foregone-review
Nintendo PC PS4 Reviews Xbox One

Foregone Review – Një platformer që të teston durimin

Mbështesni GameON Albania duke përdorur kodin support-a-creator: GAMEONALBANIA

Foregone është një platformer aksion-aventurë interesant dhe me një stil mjaft unik grafik. Loja është e vendosur në qytetin e Calagan, ku ju luani si një super-ushtar me detyrën për të mposhtur The Harrow, një qënie që ka aftësinë të ringjallë të vdekurit. Në një zhanër me shumë lojëra të ngjashme, Forgone duhet të gjejë mënyrën për ta diferencuar veten dhe këtë gjë e bën deri diku mjaft mirë.

Edhe pse fillimisht Foregone duket sikur ka një histori të thellë dhe bota e lojës do të shpaloset më shumë rreth saj, fatkeqësisht kjo është pika më e dobët e saj. Historia e lojës nuk bëhet asnjëherë interesante mjaftueshëm sa për të të ngjallur interes për ta ndjekur atë më me detaj dhe për të kërkuar në botën e lojës copëza historie. Në përgjithësi, ajo shërben vetëm për të të dhënë idenë se bota është duke u shkatërruar dhe ajo që ju duhet të bëni është që të vrisni vazhdimisht përbindëshat që ju dalin përpara, gjë që në Foregone është mjaft argëtuese.

Gameplay i Foregone është mjaft i thjeshtë për t’u mësuar dhe kuptuar. Ju mund të sulmoni kundërshtarët nga afër ose nga larg dhe duhet që gjatë gjithë kohës të kërceni ose të kaloni pas kundërshtarit për t’iu shmangur sulmeve të tyre. Loja ka një variatet të gjërë kundërshtarësh, secili me sulmet e tyre të veçanta të cilat t’i duhet t’i mësosh se si t’i shmangesh. Kur t’i vret kundërshtarët, ata të japin gold që përdoret për të bërë upgrade armët dhe armaturat, kristale që përdoren për të bërë upgrade statistikat dhe aftësitë e personazhit, si edhe heals për t’iu shpëtuar nga situata të rrezikshme.

Personazhi juaj ka gjatë gjithë kohës një armë për luftime nga afër që mund të jetë një shpatë ose një shtizë, si dhe një armë për luftime nga larg që mund të jetë një pistoletë ose një hark me shigjeta. Loja të jep disa opsione armësh nga të cilat mund të zgjedhësh për t’i përdorur më vonë dhe secila prej tyre ka një playstyle të caktuar. Kjo i jep lojtarit mundësi ta përshtati personazhin sipas preferencave të tij, por ndodh që kur zbulon armën që të përshtatet, e ke shumë të vështirë për ta ndërruar atë më vonë dhe ti vazhdon që të bësh upgrade po atë armë.

Përveç armëve, loja gjithashtu të jep mundësi të marrësh armatura, unaza dhe medalione. Armët dhe veshjet që ti përdor kanë tre tiers dhe një armë e një tier-i më të larë është normalisht më e fortë dhe më e mirë. Gjithçka që ti vesh të jep gjithashtu një bonus në statistikat e tua, i cili mund të ketë lidhje me jetët ose dëmin që bëni, por edhe me aftësitë tuaja.

Duke qënë se në Foregone nuk ka një sistem eksperience, progresioni vjen në formën e upgrade-ve të armëve dhe aftësive të personazhit. Ju keni mundësi të shpenzoni gold dhe kristalet që keni mbledhur në Outposts dhe loja të shtyn ta bësh këtë gjë sa më shpesh, pasi kur vdes ti humbet plotësisht gold dhe kristalet që ke mbledhur deri më tani në lojë. E vetmja mënyrë për t’i marrë ato mbrapsht është duke shkuar sërish tek vendi ku ke vdekur, në mënyrë të ngjashme me Dark Souls, ose duke folur me një shtrigë në spawn e cila ju jep mbrapsht gjysmën e gold dhe kristaleve që kishit mbledhur deri në pikën kur vdiqët. Kjo e bën vdekjen mjaft ndëshkuese dhe e bën atë një lojë me mjaft grind dhe ku duhet të jesh shumë i fokusuar.

Problemi i Foregone është se loja është herë pas here më e vështirë seç duhet. Ky zhanër është mjaft i njohur si një zhanër mjaft i vështirë, por në Foregone hapësira që ju keni për të lëvizur është mjaft e vogël dhe do t’ju duhet të përballeni me shumë kundërshtarë. Kjo bën që edhe kur mundohesh t’i shmangesh sulmeve të njërit prej tyre, të përfundosh duke i shkuar përballë sulmit të dikujt tjetër dhe duke marrë damage pa patur mundësi të bësh diçka. Loja bëhet pak më e menaxhueshme kur merr disa aftësi, por gjithsesi do të të duhet të përballesh shpesh herë me të njëjtët kundërshtarë në të njëjtat zona të lojës. Sistemi i upgrade gjithashtu nuk është perfekt, pasi ju merrni vetëm boost në statistika dhe do t’ju duket sikur paratë që po shpenzoni për të përmirësuar armët tuaja po shkojnë dëm, duke qënë se nuk ka asnjë efekt që të bën të kuptosh se vërtet armët e tua po bëjnë më shumë damage. Gjithashtu, personazhi juaj qëndron gjatë gjithë kohës i njëjtë dhe ju nuk keni mundësi ta personalizoni atë, një aspekt që do ta bënte lojën mjaft më të pëlqyeshme.

Gjithsesi, Foregone mbetet një lojë mjaft e mirë. Luftimet janë argëtuese dhe sfiduese, por shpesh herë do t’ju acarojnë pasi janë mjaft të vështira. Stili grafik i lojës është mjaft i veçantë, por nuk do të pëlqehet nga të gjithë, pasi nuk është aspak realistik dhe ndonjëherë bëhet edhe i lodhshëm. Megjithatë, loja është ende në Early Access, prandaj ka kohë që problemet të rregullohen.