Këtë javë Sony bëri njoftimin zyrtar të PlayStation 5 dhe njëkohësisht zbuloi edhe disa detaje mbi parametrat e tij. Konsola do të ketë backward compatibilty me PS4, pra mund ti luani në PS5 të gjitha ato lojëra dhe mendohet se do të operojë 19 herë më shpejt se PS4. Sado që PlayStation 5 ngjan shumë emocionues, raportohet se Xbox-i i gjeneratës tjetër, më tamam Xbox Scarlett do të jetë më i avancuar.
Gazetari Ainsley Bowden u shpreh në Twitter, duke cituar shumë burime të brendshme, se Xbox-i tjetër do të jetë shumë më i avancuar se PS5. Se çfarë do të thotë kjo ekzaktësisht nuk është shumë e qartë, por sugjerohet dukshëm se do jetë më i fuqishëm se projekti i Sony.
Bowden thekson se burimet e tij janë të njohura dhe se kanë dhënë gjithmonë informacione të sakta përgjatë viteve. Sipas tij nuk duhet të çuditemi që Xbox-i i rradhës do të jetë më i fuqishëm se PS5, pasi Microsoft ka njoftuar që pas Xbox One X se do të kishin sërish hardware-in më të fuqishëm, edhe në gjeneratën e ardhshme.
Krahas kësaj është pak e paqartë se si do të jetë më i avancuar Xbox-i në krahasim me PS5, që do të ketë grafika 8K, operime super të shpejta, Ray-tracing, 3D audio etj. Pra nëse Xbox “Scarlett” do të jetë vërtet më i fuqishëm, kjo do të thotë që edhe çmimi i tij do të jetë më i kripur në krahasim me atë të kundërshtarit. Vetëm nëse Microsoft vendos të shkurtojë fonde nga të tijat për këtë punë.
Momentalisht kjo nuk është zyrtare, por vetëm një raportim i pakonfirmuar dhe nuk duhen marrë si fakte konkrete. Gjithsesi me çfarë po shohim besoj se do të jetë vërtet një vit fantastik për të gjithë gamerat me konsolat e gjeneratës së ardhshme.