Mbështesni GameON Albania duke përdorur kodin support-a-creator: GAMEONALBANIA
Po kerkoni për diamante në Free Fire Falas?! Klikoni këtu për të marrë pjesë në Giveaway për Free Fire Diamonds
Pas shumë vitesh në pritje, duke u befasuar herë pas here nga trailerat shumë konfuzues të Death Stranding, më në fund kemi rastin ta eksplorojmë këtë botë të sjellë në jetë nga Kojima Productions. Pas largimit shumë dramatik të Hideo Kojima nga studioja e suksesshme Konami, producenti i famshëm nuk mund të vazhdonte më me Metal Gear Solid, por kjo nuk e pengoi atë që të krijonte një lojë të tijën fanta-shkencë me një histori të çuditshme dhe të thellë.
Edhe pse në pamje të parë duket sikur kjo lojë prek shumë tematika të cilat nuk mund të kuptohen nga shumë persona,kjo nuk duhet që t’ju pengojë eksperiencën që Death Stranding ju sjell në konsolën tuaj. Historia shpaloset në një mënyrë fantastike, me anë të personazheve të shumtë ku secili ka një pikëpamje të ndryshme në lidhje me vdekjen, dhe kjo krijon dritare të shumta se si mund të përshkruhet rruga e jetës. Të gjithë personat që rrethojnë Sam-in, personazhi kryesor, i japin atij ide dhe detaje të ndryshme në lidhje me jetën që ata jetonin, duke thelluar marrëdhëniet e lojtarit me fytyrat që e shoqërojnë gjatë lojës. Këto histori të ndryshme mund të shpalosen më shumë nëse gjatë udhëtimit lexon shënime të lëna për personazhet e ndryshëm, duke të të bërë që të kuptosh më shumë, dhe të lidhesh më fort me ta. Kjo të ndihmon që të ngulitesh më thellë brenda në histori, dhe eksperienca jote të ketë më shumë kuptim.
Misioni i Sam është që të kryejë një seri transportimesh nga një qytet në një tjetër, përgjatë një Amerike apokaliptike, duke i fituar besimin çdo banori të secili qyteti, dhe duke i nxjerrë njëkohësisht online në programin e qeverisë të quajtur “Chiral Network”. Një ndër personazhet më të rëndësishme të lojës, është BB, një fëmijë I vogël që Sam mban në një kapsulë, pasi ai e ndihmon në rrugëtimin e tij duke i treguar rrugën më të sigurt. Edhe pse BB nuk nxjerr asnjë fajlë gjatë gjithë udhëtimit, është e vështirë të mos krijosh një lidhje emocionale me këtë krijesë kaq delikate ne nje botë kaq të frikshme sa ajo e Death Stranding.
Elementet kryesore që kontribojnë në faktorin e rrezikut kudo nëpër ambjentin që rrethon Sam-in, janë BT. Këto janë krijesa jashtë-dimensionale që shkatërrojnë këdo dhe gjithçka përreth. Në fillim, me ndihmën e BB ti si lojtar duhet që të shmangësh këto krijesa të errëta, pasi nuk ke asnjë zgjidhje tjetër. Kjo mund të bëhet duke mos shkelur në territoret e tyre, dhe duke lëvizur me shumë kujdes që të mos tërheqësh vëmendje. Kjo ecje e ngadaltë, sidomos në fillim të lojës, krijon një ndjesi thriller në çdo aspekt, ku kodrat e qeta kthehen në të shkreta të errëta që te rrënqethin mishin. Falë këtij stili stealth në të cilin loja të përfshin, fillimi mund të duket shumë i ngadaltë, por më vonë personazhi yt do të pajiset me armë dhe elemente të tjera ndihmuese, të cilat japin një sens progresi dhe kënaqësie, sikur po arrin diku. Kjo mund të vihet re rreth 10 orë pas fillimit të lojës dhe është pjesa ku lojtari mund të kënaqet më shumë pasi elementet thriller zëvendësohen me elemente më të shpejta në kohën e duhur, kur ajo e para fillon të bëhet pak e mërzitshme. Në fund të fundit, ky është qëllimi i Death Stranding: të arrish diku me synimin që të transportosh të mira, duke ndihmuar personazhet e ndryshëm që has gjatë udhëtimit.
Trasnporti është elementi kryesor i gameplay-it në këtë aventurë. Ti duhet të dërgosh pako nga pika A në pikën B. Mallrat që transporton janë fizike, ato kanë peshë dhe zënë vend, prandaj duhet të kesh një balancim të arsyetueshëm perpara se të nisesh për një udhëtim. Shumë pako do ta bëjnë rrugën më të vështirë, por më pak se ç’duhet nuk do të të japin vlersimin e plotë për rrugën e kryer. Balancimi i kutive që duhet të transportosh dhe kutive që të duhen për udhëtim si kutia me municione dhe kutia e shkallëve, është çelësi i avancimit në këtë lojë.
