PC PS4 Reviews Xbox One

F1 2020 Review

Mbështesni GameON Albania duke përdorur kodin support-a-creator: GAMEONALBANIA

F1 2020 tregon se si zhvilluesi zyrtar i lojërave F1, Codemasters, vazhdon të evolojë dhe t’i përshtatet realitetit të botës së F1. Ardhja e My Team në lojë, Split Screen dhe shumë aspekte të reja gameplay tregon se zhvilluesit janë të gatshëm të arrijnë në një nivel tjetër kur vjen puna tek luajtja e një loje Formula 1 siç është F1 2020.

F1 2020 është një përmirësim i dukshëm në krahasim me lojërat paraardhëse. Edhe pse sezoni i F1 në jetën reale u shty për shkak të pandemisë së COVID-19, disa prej veçorive të lojës duken ndryshe nga realiteti, por Codemasters ka premtuar se do të sjellë vazhdimisht patch-e për ta mbajtur lojën sa më të freskët dhe sa më pranë realitetit.

Në zemër të F1 2020 është My Team, një prej veçorive të reja që ka ardhur në lojë. My Team i jep mundësi lojtarit të krijojë dhe të menaxhojë ekipin e tij sipas dëshirës, ndërkohë që ai është gjithashtu edhe një prej garueseve të ekipit të tij. Nga zgjedhja e shokut tuaj garues tek fokusi i departamenteve të ndryshme, My Team ju jep mundësinë të menaxhoni shumë prej aspekteve të ekipit tuaj të F1, si dhe ju jep mundësi të firmosni me garuesit që ju doni të keni në ekip kur kontratat e tyre mbarojnë. Gjithsesi, ky mode i ngjason më shumë FIFA Career Mode sesa Football Manager, prandaj mos prisni që të keni kontroll të plotë mbi çdo gjë të ekipit tuaj.

Me anë të performancave të mira të ekipit në pistë, por edhe duke dhënë përgjigjet e duhura në intervistat jashtë garës, ju mund të mblidhni shumë pikë Acclaim dhe të bëheni ekipi më prestigjioz në Formula 1. Acclaim është shumë i rëndësishëm, pasi ai iu jep mundësinë të tërhiqni më shumë sponsora dhe të merrni pilota më të mirë në ekip.

I vetmi aspekt deri diku negativ i My Team është se ky mode heq dorë deri diku nga historia që kishte F1 2019. Do të ishte mirë sikur rivaliteti që ju keni me garuesit brenda lojës të shfaqej edhe jashtë piste, se në qoftë se intervistat do të kishin pyetje pak më të mira. Gjithsesi, këto janë gjëra të vogla të cilat nuk do të vihen re nga shumica, prandaj nuk ja vlen që të ankohemi shumë për to.

Në pistë, makinat e F1 2020 ndihen si të vërteta. Codemasters e ka përmirësuar vit pas viti eksperiencën në pistë dhe ky trend vazhdon edhe me lojën më të re të serisë. Kur përmirësoni makinën tuaj, ju mund ta ndjeni menjëherë ndryshimin në pistë, me makinën që ecën më shpejtë ose futet më mirë në kthesë. Edhe kur e humbet kontrollin e makinës kur futesh në kthesë, nuk të duket sikur makina ishte jashtë kontrollit tënd dhe ti bëre gjënë e duhur, por sikur u ndëshkove për një gabim që bëre. Në shumë mënyra, F1 2020 të bën të kuptosh më mirë se si bota e F1 funksinon dhe si një pilot i F1 mendon.

AI i pilotëve në lojë është përmirësuar dhe ata janë më të vështirë se kurrë. Nëse doni, ju mund ta ulni nivelin e tyre dhe ta luani lojën për qef, por nëse doni një eksperiencë sa më realistike dhe tensionuese, AI i niveleve të larta ju shtyn ju të arrini limitin e aftësive dhe përqendrimit tuaj. Gjithsesi, loja ofron ndihma të shumta për lojtarët dhe edhe në qoftë se nuk jeni një pilot ekspert, ju mund të nisni nga zeroja dhe ta bëni lojën gradualisht më të vështirë, ndërkohë që përmirësoni aftësitë tuaja. Megjithatë, edhe pse AI është shumë i mirë, ndodh shpesh herë që ata të bëjnë gabime dhe loja të të fajësojë ty, gjë që bëhet acaruese pas pak kohësh.

Edhe F1 2020 i është bashkuar trendit të battle pass-eve, me Codemasters që kanë sjellë në lojë VIP Podium Pass. Fatmirësisht, ky pass ju jep vetëm cosmetics dhe duhet thënë se Pass-i i sezonit të parë duket shumë i bukur. Në përgjithësi, dizajnët dhe mënyra se si F1 2020 i paraqitet lojtarëve është mjaft e mirë dhe tërheqëse. Menutë e lojës janë të thjeshta për t’u kuptuar, ndërkohë që makina dhe piloti juaj mund të personalizohen plotësisht në My Team. Në pistë, grafikat e lojës janë fantastike dhe po e njëjta gjë mund të thuhet edhe për audion. E vetmja gjë që duhet të përmirësohet është komentimi i David Croft dhe Anthony Davidson, të cilët shpeshherë përsërisin të njëjtat rreshta garë pas gare dhe bëhen mjaft të lodhshëm.

MultiplayerF1 2020 është ok. Nëse nuk keni internet të mirë, do të hasni mjaft probleme me serverat e lojës dhe shpesh herë do të dilni nga gara edhe pse gjithçka duket sikur është ok. Garat normale, qoftë Ranked apo Unranked, janë totalisht kaos. Madje, njëherë ndodhi që luajtëm një garë dhe e gjitha përfundoi brenda 3 xhirove pasi të gjithë lojtarët u përplasën ose u eliminuan. Gjithsesi, nëse arrini të gjeni një grup serioz garuesish dhe të futeni në një ligë të mirëfilltë, eksperienca juaj do të jetë mjaft e kënaqshme.

F1 2020 është loja më e kompletuar Formula 1 deri më sot. Codemasters ka sjellë përmirësime të mëdha në lojë. My Team është një mode fantastik dhe mjaft tërheqës dhe ju keni mundësi të luani plot 10 sezone argëtuese dhe kompetitive. Makinat dhe garimi është thuajse perfekt, ndërkohë që opsionet e AI i japin mundësinë çdo lojtari të gjejë një nivel ku ai ndihet rehat. Multiplayer ka potencial mjaft të lartë nëse arrini të futeni në liga serioze, por besojmë se shumica e lojtarëve do të mjaftohen me eksperiencën që Codemasters sjell në single player. F1 2020 është tërheqëse në pistë dhe jashtë piste dhe është një lojë që ja vlen të luhet nga kushdo që është sadopak fans i F1 ose i garave me makina.