Më herët gjatë këtij muaji u raportua se anëtarë të Electronic Arts po ekzaminonin gjendjen e tanishme të reboot-it të Anthem, për të vendosur a do të vazhdonin me procesin, apo do e ndërprisnin. Rezultatet e këtij ekzaminimi janë bërë tashmë publike dhe Bio Ware ka konfirmuar se puna mbi Anthem është ndërprerë zyrtarisht.
“E di se kjo do të jetë zhgënjyese për komunitetin e lojtarëve të Anthem. Është zhgënjyese edhe për ekipin që ka qenë duke punuar. Për mua personalisht Anthem është ajo që më solli te BioWare dhe dy vitet e fundit kanë qenë eksperiencat më sfiduese dhe shpërblyese të karrierës time.
Fundi i zhvillimit të Anthem nuk nënkupton fundin e lojës gjihtsesi. BioWare do të vazhdojë ta mbajë Anthem në stadin që ajo është edhe sot.” Është shprehur Christian Dailey, drejtori i studios BioWare.
Pavarësisht disa problemeve, Anthem pati lançim të fortë dhe ishte loja më e shitur e shkurtit të 2019. Gjithsesi ajo u zbeh shpejt dhe ishte në telashe pak muaj pas lançimit. Kjo jo vetëm për shkak të numrit të madh të bugs, por edhe sepse ishte “e mërzitshme”.
Sado zhgënjyes mund të jetë ky lajm për fansat e Anthem, fundi i zhvillimit të lojës nuk vjen si ndonjë surprizë e madhe. Dailey konfirmoi se BioWare do të fokusohet në lojërat e ardhshme të Dragon Age dhe Mass Effect, ndërkohë që sjell updates edhe për Star Wars: The Old Republic.