Ndryshe nga lojërat si Assassin’s Creed ku personazhi yt lëviz në një mënyrë shumë të lirshme me lëvizje të larmishme parkour, në Death Stranding lëvizja është e ngadaltë dhe të studion fare mirë durimin. Në një kohë kur lojërat e tjera nuk i kushtojnë gati aspak vëmendje mekanizmit të ecjes dhe i kushtohet vetëm analogu këtij veprimi e madje në shumë lojëra format më të komplikuara të ecjeve si parkour kryhen vetem me shtypjen e një butoni si në Spider-Man PS4, në Death stranding je i detyruar t’i kushtosh vëmendje elementëve të ecjes që nuk u ke kushtuar vëmendje në asnjë lojë të mëparshme. Ti duhet të balancosh trupin e Sam-it dhe të ruash shpejtësin e lëvizjes së hapit me R2 L2, dhe thumbstick. Ky mund të jetë një tipar që ndihmon përfshirjen e lojtarit në gameplay, por në shumë raste të pengon progresin dhe të ngadalëson në mënyrë drastike zhvilimin e lojës. Në shumë raste kontrollet janë acaruese dhe duhet të kesh durim që të kryesh lëvizjen më të vogël. Sam-i mund të pengohet në gura mjaft të vegjël ose të humbë ekuilibrin pa asnjë arsye.
Ata që ta bëjnë të vështirë udhëtimin, përveç krijesave BT dhe kontrollave acaruese, janë njerëzit dhe transportuesit e tjerë. Edhe pse t’i duhet të eleminosh krijesat e errëta në cdo lloj mënyre, kur vjen puna tek njerëzit, gjërat komplikohen. Nuk sygjerohet aspak që të vrasësh njerëz të tjerë, pasi aventura jote është një rrugëtim përgjatë konceptit të jetës dhe vdekjes, prandaj vrasje të mëtejshme do të sjellin korrupsion të botës përreth dhe lindjen e më shumë BT. Gjëja që mund ta bëjë këtë eksperiencë pak më të ngadaltë dhe të mërzitshme, është fakti që BT nuk janë shumë të vështire për tu eleminuar në momentin kur pajisesh me armë të ndryshme dhe disa herë pengesat më të vogla mund të të bëjnë që të humbasësh pakot e tua. Shpesh here, ngjitja e kodrave të ndyshme mund të duket si një punë e bezdisshme për faktin e vështirësisë së kontrollimit të personazhit në rastin e pengesave të ndryshme.
Por në shumë raste, Death Stranding shikon përtej këtyre elementëve bezdisëse. Rrugëtimet e tua mund të përshpejtohen me fitimin e makinave dhe motorrave të ndryshëm të transportit e madje edhe me ndërtimin e rrugëve të gjata që lidhin më lehtë destinacionet. Ajo që më tërhoqi më shumë gjatë rrugëtimit të kësaj loje, ishte elemnti i pjesshëm online multiplayer. Gjatë rrugëtimit tënd për transportim, ti ke mundësi të përdorësh struktura ndihmëse të lëna pas nga lojtarë të tjerë që kanë kryer këto rrugëtime më përpara. Madje, edhe ti vet mund të kontribosh dhe të lësh pas elemente ndihmëse për lojtarët e tjerë, si shkallë dhe rrugë, duke krijuar një sens bashkimi që të bën të ndihesh mirë që je pjesë e këtij komuniteti.
Përveç strukturave që mund të lësh ti pas janë edhe strukturat e shumta të krijuara nga zhvilluesit e Kojima Productions të cilët kanë zhvilluar një botë fantastike, me grafika marramëndëse, të cilat e shtyjnë forcën e PlayStation në maksimum. Personazhet janë të detajuar me animacione reale dhe tërheqëse, bota e zymtë ka një atmosferë vërtet mbytëse, e cila ne shumë raste të kërkon që të ndalesh dhe thjesht të vështrosh botën përreth, pasi edhe pse boshe në disa raste, shtrihet në shkallëzim që të lë pa fjalë. Është faktuale se një element i rëndësishëm që i jep Death Stranding ndjesinë e boshllëkut në një mënyrë të fortë artistike është edhe muzika dhe audioja që është prezente në çdo hap të udhëtimeve.
Loja hapet me një soundtrack të mrekullueshëm nga libraria e Ludvig Frossell, dhe nga ai moment më pas sa vjen dhe të përfshin më shumë. Çdo tingull ka një goditje të ndryshëm, dhe cdo moment luan një tingull të ndryshëm. Muzika që luhet gjatë kohës kur futesh në territorin e BT, të detyron që të mbash frymën dhe të kontrollosh çdo hap që merr. Ndërsa muzika që luhet në skenat e rëndësishme që kanë të bëjnë me zhvillimin e personazheve, të jep një ndjesi afrimi të mëtejshëm me Sam-in. Efektet zanore janë fenomenale, ku ti dëgjon çdo hap të personazhit, dhe duket sikur je me të në çdo rrezik që është gati të marrë përsipër.
Konkluzion
Death Stranding është padyshim një lojë e gjatë, me të cilën do të kaloni orë të tëra duke luajtur dhe elementi I ndihmës mes lojtarëve online kudo nëpër botë pa dyshim që të bën të kthehesh herë pas here të vizitosh botën tënde. Kjo i jep lojës pikë vlerësimi nga ne si reviewers, por edhe nga gamers.
Death Stranding mund të luhet në PS4 dhe PS4 Pro. Kjo review është mundësuar nga Albagame.
Për ta blerë lojën online vizitoni links më poshtë:
PS4 – http://bit.ly/alba-deathstranding
