, të cilat variojnë nga misione sa për t’i marrë dorën lojës tek luftime deri në vdekje. Perma-death është e aktivizuar për anëtarët e ekipit, gjë që do të thotë se do lëvizje ka peshë të madhe dhe humbja e një anëtari të specializuar të ekipit në fillim mund të jetë mjaft problematike për një lojtar që nuk dëshiron të bëjë restart. Loja ofron mjaft surpriza gjatë saj. Fort Triumph nuk është aq e vështirë sa një lojë Souls, por lojtarët futen menjëherë në betejë pas një tutoriali të shkurtër, duke patur hapsirë për t’u përfshirë në botën e lojës pas çdo luftimi dhe pjese të historisë.

Përveç mekanikave, ka shumë arsye të tjera pse Fort Triumph është tërheqës. Lojtarët mund të krijojnë disa ekipe me 5 anëtarë, duke patur mundësi të mbrohen dhe të sulmojnë. Katër klaset klasike të lojërave RPG, Paladin, Mage, Ranger dhe Savage, mund të personalizohen me shumë aftësi të specializuara, por edhe duke iu ndryshuar emrin dhe ngjyrat e veshjeve të tyre.

Nuk është e vështirë të tërhiqesh nga personazhet falë dialogut të lojës, i cili zmadhon dhe njëkohësisht ndryshon idetë e krijuara për një Paladin të pastër, një Savage barbar dhe një goblin budalla, duke i bërë lojtarët të qeshin dhe duke mos qënë një lojë e zymtë. Historia është po njësoj, duke ofruar satirë si nevoja për të minuar Beetcoin (kush e kap e kap), topa magjikë të kristaltë që funksionojnë si video call dhe personifikimi i së keqes në botën e lojës i cili flet në mënyrë mjaft të lirshme me ushtarët e tij për tema si tortura dhe skllavëria.

Fort Triumph është fantastike, por jo perfekte. Si me shumë lojëra të këtij zhanri, sulmet do të godasin ose jo në varësi të përqindjeve. Kjo padyshim që do t’i acarojë lojtarët vazhdimisht, të cilët nuk kanë mundësi të kontrollojnë plotësisht rezultatet e një luftimi. Bezdisje të tjera të vogla janë fakti se është e pamundur të ndryshosh controls të lojës dhe kamera në luftime ka disa herë kënde mjaft të çuditshme, sidomos kur vjen puna tek fatal blows dhe critical hits.

Përveç këtyre problemeve të vogla, CookieByte Entertainment ka krijuar një lojë mjaft të mirë në zhanrin turn-based strategy dhe rezultati përfundimtar mund të vendoset në të njëjtin nivel me serinë XCOM. Luftimet janë të zgjuara dhe argëtuese, historia dhe humori janë fantastike dhe ato gjëra që mungojnë janë probleme mjaft të vogla që mund të rregullohen në të ardhmen, pasi loja është mbështetur mjaft mirë nga zhvilluesit që prej lançimit në Early Access. Nëse jeni fansa të zhanrit fantazi-RPG, padyshim që duhet t’i hidhni një sy.